វិមានរដ្ឋសភា៖ អគ្គនាយកដ្ឋានបច្ចេកវិទ្យាព័ត៌មាន និងគមនាគមន៍ (ICT) នៃអគ្គលេខាធិការដ្ឋាន          រដ្ឋសភា បានបើកកិច្ចប្រជុំពិភាក្សាការងារផ្ទៃក្នុង ដើម្បីត្រួតពិនិត្យ និងសាកល្បងប្រព័ន្ធបច្ចេកវិទ្យា          ទំនើបៗ សំដៅធានាឱ្យបាននូវប្រសិទ្ធភាព និងស័ក្តិសិទ្ធិភាពខ្ពស់ ក្នុងការបម្រើសម័យប្រជុំពេញអង្គរដ្ឋសភាលើកទី៦ នីតិកាលទី៧ នាពេលខាងមុខ។

កិច្ចប្រជុំនេះដឹកនាំដោយ ឯកឧត្តម សរ គឹមស៊្រុន អគ្គនាយកនៃអគ្គនាយកដ្ឋាន ICT ដោយមានការចូលរួមពីមន្ត្រីជំនាញ និងបុគ្គលិកបច្ចេកទេសជាច្រើនរូប។ ក្នុងជំនួបនេះ អង្គប្រជុំបានផ្តោតសំខាន់លើរបៀបវារៈបច្ចេកទេសសំខាន់ៗមួយចំនួន រួមមាន៖
•  ការធ្វើទំនើបកម្មប្រព័ន្ធវត្តមាន៖ មន្ត្រីជំនាញបានចុះអនុវត្តផ្ទាល់ក្នុងការធ្វើតេស្តសាកល្បងបញ្ចូលវត្តមានតំណាងរាស្ត្រក្នុងប្រព័ន្ធ ICT និងការប្រើប្រាស់វីដេអូសម្រាប់បញ្ជាក់វត្តមាន ដើម្បីធានាបាននូវតម្លាភាព និងភាពត្រឹមត្រូវបំផុត។
•  ការគ្រប់គ្រងទិន្នន័យ និងរបៀបវារៈ៖ ពិនិត្យ និងកែសម្រួលការបញ្ចូលកាលបរិច្ឆេទ រួមទាំងរបៀបវារៈនៃសម័យប្រជុំពេញអង្គទៅក្នុងប្រព័ន្ធឌីជីថល ឱ្យមានភាពរលូន និងងាយស្រួលដល់ការប្រើប្រាស់។
•  ការតភ្ជាប់ប្រព័ន្ធទិន្នន័យ (Database): ធ្វើតេស្តកម្មវិធីដែលបានដំឡើងថ្មី ដោយតភ្ជាប់ជាមួយប្រព័ន្ធ Info Desk System និងត្រួតពិនិត្យប្រព័ន្ធកូដផ្ទៃក្នុង ដើម្បីពង្រឹងសុវត្ថិភាព និងល្បឿននៃទិន្នន័យ។
•  ការផ្សាយបន្តផ្ទាល់ (Live System): សិក្សា និងដោះស្រាយបញ្ហាបច្ចេកទេសលើឧបករណ៍ HD Encoder ដើម្បីធានាឱ្យបាននូវគុណភាពរូបភាព និងសំឡេងកម្រិតខ្ពស់ ក្នុងការផ្សាយផ្ទាល់តាមស្លាបសងខាងនៃសាលប្រជុំពេញអង្គ។

ការជំរុញការងារបច្ចេកវិទ្យានេះ គឺជាផ្នែកមួយនៃកិច្ចខិតខំប្រឹងប្រែងរបស់អគ្គលេខាធិការដ្ឋានរដ្ឋសភា ក្នុងការសម្រេចឱ្យបាននូវ «សភាឌីជីថល» ដើម្បីឆ្លើយតបទៅនឹងការវិវត្តនៃបច្ចេកវិទ្យា និងបង្កើនប្រសិទ្ធភាពការងារជូនស្ថាប័ននីតិប្បញ្ញត្តិ៕