ខេត្តសានស៊ី៖ គណៈប្រតិភូរដ្ឋសភា ដឹកនាំដោយ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការទី៣ នៃរដ្ឋសភា និងជាតំណាងគណៈប្រតិភូមកពីប្រទេសកម្ពុជា ហុងគ្រី ម៉ុងហ្គោលី កូឡុំប៊ី និងអ៊ីតាលី នាថ្ងៃទី៣ ខែកញ្ញា ឆ្នាំ២០២៦ បានអញ្ជើញចូលជួបសម្ដែងការគួរសមជាមួយ លោក Zhang Chunlin ប្រធានគណៈកម្មាធិការខេត្តសានស៊ី (Shanxi) នៃសន្និសីទប្រឹក្សានយោបាយប្រជាជនចិន (CPPCC) នៅទីក្រុងតៃយាន ខេត្តសានស៊ី សាធារណរដ្ឋប្រជាមានិតចិន។
ក្នុងឱកាសនោះ ឯកឧត្តមសន្តិបណ្ឌិត ឡូយ សុផាត បានថ្លែងអំណរគុណយ៉ាងជ្រាលជ្រៅជូនចំពោះថ្នាក់ដឹកនាំខេត្តសានស៊ី ដែលបានទទួលស្វាគមន៍យ៉ាងកក់ក្តៅ និងរៀបចំជំនួបដ៏មានសារសំខាន់នេះ។ ឯកឧត្តមក៏បានពាំនាំនូវប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពី សម្តេចមហារដ្ឋសភាធិបតី ប្រធានរដ្ឋសភា ជូនចំពោះថ្នាក់ដឹកនាំ និងប្រជាជនខេត្តសានស៊ី ព្រមទាំងប្រជាជនចិនទាំងមូលផងដែរ។
លោក Zhang Chunlin បានសម្តែងនូវការស្វាគមន៍យ៉ាងកក់ក្តៅចំពោះគណៈប្រតិភូ និងតំណាងសភាបរទេស ព្រមទាំងតំណាងខេត្ត និងរដ្ឋជាមិត្តទាំងអស់ ដែលបានអញ្ជើញចូលរួមក្នុង «វេទិកាអភិវឌ្ឍន៍ថាមពលកាបូនទាបតៃយាន» ព្រមទាំងបានចែករំលែកអំពីស្ថានភាពទូទៅ និងការអភិវឌ្ឍសេដ្ឋកិច្ច-សង្គមរបស់ខេត្តសានស៊ី។
ជំនួបនេះបានផ្តោតលើការផ្លាស់ប្តូរមតិយោបល់ និងកិច្ចសហប្រតិបត្តិការលើវិស័យថាមពលកាបូនទាប ការផ្លាស់ប្តូរទម្រង់ថាមពល បច្ចេកវិទ្យាថាមពល ការអភិវឌ្ឍថាមពលបៃតង ព្រមទាំងកិច្ចសហប្រតិបត្តិការផ្នែកសេដ្ឋកិច្ច ពាណិជ្ជកម្ម និងវិស័យពាក់ព័ន្ធផ្សេងៗទៀត។
ភាគីទាំងអស់បានបង្ហាញពីឆន្ទៈយ៉ាងមុតមាំក្នុងការបន្តពង្រឹងចំណងមិត្តភាព ការផ្លាស់ប្តូរបទពិសោធ និងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក ដើម្បីជំរុញការអភិវឌ្ឍថាមពលបៃតង និងកាបូនទាបប្រកបដោយចីរភាព ព្រមទាំងរួមចំណែកក្នុងការកសាងពិភពលោកមួយដែលស្អាត និងបៃតង៕
