វិមានរដ្ឋសភា៖ ឯកឧត្តម ឃួន ដាវិត អគ្គលេខាធិការរងរដ្ឋសភា និងជាអនុប្រធានប្រចាំការក្រុមការងារសភាអេឡិចត្រូនិច នាព្រឹកថ្ងៃទី១៥ ខែកញ្ញា ឆ្នាំ២០២៦ បានដឹកនាំកិច្ចប្រជុំពិនិត្យ ពិភាក្សាដើម្បីត្រៀមរៀបចំដាក់ឲ្យដំណើរការសាកល្បងនូវប្រព័ន្ធសភាឌីជីថល (E-Parliament) របស់រដ្ឋសភា។
កិច្ចប្រជុំនេះ មានការចូលរួមពីថ្នាក់ដឹកនាំ មន្ត្រីជំនាញបច្ចេកវិទ្យាព័ត៌មាន និងអង្គភាពជំនាញពាក់ព័ន្ធចំណុះអគ្គលេខាធិការដ្ឋានរដ្ឋសភាជាច្រេីនរូប។
គួររំលឹកថា ការត្រៀមក្នុងការដាក់ឲ្យដំណើរការជាផ្លូវការប្រព័ន្ធសភាឌីជីថលនាពេលឆាប់ៗខាងមុខនេះ គឺជាការបោះជំហានយ៉ាងសំខាន់ និងជាក់ស្តែងក្នុងការអនុវត្តកម្មវិធីកំណែទម្រង់ស៊ីជម្រៅរបស់រដ្ឋសភានីតិកាលទី៧ ស្របតាមចក្ខុវិស័យដឹកនាំវែងឆ្ងាយ និងឈ្លាសវៃរបស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ក្នុងការកសាង «រដ្ឋសភាឌីជីថល (Digital Parliament)» ប្រកបដោយភាពទំនើប តម្លាភាព និងការទទួលខុសត្រូវខ្ពស់។
ប្រព័ន្ធ E-Parliament នេះ ដើរតួនាទីជាឧបករណ៍ស្នូលក្នុងការគាំទ្រដល់ការបំពេញបេសកកម្មរបស់មន្ត្រីអគ្គលេខាធិការដ្ឋានរដ្ឋសភាសម្រាប់បម្រើសេវាកម្មជូនសមាជិករដ្ឋសភា តាមរយៈការផ្ដល់ភាពងាយស្រួល ឆាប់រហ័ស ក្នុងការទាញយក និងគ្រប់គ្រងរបៀបវារៈ ឯកសារច្បាប់ និងទិន្នន័យស្រាវជ្រាវនានាបានគ្រប់ពេលវេលា និងគ្រប់ទីកន្លែង ដោយកាត់បន្ថយការប្រើប្រាស់ក្រដាស ព្រមទាំងបង្កើនប្រសិទ្ធភាពនៃការងាររដ្ឋបាល និងនីតិកម្មឱ្យកាន់តែមានសន្ទុះលឿនជាងមុន។
លើសពីនេះ ការធ្វើទំនើបកម្មប្រព័ន្ធសភាអេឡិចត្រូនិកនេះ មិនត្រឹមតែលើកកម្ពស់សមត្ថភាពស្ថាប័នក្នុងការឆ្លើយតបនឹងបរិវត្តកម្មឌីជីថលប៉ុណ្ណោះទេ ប៉ុន្តែថែមទាំងជាកម្លាំងចលករជួយពន្លឿនដល់ដំណើរការពិនិត្យ ពិភាក្សា និងអនុម័តច្បាប់ ក៏ដូចជាការតាមដានការអនុវត្តគោលនយោបាយនានាឱ្យកាន់តែចំគោលដៅ ដើម្បីបម្រើផលប្រយោជន៍ និងឆ្លើយតបទាន់ពេលវេលាចំពោះតម្រូវការជាក់ស្តែងរបស់ប្រជាពលរដ្ឋដែលជាម្ចាស់ឆ្នោត៕
