ទីក្រុងកូឡាឡាំពួរ ប្រទេសម៉ាឡេស៊ី៖ នៅថ្ងៃទី៣ ខែកញ្ញា ឆ្នាំ២០២៦ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា បានអញ្ជើញចូលរួមក្នុងកិច្ចប្រជុំជាមួយសភានិងដៃគូក្នុងតំបន់អាស៊ី-ប៉ាស៊ីហ្វ៊ិក ដោយបានសង្កត់ធ្ងន់លើការកសាង «ភាពធន់នៃប្រជាសាស្ត្រ» ដោយផ្តោតលើការផ្តល់អំណាចដល់យុវជន សមភាពយេនឌ័រ ការកែទម្រង់សេដ្ឋកិច្ចថែទាំ ការឆ្លើយតបនឹងវិបត្តិអាកាសធាតុ និងការគ្រប់គ្រងបរិវត្តកម្មឌីជីថល។
ក្នុងក្របខ័ណ្ឌការងារ UNFPA (២០២៦–២០២៩) យុវជនត្រូវបានចាត់ទុកជាកម្លាំងចលករចម្បង ដោយមានប្រទេសហ្វីលីពីនពង្រឹងការអប់រំសុខភាពផ្លូវភេទ/បន្តពូជ ឡាវទប់ស្កាត់ការបោះបង់ការសិក្សារបស់កុមារីជនបទ ឥណ្ឌាប្រើប្រាស់ AI បង្កើនកម្លាំងពលកម្មស្ត្រី និងទីម័រខាងកើតកែទម្រង់ការអប់រំ TVET ឆ្លើយតបសេដ្ឋកិច្ចបៃតង/ឌីជីថល។ ចំណែកប្រទេសដែលមានសង្គមមនុស្សចាស់ដូចជា ថៃ ម៉ាឡេស៊ី និងវៀតណាម បានផ្តោតលើការវិនិយោគលើសេដ្ឋកិច្ចថែទាំ សម្រួលសមតុល្យជីវិត-ការងារ និងពង្រឹងប្រព័ន្ធគាំពារសង្គមពេញមួយជីវិត។
ជាមួយគ្នានេះ ប្រទេសទួរគី និងអង្គការ ARROW បានជំរុញឱ្យមានការកែទម្រង់សេដ្ឋកិច្ចថែទាំ ការបង្កើតហេដ្ឋារចនាសម្ព័ន្ធគាំពារ ការបែងចែកការងារផ្ទះគ្មានប្រាក់កម្រៃឡើងវិញ និងការលុបបំបាត់ច្បាប់រើសអើងយេនឌ័រ។
លើផ្នែកវិបត្តិអាកាសធាតុ តំណាងសភាម៉ាឡេស៊ី និងអង្គការ IPPF បានកត់សម្គាល់ពីផលប៉ះពាល់ធ្ងន់ធ្ងរលើមនុស្សចាស់ កុមារី និងយុវជន ខណៈប្រទេសប៉ាគីស្ថាន និងនេប៉ាល់ បានឆ្លុះបញ្ចាំងពីអយុត្តិធម៌អាកាសធាតុដែលបង្កដោយគ្រោះមហន្តរាយធម្មជាតិ ហើយបានអំពាវនាវឱ្យមានយុត្តិធម៌អាកាសធាតុ មូលនិធិ Loss and Damage ផ្តល់ឱកាសឱ្យយុវជនអាចចូលរួមនៅក្នុងគណៈកម្មាធិការតំបន់ និងការបណ្តុះបណ្តាលជំនាញបៃតង។ ចំពោះបរិវត្តកម្មឌីជីថល អូស្ត្រាលីបានដាក់ចេញវិធានការច្បាប់កម្រិតអាយុក្រោម ១៦ ឆ្នាំលើបណ្តាញសង្គមដើម្បីការពារកុមារ រីឯកៀហ្ស៊ីស៊ីស្ថាន និងវៀតណាម បានជំរុញការបង្កើតការងារឌីជីថលសម្រាប់ស្ត្រី ការធ្វើទំនើបកម្មទិន្នន័យប្រជាជន និងការអភិវឌ្ឍ «សេដ្ឋកិច្ចប្រាក់» (Silver Economy) សម្រាប់មនុស្សចាស់ជាដើម។
ជារួម ភាពធន់នៃប្រជាសាស្ត្រទាមទារឱ្យមានការវិនិយោគលើមូលធនមនុស្ស សមភាពយេនឌ័រ បណ្តាញសុវត្ថិភាពសង្គម ការប្រើប្រាស់បច្ចេកវិទ្យាដោយទំនួលខុសត្រូវ និងការបើកផ្លូវឱ្យយុវជនចូលរួមធ្វើសេចក្តីសម្រេចចិត្តក្នុងគោលនយោបាយជាតិ និងតំបន់៕
