គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) ដឹកនាំដោយ លោកជំទាវ ឡោក ខេង ប្រធានគណៈកម្មការ បានអញ្ជើញចុះពិនិត្យស្វែងយល់ការបណ្តុះបណ្តាលនៅពហុបច្ចេកទេសខេត្តព្រៃវែង នាព្រឹកថ្ងៃទី២៧ ខែមីនា ឆ្នាំ២០២៤។
លោក ម៉ឹង វណ្ណា នាយកវិទ្យាស្ថានពហុបច្ចេកទេសបណ្តុះបណ្តាលខេត្តព្រៃវែង បានមានប្រសាសន៍ថា រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃ និងប្រកបដោយកិត្តិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាននឹងកំពុងយកចិត្តទុកដាក់យ៉ាងខ្លាំងលើវិស័យកាងារ និងបណ្តុះបណ្តាលវិជ្ជាជីវៈដើម្បីពង្រឹងការបណ្តុះបណ្តាលវិជ្ជាជីវៈអោយស្របតាមតម្រូវការទីផ្សារការងារ និងរួមចំណែកក្នុងការកាត់បន្ថយភាពក្រីក្រលើកស្ទួយជីវភាពប្រជាពលរដ្ឋអោយមានការរីកចម្រើនស្របតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧នេះ។
វិទ្យាស្ថានពហុបច្ចេកទេសខេត្តព្រៃវែងមានមន្រ្តីរាជការសរុប៤០នាក់ ស្រី៩នាក់ និងមាននិស្សិតចំនួន៤៧៣នាក់ ក្នុងនោះស្រី២០៩នាក់ និងកំពុងបណ្តុះបណ្តាលលើជំនាញកុំព្យូទ័រ ជួសជុលរថយន្ត ជាងជួសជុលអគ្គិសនី បង្រៀនផ្នែកសំអាង ។ល។ ទន្ទឹមនឹងការបណ្តុះបណ្តាលមានការរីកចម្រើន វិទ្យាស្ថានពហុបច្ចេកទេសខេត្តព្រៃវែងមានបញ្ហាប្រឈមមួយចំនួនដូចជាខ្វះគ្រូបច្ចេកទេស ខ្វះកន្លែងស្នាក់នៅរបស់និស្សិត និងសម្ភារៈបច្ចេកទេសបង្រៀនជាដើម។
លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា បានថ្លែងការកោតសរសើរ និងវាយតម្លែខ្ពស់ជូនលោក ម៉ឹង វណ្ណា នាយកវិទ្យាស្ថានពហុបច្ចេកទេសខេត្តព្រៃវែង និងមន្រ្តីរាជការទាំងអស់ ដែលបានរួមចំណែកបណ្តុះបណ្តាលធនធានមនុស្សឱ្យមានការរីកចម្រើនឡើង ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងជាការរួមចំណែកយ៉ាងធំធេងក្នុងការស្តារ អភិវឌ្ឍន៍ លើវិស័យធនធានមនុស្សអោយកាន់តែមានការរីកចម្រើនឡើងចូលរួមកាត់បន្ថយភាពក្រីក្រ។ បន្ទាប់មកគណៈប្រតិភូគណៈកម្មការទី៨ នៃរដ្ឋសភា បានអញ្ជើញធ្វើទស្សនកិច្ចមើលកន្លែងបណ្តុះបណ្តាលវិជ្ជាជីវៈផ្សេងៗផងដែរ ៕