នៅវិមានរដ្ឋសភា នៅថ្ងៃទី៦ ខែកញ្ញា ឆ្នាំ២០២៤ អគ្គលេខាធិការដ្ឋានរដ្ឋសភាបានរៀបចំ បើកវគ្គបណ្តុះបណ្តាលស្តីពី សវនកម្មលើសមិទ្ធកម្ម និងសវនកម្ម លើប្រព័ន្ធព័ត៌មានវិទ្យា ក្នុងគោលបំណងឱ្យអ្នកចូលរួមទទួលបាននូវ ការយល់ដឹងបន្ថែមអំពីភាពខុសគ្នា រវាងសវនកម្មលើកិច្ចប្រតិបត្តិការ និងសវនកម្មលើព័ត៌មាន សមិទ្ធកម្ម ឬរបាយការណ៍សមិទ្ធកម្ម និងករណីសិក្សានៃការធ្វើសវនកម្មលើព័ត៌ មានសមិទ្ធកម្មនៅក្រសួងអប់រំយុវជន និងកីឡា ក្រោមអធិបតី ឯកឧត្តម ឃួន ដាវិត អគ្គលេខាធិការរង និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈនៃអគ្គលេខាធិការដ្ឋានរដ្ឋសភា។
វគ្គបណ្តុះបណ្តាលនេះមានរយៈពេលមួយថ្ងៃ និងចូលរួមផ្តល់បទបង្ហាញ ដោយវាគ្មិន៣រូប គឺ ឯកឧត្តម សាត ពុធថាវី ប្រធាននាយកដ្ឋានសវនកម្មផ្ទៃក្នុងនៃរដ្ឋសភា លោកស្រី ឆឺយ ដាវី នាយកវិទ្យាស្ថានជាតិសវនកម្ម និងលោកបណ្ឌិត លាប ប៉ូឡូ អនុប្រធាននាយកដ្ឋានសវនកម្មទី២ នៃអាជ្ញាធរសវនកម្មជាតិ ព្រមទាំង មានសិក្ខាកាមចូលរួម ចំនួន៥០នាក់ផងដែរ។
ឯកឧត្តម សាត ពុធថាវី ប្រធាននាយកដ្ឋានសវនកម្មផ្ទៃក្នុងនៃរដ្ឋសភា បានបង្ហាញពីមូលដ្ឋានគ្រឹះសំខាន់ៗនៃសវនកម្មលើកិច្ចប្រតិបត្តិការ សវនកម្មលើព័ត៌មាន ឬរបាយការណ៍សមិទ្ធកម្ម និងសវនកម្មលើប្រព័ន្ធព័ត៌មានវិទ្យា ដែលតម្រូវឱ្យសិក្ខាកាមទាំងអស់ត្រូវខិតខំសិក្សា ស្រាវជ្រាវ ព្រមទាំងពង្រឹងសមត្ថភាព របស់ខ្លួនបន្ថែមទៀត។ គួរបញ្ជាក់ផងដែរថា វគ្គបណ្តុះបណ្តាលនេះស្ថិតនៅក្នុងផែនការបណ្តុះបណ្តាលឆ្នាំ២០២៤ របស់កម្មវិធីកែទម្រង់ការគ្រប់គ្រងហិរញ្ញវត្ថុ សាធារណៈនៃអគ្គលេខាធិការដ្ឋានរដ្ឋសភា។
ថ្លែងក្នុងពិធីបិទវគ្គបណ្តុះបណ្តាល ឯកឧត្តម ឃួន ដាវិត អគ្គលេខាធិការរងបានកោតសរសើរដល់សិក្ខាកាមទាំងអស់ ដែលបានយកចិត្តទុកដាក់ ខិតខំត្រងត្រាប់ ចាប់យកចំណេះដឹងបន្ថែម ដើម្បីពង្រឹងសមត្ថភាពបន្ថែមលើការងារសវនកម្មផ្ទៃក្នុង ប្រកបដោយចំណេះ ជំនាញច្បាស់លាស់ និងមានកិច្ចសហការល្អប្រសើរ គ្រប់ផ្នែកទាំងអស់ ព្រមទាំងអនុវត្តបានយ៉ាងរលូនជូនស្ថាប័នរដ្ឋសភា ៕