វិមានរដ្ឋសភា៖ ស្ថាប័ននីតិប្បញ្ញត្តិកំពូលនៃព្រះរាជាណាចក្រកម្ពុជា បានសម្រេចនាំយកទម្រង់សិល្បៈវប្បធម៌ខ្មែរទៅផ្សព្វផ្សាយលើឆាកអន្តរជាតិ ក្នុងឱកាសចូលរួមមហាសន្និបាតអន្តរសភាអាស៊ាន (AIPA) លើកទី៤៧ នៅរដ្ឋធានីម៉ានីល ប្រទេសហ្វីលីពីន។ ក្នុងស្មារតីនៃការត្រៀមរៀបចំផ្សព្វផ្សាយវប្បធម៌ជាតិ នៅព្រឹកថ្ងៃទី១០ ខែវិច្ឆិកា ឆ្នាំ២០២៦ ថ្នាក់ដឹកនាំព្រឹទ្ធសភា រដ្ឋសភា និងមន្ត្រីជំនាញនៃក្រសួងវប្បធម៌ និងវិចិត្រសិល្បៈ បានរៀបចំការហាត់សមសម្តែងផ្ទាល់នៅសាលបន្ទាយស្រី វិមានរដ្ឋសភា ដើម្បីធានាឱ្យទម្រង់ទស្សនីយភាពសម្តែងមានភាពរស់រវើក ហ្មត់ចត់ និងស័ក្តិសមបំផុតសម្រាប់បង្ហាញជូនគណៈប្រតិភូអន្តរជាតិ។
លើសពីការសម្តែងលើឆាក កម្ពុជាក៏គ្រោងរៀបចំឱ្យមានការរាំកម្សាន្តរួមគ្នារវាងថ្នាក់ដឹកនាំកម្ពុជា និងគណៈប្រតិភូនានាក្នុងពិធីលៀងសាយភោជន៍ផ្លូវការ ដែលជាទម្រង់នៃការទូតវប្បធម៌ទន់ភ្លន់ក្នុងការរឹតចំណងមិត្តភាពរវាងប្រទេសជាសមាជិកផងដែរ។
តបតាមការអញ្ជើញរបស់ ឯកឧត្តម ហ្វូស្ទីណូ បូជីឌី ទី៣ (Faustino "Bojie" G. Dy III) ប្រធានរដ្ឋសភានៃសាធារណរដ្ឋហ្វីលីពីន និងជាប្រធាន AIPA លើកទី៤៧ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញចូលរួមមហាសន្និបាតនេះ ចាប់ពីថ្ងៃទី១៦ ដល់ថ្ងៃទី២២ ខែវិច្ឆិកា ឆ្នាំ២០២៦។ មហាសន្និបាតឆ្នាំនេះប្រព្រឹត្តទៅក្រោមមូលបទ «សភាធានាឱ្យបាននូវអាស៊ានប្រកបដោយសន្តិភាព និងវិបុលភាព ដោយយកប្រជាពលរដ្ឋជាស្នូល» សំដៅប្រមូលផ្តុំទស្សនាទាន និងដំណោះស្រាយរួមឆ្លើយតបទៅនឹងបញ្ហាប្រឈមក្នុងតំបន់ និងពិភពលោក ដើម្បីរួមចំណែកសម្រេចឱ្យបាននូវ «ចក្ខុវិស័យសហគមន៍អាស៊ានឆ្នាំ២០៤៥»។
ក្នុងបេសកកម្មការទូតសភាដ៏មានសារៈសំខាន់នេះ សម្តេចប្រធានរដ្ឋសភានឹងចូលរួមកិច្ចប្រជុំគណៈកម្មាធិការប្រតិបត្តិ AIPA, ថ្លែងសុន្ទរកថាគន្លឹះក្នុងវេទិកាអ្នកដឹកនាំនយោបាយស្ត្រីលើកទី៣ ដើម្បីលើកកម្ពស់តួនាទីស្ត្រីក្នុងភាពជាអ្នកដឹកនាំ និងថ្លែងសេចក្តីថ្លែងការណ៍តំណាងឱ្យសភាកម្ពុជាក្នុងពិធីបើកសម័យប្រជុំពេញអង្គ ដោយគូសបញ្ជាក់អំពីជំហរការពារអធិបតេយ្យជាតិ ការថែរក្សាសន្តិភាព ស្ថិរភាព និងការជំរុញកិច្ចសហប្រតិបត្តិការអន្តរសភាឱ្យកាន់តែស៊ីជម្រៅ។
ទន្ទឹមនឹងនោះ សម្តេចក៏គ្រោងនឹងជួបពិភាក្សាការងារទ្វេភាគីជាមួយប្រធានរដ្ឋសភាហ្វីលីពីន បណ្តាប្រធានគណៈប្រតិភូប្រទេសសមាជិកអាយប៉ា និងសភាប្រទេសសង្កេតការណ៍ ព្រមទាំងចូលរួមអនុម័ត និងចុះហត្ថលេខាលើសេចក្តីថ្លែងការណ៍រួម និងពិធីផ្ទេរតំណែងប្រធាន AIPA បន្តវេនជូនប្រទេសសិង្ហបុរីផងដែរ។
ទន្ទឹមនឹងសកម្មភាពកម្រិតកំពូលរបស់ប្រធានរដ្ឋសភា ថ្នាក់ដឹកនាំជាន់ខ្ពស់នៃព្រឹទ្ធសភា និងរដ្ឋសភាកម្ពុជា ជាសមាជិកប្រតិភូក៏នឹងចូលរួមយ៉ាងសកម្មក្នុងកិច្ចប្រជុំគណៈកម្មាធិការជំនាញ AIPA រួមមាន វេទិកាសមាជិកសភាស្ត្រី (WAIPA) សមាជិកសភាវ័យក្មេង (YPA) គណៈកម្មាធិការនយោបាយ សេដ្ឋកិច្ច និងសង្គមកិច្ច ជាដើម។ តាមរយៈកិច្ចពិភាក្សាទាំងនេះ តំណាងកម្ពុជានឹងចែករំលែកធាតុចូល និងគំនិតផ្តួចផ្តើមសំខាន់ៗ សំដៅការពារផលប្រយោជន៍ជាតិ លើកកម្ពស់សិទ្ធិអំណាចស្ត្រី និងយុវជន ព្រមទាំងជំរុញការអភិវឌ្ឍសេដ្ឋកិច្ច-សង្គម ដើម្បីផលប្រយោជន៍ជាក់ស្តែងរបស់ប្រជាពលរដ្ឋកម្ពុជា និង សហគមន៍អាស៊ានទាំងមូល៕
