ឯកឧត្តម ប៉ាន សូរស័ក្តិ លេខាធិការគណៈកម្មការទី៩ នៃរដ្ឋសភា ថ្មីៗនេះ បានដឹកនាំមន្ត្រីជំនាញនៃអគ្គលេខាធិការដ្ឋានរដ្ឋសភា អញ្ជើញចូលរួមកិច្ចប្រជុំពិនិត្យវឌ្ឍនភាពការងារ ដើម្បីត្រៀមរៀបចំសិក្ខាសាលាស្តីពី «អាកាសធាតុ សន្តិភាព និងសន្តិសុខ» ព្រមទាំងទទួលដំណើរទស្សនកិច្ចរបស់គណៈប្រតិភូនៃសភាប្រើភាសាបារាំង (APF) ក្នុងឱកាសដែលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនី លើកទី២០។
កិច្ចប្រជុំនេះដឹកនាំដោយ ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា និងជាប្រធានក្រុមសភាជាតិកម្ពុជា APF ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ជាសមាជិកព្រឹទ្ធសភា ព្រមទាំងថ្នាក់ដឹកនាំ និងមន្ត្រីជំនាញនៃអគ្គលេខាធិការដ្ឋានរដ្ឋសភា និងព្រឹទ្ធសភាជាច្រើនរូប។
នៅក្នុងជំនួបនេះ អង្គប្រជុំបានផ្ដោតការយកចិត្តទុកដាក់ខ្ពស់លើការរៀបចំឱ្យបានគ្រប់ជ្រុងជ្រោយសម្រាប់សិក្ខាសាលា ដោយពិនិត្យយ៉ាងលម្អិតទាំងខ្លឹមសារឯកសារបច្ចេកទេស និងការងារបដិសណ្ឋារកិច្ច។
ទន្ទឹមនឹងនេះ ថ្នាក់ដឹកនាំ និងមន្ត្រីជំនាញ នៃស្ថាប័នទាំងពីរក៏បានពិភាក្សារៀបចំផែនការសកម្មភាពជាក់លាក់ជូនគណៈប្រតិភូ APF ក្នុងអំឡុងពេលបំពេញបេសកកម្មនៅកម្ពុជា សំដៅធានាឱ្យដំណើរទស្សនកិច្ចប្រព្រឹត្តទៅដោយរលូន សុវត្ថិភាព និងទទួលបានផ្លែផ្កាជាវិជ្ជមាន។
ទន្ទឹមគ្នានោះ អង្គប្រជុំបានបើកទូលាយឱ្យមានការផ្លាស់ប្តូរទស្សនៈ ពិគ្រោះយោបល់ និងប្រមូលធាតុចូលសំខាន់ៗពីគ្រប់ភាគីពាក់ព័ន្ធ ដើម្បីដោះស្រាយចំណុចខ្វះខាត និងបង្កើនប្រសិទ្ធភាពការងារឱ្យកាន់តែប្រសើរឡើង។
កិច្ចប្រជុំបានបិទបញ្ចប់ទៅដោយបរិយាកាសស្និទ្ធស្នាល និងពោរពេញដោយការប្តេជ្ញាចិត្តរួមគ្នា ដែលស្តែងឱ្យឃើញពីភាពសកម្ម និងសាមគ្គីភាពរវាងរដ្ឋសភានិងព្រឹទ្ធសភា ក្នុងការលើកកម្ពស់កិត្យានុភាពជាតិ ក៏ដូចជាទាញយកផលប្រយោជន៍ជាអតិបរមាជូនប្រជាពលរដ្ឋ និងប្រទេសជាតិផងដែរ។
