អតីតសមាជិកក្រុមប្រឹក្សាខេត្តស្ទឹងត្រែងខេត្តស្ទឹងត្រែង៖ នារសៀលថ្ងៃទី៣១ ខែតុលា ឆ្នាំ២០២៦ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា (គណៈកម្មការទី៣) និងជាតំណាងរាស្ត្រមណ្ឌលខេត្តស្ទឹងត្រែង បានចាត់ លោក ស៊ី សួន អភិបាលរងខេត្តស្ទឹងត្រែង ជាតំណាង អមដំណើរដោយថ្នាក់ដឹកនាំ និងមន្ត្រីស្នាក់ការរដ្ឋសភាប្រចាំមណ្ឌលខេត្តស្ទឹងត្រែង នាំយកសារលិខិតចូលរួមរំលែកទុក្ខ ព្រមទាំងបច្ច័យបុណ្យ ទៅប្រគល់ជូនគ្រួសារសព លោក ម៉ៅ សារឿន ( ហៅ ទូច ម៉េង) អតីត សមាជិក ក្រុមប្រឹក្សា សង្កាត់ ស្ទឹងត្រែង ក្នុង ក្រុង ស្ទឹងត្រែង ខេត្ត ស្ទឹងត្រែង។
លោក ម៉ៅ សារឿន បានទទួលមរណភាពកាលពីវេលាម៉ោង ១:៤០នាទីទៀបភ្លឺ ថ្ងៃទី៣០ ខែតុលា ឆ្នាំ២០២៦ ក្នុងជន្មាយុ ៧៧ឆ្នាំ ដោយរោគាពាធ។ ក្នុងឱកាសប្រកបដោយសមានទុក្ខដ៏ក្រៀមក្រំនេះ គណៈប្រតិភូតំណាងបានសម្តែងនូវការសោកស្តាយ និងក្តីអាឡោះអាល័យជាទីបំផុតជាមួយក្រុមគ្រួសារ ចំពោះការបាត់បង់បិតា បិតាក្មេក និងជីតាជាទីគោរពស្រឡាញ់ ព្រមទាំងបានរួមគ្នាបួងសួងឧទ្ទិសកុសលជូនដួងវិញ្ញាណក្ខន្ធ លោក ម៉ៅ សារឿន សូមបានទៅកាន់សុគតិភពកុំបីឃ្លៀងឃ្លាតឡើយ។
តំណាងក្រុមគ្រួសារសព ក៏បានថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តមសន្តិបណ្ឌិត ឡូយ សុផាត ព្រមទាំងក្រុមការងារ ដែលបានយកចិត្តទុកដាក់ និងចាត់តំណាងនាំយកសាររំលែកទុក្ខព្រមទាំងបច្ច័យបុណ្យមកចូលរួមនាពេលនេះ៕