វិមានរដ្ឋសភា៖ ដើម្បីពង្រឹងសុវត្ថិភាពព័ត៌មានស្ថាប័នក្នុងយុគសម័យឌីជីថល អគ្គលេខាធិការដ្ឋានរដ្ឋសភា តាមរយៈនាយកដ្ឋានព័ត៌មាន នៃអគ្គនាយកដ្ឋានទំនាក់ទំនងអន្តរជាតិពិធីការនិងព័ត៌មាន នៅព្រឹកថ្ងៃទី០៨ ខែតុលា ឆ្នាំ២០២៦នេះ បានរៀបចំវគ្គបណ្តុះបណ្តាលស្តីពី «ជំនាញសន្តិសុខសាយប័រ សម្រាប់ការគ្រប់គ្រងគេហទំព័រ និងបណ្តាញសង្គម» ជូនដល់ថ្នាក់ដឹកនាំ និងមន្ត្រីរាជការនៃអគ្គលេខាធិការដ្ឋានរដ្ឋសភា ក្រោមអធិបតីភាព ឯកឧត្តមបណ្ឌិត កែវ ពិសិដ្ឋ អគ្គលេខាធិការរងប្រចាំការ និងជានាយកខុទ្ទកាល័យសម្តេចមហារដ្ឋសភាធិការធិបតី ប្រធានរដ្ឋសភា។

ឯកឧត្តមបណ្ឌិត កែវ ពិសិដ្ឋ បានគូសបញ្ជាក់ថា ការពង្រឹងសន្តិសុខសាយប័រគឺជាកិច្ចការអាទិភាពចម្បង ស្របតាមក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា។ ឯកឧត្តមបានសង្កត់ធ្ងន់ថា ការវិវត្តយ៉ាងឆាប់រហ័សនៃបច្ចេកវិទ្យាទាមទារឱ្យមន្ត្រីគ្រប់រូបត្រូវតែអភិវឌ្ឍសមត្ថភាពជាប្រចាំ ប្រកាន់ខ្ជាប់នូវស្មារតីទទួលខុសត្រូវខ្ពស់ក្នុងការប្រើប្រាស់ឧបករណ៍ឌីជីថល និងត្រូវមានយន្តការវាយតម្លៃលទ្ធផលច្បាស់លាស់ក្រោយវគ្គបណ្តុះបណ្តាល ដើម្បីធានាប្រសិទ្ធភាពការងារជាក់ស្តែង។

វគ្គបណ្តុះបណ្តាលនេះទទួលបានការធ្វើបទបង្ហាញពិសេសពី ឯកឧត្តមបណ្ឌិត ហេង ភក្តី ទីប្រឹក្សាសម្តេចប្រធានរដ្ឋសភា និងជាអតីតនាយកថ្នាក់តំបន់នៃក្រុមហ៊ុន Meta។

ឯកឧត្តមវាគ្មិនបានចែករំលែកនូវចំណេះដឹងស៊ីជម្រៅ ព្រមទាំងយុទ្ធសាស្ត្របច្ចេកទេសជាក់ស្តែងក្នុងការការពារគណនីបណ្តាញសង្គមសំខាន់ៗ ដូចជា Facebook និង Telegram ឱ្យចៀសផុតពីការលួចទិន្នន័យ និងការវាយប្រហារសាយប័រដែលមានទម្រង់កាន់តែស្មុគស្មាញនាពេលបច្ចុប្បន្ន។

សូមបញ្ជាក់ដែរថា ការបណ្តុះបណ្តាលនេះឆ្លុះបញ្ចាំងពីការប្តេជ្ញាចិត្តឥតឈប់ឈររបស់អគ្គលេខាធិការដ្ឋានរដ្ឋសភា ក្នុងការលើកកម្ពស់មូលធនមនុស្ស ដោយស្ថាប័នតែងរៀបចំវគ្គបណ្តុះបណ្តាលជំនាញផ្សេងៗមិនតិចជាង ២០លើក ជារៀងរាល់ឆ្នាំ សំដៅធានាឱ្យបាននូវការបំពេញភារកិច្ចប្រកបដោយគុណភាព សុវត្ថិភាព និងប្រសិទ្ធភាពខ្ពស់ជូនស្ថាប័ននីតិប្បញ្ញត្តិដើម្បីឆ្លើយតបបម្រើផលប្រយោជន៍ជាតិនិងប្រជាជន៕