ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរងរដ្ឋសភានិងជាប្រធានក្រុមទីប្រឹក្សា ក្នុងឱកាសធ្វើបាឋកថាស្តីពី «ការកសាងសមត្ថភាពរបស់រដ្ឋ» ចំពោះមុខសិក្ខាកាមជាមន្ត្រីអគ្គលេខាធិកា រដ្ឋានរដ្ឋសភាចូលរួមប្រមាណ ៥០ នាក់ នៅល្ងាចថ្ងៃទី ៦ ខែ តុលាឆ្នាំ ២០២៦ នេះ បានសង្កត់ធ្ងន់ថាការធ្វើកំណែទម្រង់ស្ថាប័នរដ្ឋឱ្យទទួលបានជោគជ័យពិតប្រាកដ ចាំបាច់ត្រូវជៀសវាងនូវអន្ទាក់ «ពេកទាំង៤» និងបញ្ហា «ភាពជោគជ័យតែសម្បកក្រៅ» ដែលមើលទៅស្ថាប័នមានដំណើរការល្អ តែជាក់ស្តែងពុំទទួលបានលទ្ធផលផ្លែផ្កានោះឡើយ។

ឯកឧត្តមបណ្ឌិតបានគូសរំលេចថា គម្លាតរវាងការដាក់ចេញគោលនយោបាយ និងសមត្ថភាពអនុវត្តជាក់ស្តែង គឺជាដើមចមចម្បងដែលធ្វើឱ្យលទ្ធផលមិនឆ្លើយតបនឹងការរំពឹងទុក។ ហេតុនេះ ការធ្វើកំណែទម្រង់ត្រូវតែស្របនឹងសមត្ថភាពជាក់ស្តែង ដោយជៀសវាងដាច់ខាតនូវបញ្ហា «ពេកទាំង៤» រួមមាន៖ ការងារច្រើនពេក លឿនពេក ផ្លាស់ប្តូរញឹកញាប់ពេក និងសមត្ថភាពទាបពេក។

ផ្ទុយទៅវិញ អ្នកដឹកនាំការធ្វើកំណែទម្រង់គួរជ្រើសរើសអភិក្រមចាប់ផ្តើមពីការងារណាដែលងាយស្រួល និងអាចសម្រេចបានលទ្ធផលជាមុន ។

ទន្ទឹមនឹងការបែងចែកឱ្យដាច់ស្រឡះរវាងទម្រង់ និងមុខងារពិតប្រាកដរបស់ស្ថាប័ន ព្រមទាំងបង្កើតយន្តការតាមដាននិងវាយតម្លៃ (M&E) ឱ្យបានច្បាស់លាស់។

បន្ថែមលើសពីនេះ កំណែទម្រង់ដែលមានចីរភាពទាមទារឱ្យមានការចូលរួមពីមន្ត្រីគ្រប់ជាន់ថ្នាក់ក្រោមស្មារតី «ក្មេងមានកម្លាំង ចាស់ស្គាល់ផ្លូវ» រួមជាមួយនឹងការធ្វើប្រតិភូកម្មអំណាច ការចែករំលែកព័ត៌មាន និងការបែងចែកការងារឱ្យចំជំនាញនិងសមត្ថភាព។

ជាមួយគ្នានេះ ឯកឧត្តមបណ្ឌិត ឈាង វណ្ណារិទ្ធ ក៏បានសង្កត់ធ្ងន់បន្ថែមទៀតថា ស្ថាប័នត្រូវបញ្ជ្រាបអក្ខរកម្មឌីជីថល និងនវានុវត្តន៍ទៅក្នុងវប្បធម៌ការងារ ដើម្បីមានភាពក្លាហានក្នុងការស្វែងរកឫសគល់នៃបញ្ហា សាកល្បងដំណោះស្រាយថ្មីៗ និងសម្របខ្លួនឱ្យបានទាន់ពេលវេលា សំដៅដោះស្រាយបញ្ហាបានចំគោលដៅ និងធានាបាននូវប្រសិទ្ធភាពការងារខ្ពស់ផងដែរ៕