អារ៉ូហ្សា ប្រទេសតង់ហ្សានី៖ ឯកឧត្តម ទី សុគន្ធ លេខាធិការគណៈកម្មការទី៥ នៃរដ្ឋសភា នៅព្រឹកថ្ងៃទី៦ ខែតុលា ឆ្នាំ ២០២៦ បានអញ្ជើញចូលរួមកិច្ច ប្រជុំគណៈកម្មាធិការអចិន្ត្រៃយ៍ស្តីពីលទ្ធិប្រជាធិបតេយ្យ និងសិទ្ធិមនុស្ស (Standing Committee on Democracy and Human Rights) នៃមហាសន្និបាតសហភាពអន្តរសភា លើកទី១៥៣ (153rd IPU Assembly) ដែលប្រព្រឹត្តទៅនៅទីក្រុងអារ៉ូហ្សា ប្រទេសតង់ហ្សានី។

កិច្ចប្រជុំនេះបានពិភាក្សាលើរបៀបវារៈសំខាន់ៗ រួមមាន ការអនុម័តកំណត់ហេតុនៃកិច្ចប្រជុំលើកមុន ដែលបានប្រព្រឹត្តទៅនៅទីក្រុងអ៊ីស្តង់ប៊ុល ប្រទេសតួកគីយេ កាលពីខែមេសា ឆ្នាំ២០២៦ ការរៀបចំសេចក្តីព្រាងសេចក្តីសម្រេចស្តីពី «ការអភិវឌ្ឍសង្គមប្រកបដោយបរិយាបន្នសម្រាប់ទាំងអស់គ្នា៖ យុទ្ធសាស្ត្រសភាដើម្បីលើកកម្ពស់សិទ្ធិ និងការផ្តល់ភាពអង់អាចដល់ជនមានពិការភាព» ការត្រៀមរៀបចំសម្រាប់មហាសន្និបាតនាពេលអនាគត ព្រមទាំងការបោះឆ្នោតជ្រើសរើសតំណាងថ្នាក់ដឹកនាំការិយាល័យគណៈកម្មាធិការអចិន្ត្រៃយ៍។

ក្នុងឱកាសនោះ ឯកឧត្តម ទី សុគន្ធ បានចូលរួមយ៉ាងសកម្មក្នុងការផ្តល់ធាតុចូល និងការពារទស្សនៈរបស់សភាកម្ពុជាដើម្បីរួមចំណែក កែលម្អសេចក្តីព្រាងសេចក្តីសម្រេចខាងលើ ជាមួយបណ្តាសភាសមាជិកសហភាពអន្តរសភា (IPU) ព្រមទាំងបានចូលរួមថ្លែងបទអន្តរាគមន៍ក្នុងកិច្ចប្រជុំផងដែរ។

ក្នុងបទអន្តរាគមន៍ ឯកឧត្តមបានគូសបញ្ជាក់ពីការយកចិត្តទុកដាក់ និងការគាំទ្ររបស់រាជរដ្ឋាភិបាលកម្ពុជា ចំពោះការលើកកម្ពស់សិទ្ធិ និងភាពអង់អាចរបស់ជនមានពិការភាព ស្របតាមគោលការណ៍ «មិនបោះបង់ចោលនរណាម្នាក់ឡើយ» (Leave No One Behind) តាមរយៈការជំរុញអនុវត្តផែនការយុទ្ធសាស្ត្រជាតិ ស្តីពីជនមានពិការភាព និងការលើកកម្ពស់បរិយាបន្ននៅក្នុងសង្គម។

ជាមួយគ្នានេះ ឯកឧត្តមបានបញ្ជាក់ពីតួនាទីដ៏សំខាន់របស់សភា តាមរយៈការរៀបចំ និងពិនិត្យច្បាប់ ព្រមទាំងការត្រួតពិនិត្យការអនុវត្តគោលនយោបាយ ដើម្បីធានាការលើកកម្ពស់ ការការពារសិទ្ធិ និងការផ្តល់ភាពអង់អាចដល់ជនមានពិការភាព ឱ្យទទួលបានឱកាស និងការចូលរួមពេញលេញក្នុងសង្គម។

ឯកឧត្តមក៏បានលើកឡើងអំពីការយកចិត្តទុកដាក់របស់កម្ពុជា ចំពោះបញ្ហាប្រឈមរបស់ប្រជាពលរដ្ឋដែលរងផលប៉ះពាល់ពីស្ថានការណ៍តាមបណ្តោយព្រំដែនកម្ពុជា-ថៃ និងកិច្ចខិតខំប្រឹងប្រែងរបស់កម្ពុជា ក្នុងការដោះស្រាយបញ្ហាប្រឈមទាំងនេះ ដោយផ្តោតលើការការពារសិទ្ធិ សុវត្ថិភាព និងសុខុមាលភាព របស់ប្រជាពលរដ្ឋ។