នៅសាលាខេត្តកោះកុង នាព្រឹកថ្ងៃទី២៩ ខែមករា ឆ្នាំ២០២៤ គណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្រ្ត បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា (គណៈកម្មការទី៩) ដឹកនាំដោយ លោកជំទាវ និន សាផុន ប្រធានគណៈកម្មការ រួមជាមួយតំណាងរាស្ត្រមណ្ឌលខេត្តកោះកុង បានអញ្ជើញជួបប្រជុំជាមួយថ្នាក់ដឹកនាំរដ្ឋបាលខេត្តកោះកុង ដឹកនាំដោយឯកឧត្តម ឈេង សុវណ្ណដា អភិបាលរង នៃគណៈអភិបាលខេត្តកោះកុង។
លោកជំទាវ និន សាផុន ប្រធានគណៈកម្មការទី៩នៃរដ្ឋសភា បានជម្រាបជូនកិច្ចប្រជុំថា ការចុះបំពេញបេសកកម្មនៅមូលដ្ឋានខេត្តកោះកុង នាពេលនេះ គឺដើម្បីជួបពិភាក្សាការងារជាមួយថ្នាក់ដឹកនាំរដ្ឋបាលខេត្ត និងមន្ទីរអង្គភាពជំនាញដែលពាក់ព័ន្ធនឹងសមត្ថកិច្ចរបស់គណៈកម្មការទី៩ ក្នុងគោល-បំណងឈ្វេងយល់ពីកិច្ចការមួយចំនួនពីលទ្ធផលការងារសំខាន់ៗរបស់រដ្ឋបាលខេត្តដែលសម្រេចបាន ប្រសិទ្ធភាពនៃការប្រតិបត្តិច្បាប់ និងលិខិតបទ-ដ្ឋានគតិយុត្តនានា ដែលពាក់ព័ន្ធនឹងសមត្ថកិច្ចទទួលខុសត្រូវរបស់មន្ទីរជំនាញ តើការអនុវត្តច្បាប់ទាំងឡាយ ដែលរដ្ឋសភាបានអនុម័តរួចហើយ ជួបប្រទះនូវការលំបាក និងមានបញ្ហាប្រឈមអ្វីខ្លះ?
លោកជំទាវ និន សាផុន បានបញ្ជាក់ថា កិច្ចប្រជុំនេះមិនមែនជាការចុះមកត្រួតពិនិត្យ អធិការកិច្ច ឬសួរដេញដោលថ្នាក់ដឹកនាំរដ្ឋបាលខេត្ត និងមន្ទីរអង្គភាពជំនាញនោះទេ គោលបំណងសំខាន់គឺឈ្វេងយល់ ដើម្បីប្រមូលព័ត៌មាន និងបញ្ហាប្រឈមនានាក្នុងការប្រតិបត្តិច្បាប់នៅមូលដ្ឋាន ដើម្បីរួមសហការគ្នារវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ ជំរុញការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។
ឯកឧត្តម ឈេង សុវណ្ណដា អភិបាលរង នៃគណៈអភិបាលខេត្តកោះកុង បានធ្វើសេចក្តីរាយការណ៍ជូនកិច្ចប្រជុំពីលទ្ធផលការងារដែលសម្រេចបាន និងទិសដៅការងារបន្ត ពាក់ព័ន្ធនិងវិស័យសាធារណការដឹកជញ្ជូន វិស័យប្រៃសណីយ៍ទូរគមនាគមន៍ វិស័យឧស្សាហកម្ម វិស័យរ៉ែថាមពល វិស័យពាណិជ្ជកម្ម វិស័យដែនដី និងវិស័យការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ជូនដល់គណៈកម្មការទី៩ នៃរដ្ឋសភា។
ក្រៅពីលទ្ធផលសម្រេចខេត្តកោះកុងបញ្ហាប្រឈមមួយចំនួន នៅតាមបណ្តាភូមិដាច់ស្រយាលខ្លះនៅពុំទាន់បណ្តាញទឹកស្អាត អគ្គិសនី ប្រើប្រាស់ឱ្យបានល្អគ្រប់គ្រាន់នៅឡើយ ប្រជាពលរដ្ឋមួយចំនួនធំពុំទាន់បានទទួលប័ណ្ណកម្មសិទ្ធិដីធ្លី បញ្ហាទំនាស់ដីធ្លីរវាងប្រជាពលរដ្ឋ និងក្រុមហ៊ុនវិនិយោគអភិវឌ្ឍន៍ ឯកជន កាប់ទន្ទ្រានដីរដ្ឋរធ្វើជាកម្មសិទ្ធិផ្ទាល់ខ្លួន នៅតែបន្តកើតមាននៅមូលដ្ឋាន លំនៅឋានមួយចំនួនក្នុងទីប្រជុំជនមិនមានសណ្តាប់ធ្នាប់សោភណ្ឌភាពល្អ ពុំទាន់មានប្រព័ន្ធប្រព្រឹត្តកម្មទឹកកក់។ ជាមួយគ្នានោះ ឯកឧត្តម ឈេង សុវណ្ណដា បានសំណូមពរសុំទៅក្រសួងស្ថាប័ន ដៃគូរអភិវឌ្ឍជួយស្ថាបនាប្រព័ន្ធប្រព្រឹត្តកម្មទឹកកខ្វក់នៅក្នុងខេត្ត។
បន្ទាប់ពីបានស្តាប់នូវសេចក្តីរាយការណ៍របស់រដ្ឋបាលខេត្តកោះកុងរួចមក លោកជំទាវ និន សាផុន ប្រធានគណៈកម្មការទី៩ នៃរដ្ឋសភា បានសម្តែង កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំខេត្តគ្រប់លំដាប់ថ្នាក់ ដោយរួមទាំងមន្ត្រីរាជការ និងកងកម្លាំងប្រដាប់អាវុធទាំងអស់ ដែលបានសហការសាមគ្គីរួមគ្នាជាធ្លុងមួយបានយ៉ាងល្អ ខិតខំយកអស់កម្លាំងកាយចិត្ត ប្រាជ្ញាស្មារតី និងធនធាន យកចិត្តទុកដាក់បំពេញការងារ និងតួនាទីប្រកបដោយវិជ្ជាជីវៈ និងប្រកបដោយការ ទទួលខុសត្រូវខ្ពស់ រហូតឈានទៅសម្រេចបាននូវសមិទ្ធផលនានាជាច្រើនជូនប្រជាពលរដ្ឋក្នុងទូទាំងខេត្ត ៕
អត្ថបទ និងរូបភាព ដោយនាយកដ្ឋានព័ត៌មាន