គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) ដឹកនាំដោយ លោកជំទាវ ឡោក ខេង ប្រធានគណៈកម្មការ និងមានការចូលរួមពីតំណាងរាស្ត្រមណ្ឌលរាជធានីភ្នំពេញផងដែរ នៅរសៀលថ្ងៃទី២២ ខែមករា ឆ្នាំ២០២៤ បានអញ្ជើញជួបប្រជុំពិភាក្សាជាមួយ ឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ និងឯកឧត្តម លោកជំទាវអភិបាលរងនៃគណៈអភិបាលរាជធានីភ្នំពេញ ព្រមទាំងមន្ទីរពាក់ព័ន្ធ ដើម្បីស្វែងយល់អំពីប្រសិទ្ធភាពការងារ និងបញ្ហាប្រឈម របស់រដ្ឋបាលរាជធានីភ្នំពេញ នៅក្នុងនីតិកាលទី៧ នៃរដ្ឋសភា នៅសាលារាជធានីភ្នំពេញ។
លោកជំទាវ ឡោក ខេង ប្រធានគណៈកម្មការ បានមានប្រសាសន៍ថា ក្នុងនីតិកាលទី៧ នៃរដ្ឋសភា ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដោយផ្តោតសំខាន់លើកំណើនការងារ សមធម៌ ប្រសិទ្ធភាព និងចីរភាព ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជា នាឆ្នាំ២០៣០ និងឆ្នាំ២០៥០។
លោកជំទាវ ឡោក ខេង បានបន្តទៀតថា គោលនយោបាយបញ្ចកោណដំណាក់កាលទី១ កម្មវិធីអាទិភាពទាំង៦ និងអភិក្រមទាំង៥ «មនុស្ស ផ្លូវ ទឹក ភ្លើង និងបច្ចេកវិទ្យា» នៅក្នុងបញ្ចកោណទី១ ការអភិវឌ្ឍមូលធនមនុស្ស មុំទី៤ ការពង្រឹងប្រព័ន្ធគាំពារសង្គមគឺបង្ហាញពីការកសាង និងការអភិវឌ្ឍប្រព័ន្ធគាំពារសង្គម ឱ្យមានលក្ខណៈប្រមូលផ្តុំ និងសង្គតិភាព ទាំងក្នុងប្រព័ន្ធជំនួយសង្គម និងប្រព័ន្ធសន្តិសុខសង្គម។ បន្ថែមពីលើនេះទៀត ក៏មានលិខិតបទដ្ឋានជាច្រើនទៀត ដែលសុទ្ធសឹងគាំទ្រដល់ការអភិវឌ្ឍប្រព័ន្ធគាំពារសង្គម ជាពិសេសប្រព័ន្ធសន្តិសុខសង្គម ដែលបានចូលរួមចំណែកលើកកម្ពស់កម្រិតជីវភាពរបស់ប្រជាពលរដ្ឋកម្ពុជា និងចូលរួមកាត់បន្ថយភាពក្រីក្រ។
ឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ បានមានប្រសាសន៍ឲ្យដឹងថា សាលាក្រុងបានអនុវត្តតាមយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ និងប្រើយន្តការជាច្រើនជាបន្តបន្ទាប់ ដើម្បីជួយសម្រួលដោះស្រាយដល់មន្ទីរទាំង៤ ដែលពាក់ព័ន្ធជាមួយគណៈកម្មការទី៨នៃរដ្ឋសភាទទួលបន្ទុក ដោយផ្តោតជាចម្បងលើការពង្រឹងពង្រីកក្រមសីលធម៌សង្គម ពង្រឹងសមត្ថភាពផ្តល់សេវាសុខភាពសាធារណៈនៅតាមមូលដ្ឋាន ការពង្រឹងសមត្ថភាពប្រជាពលរដ្ឋ តាមរយៈការបណ្តុះបណ្តាលជំនាញផ្សេងៗ នៅតាមវិទ្យាស្ថាន និងសាលារៀន សម្រាប់ឲ្យប្រជាពលរដ្ឋមានលទ្ធភាព និងបង្កលក្ខណៈងាយស្រួលស្វែងរកការងារធ្វើ និងទទួលបានថវិកាខ្ពស់។
ឯកឧត្តម ម៉ប់ សារិន បានបង្ហាញនូវយន្តការដោះស្រាយបញ្ហាប្រឈមជាច្រើនដែលបានជួបប្រទះ ជូនគណៈប្រតិភូគណៈកម្មការទី៨ នៃរដ្ឋសភា និងលើកពីចំណុចខ្លាំង ចំណុចខ្សោយ មួយចំនួន របស់មន្ទីរទាំង៤ ដែលបានជួបប្រទះ ព្រមទាំងអនុវត្តបានជោគជ័យនាពេលកន្លងមក។
បន្ទាប់ពីបានស្តាប់របាយការណ៍របស់ ឯកឧត្តម ម៉ប់ សារិន និងមន្ទីរទាំង៤ រួចមក លោកជំទាវ ឡោក ខេង បានថ្លែងអំណរគុណយ៉ាងជ្រាលជ្រៅ និងកោតសរសើរចំពោះឯកឧត្តមប្រធានក្រុមប្រឹក្សារាជធានី និងសហការី ព្រមទាំងប្រធានមន្ទីរទាំង៤ ដែលខិតខំយកចិត្តទុកដាក់ក្នុងការបម្រើប្រជាពលរដ្ឋ។ លោកជំទាវបានស្នើសុំឱ្យរដ្ឋបាលរាជធានីភ្នំពេញ ជួយផ្សព្វផ្សាយឲ្យបានផុលផុសពីបញ្ហាជំងឺមិនឆ្លង ដែលជាឃាតករលាក់មុខ សម្លាប់ប្រជា-ពលរដ្ឋប្រមាណ២០០នាក់ក្នុងមួយថ្ងៃជូនដល់ប្រជាពលរដ្ឋ ឲ្យបានយល់ដឹងជ្រួតជ្រាប តាមរយៈការណែនាំ ការលើកស្លាកផ្សព្វផ្សាយតាមទីសាធារណៈ មណ្ឌលសុខភាព និងតាមមន្ទីរពេទ្យបង្អែកជាដើម។
លោកជំទាវ បានបន្តទៀតថា រាល់បញ្ហាប្រឈម និងសំណូមពរជាច្រើនរបស់មន្ទីរទាំង៤ ដែលបានលើកឡើង គណៈកម្មការនឹងពាំនាំយកទៅពិភាក្សាជាមួយស្ថាប័នពាក់ព័ន្ធ ស្វែងរកដំណោះស្រាយជូនមន្ទីរ ដើម្បីបង្កលក្ខណៈងាយស្រួលក្នុងការបម្រើប្រជាពលរដ្ឋ។
បន្ទាប់មក គណៈកម្មការទី៨ នៃរដ្ឋសភា ក៏បានចុះពិនិត្យមើលមណ្ឌលសុខភាពសំរោងក្រោម និងបន្តទៅមើលវិទ្យាស្ថានពហុបច្ចេកទេសកម្ពុជា-កូរ៉េ ផងដែរ ៕
អត្ថបទ និងរូបភាព ដោយនាយកដ្ឋានព័ត៌មាន