នៅវិមានរដ្ឋសភា នារសៀលថ្ងៃទី១០ ខែមករា ឆ្នាំ២០២៤ លោកជំទាវ Liurka Rodriguez Barrios ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋគុយបា ប្រចាំនៅព្រះរាជាណាចក្រកម្ពុជា ដែលចប់អាណត្តិ បានអញ្ជើញចូលជួបសម្តែងការគួរសម និងជម្រាបលា លោកជំទាវ និន សាផុន ប្រធានក្រុមមិត្តភាពរដ្ឋសភាកម្ពុជា-គុយបា និងជាប្រធានគណៈកម្មការទី៩ នៃរដ្ឋសភា។
លោកជំទាវឯកអគ្គរដ្ឋទូតគុយបា បានសម្តែងនូវការអរគុណចំពោះរដ្ឋសភាកម្ពុជា និងក្រុមមិត្តភាពរដ្ឋសភាកម្ពុជា-គុយបា ដែលបានគាំទ្រគ្រប់បែបយ៉ាងក្នុងអំឡុងពេលបេសកកម្មការទូតរបស់លោកជំទាវនៅកម្ពុជា ដែលជំរុញឱ្យទំនាក់ទំនង និងកិច្ចសហប្រតិបត្តិការរវាងប្រទេសទាំងពីរកម្ពុជា-គុយបា មានការរីកចម្រើន។ ជាមួយគ្នានេះ លោកជំទាវ ក៏បានវាយតម្លៃខ្ពស់ចំពោះការរីកចម្រើន និងការអភិវឌ្ឍយ៉ាងឆាប់រហ័សលើគ្រប់វិស័យនៅកម្ពុជា។
លោកជំទាវ និន សាផុន បានលើកឡើងថា ការបំពេញបេសកកម្មការទូតរបស់លោកជំទាវឯកអគ្គរដ្ឋទូតគុយបា អស់រយៈពេលមួយអាណត្តិនៅកម្ពុជា គឺពិតជាបានឆ្លុះបញ្ចាំងពីទំនាក់ទំនង ចំណងការទូត និងកិច្ចសហប្រតិបត្តិការដ៏ចំណាស់របស់ប្រទេសយើងទាំងពីរ (កម្ពុជា-គុយបា) ដែលមានតាំងពីឆ្នាំ១៩៦០ និងបានបន្តពូនជ្រំតាំងពីថ្នាក់ដឹកនាំរបស់យើងនាសម័យមុន រហូតដល់បច្ចុប្បន្ន ដោយបានខិតខំពង្រឹងពង្រីកទៅមុខបន្ថែមទៀតសម្រាប់យុវជនបន្តវេនជំនាន់ក្រោយ ឱ្យកាន់តែយល់ពីមានសារៈសំខាន់នេះទ្វេឡើងថែមទៀត។
លោកជំទាវ និន សាផុន បានសម្តែងនូវសេចក្តីពេញចិត្ត និងវាយតម្លៃខ្ពស់ចំពោះចំណងការទូតសាមគ្គីភាពជាប្រពៃណី និងកិច្ចសហប្រតិបត្តិការរវាងប្រទេសទាំងពីរ ដែលជាគុណប្រយោជន៍នៃការអភិវឌ្ឍប្រទេសប្រកបដោយចីរភាព ស្ថេរភាពក្នុងតំបន់ និងលើពិភពលោក និងជឿជាក់ថាកិច្ចសហប្រតិបត្តិការនេះ ជាមរតកដ៏មានតម្លៃដល់យុវជនជំនាន់ក្រោយរបស់យើង នឹងបន្តថែរក្សានិងជួយគ្រាំទ្រគ្នាទៅវិញទៅមកក្នុងគ្រប់កាលៈទេសៈ។
លោកជំទាវ និន សាផុន ក៏បានថ្លែងអំណរគុណដល់ប្រមុខដឹកនាំរដ្ឋាភិបាលគុយបា ដែលតែងតែជួយឧបត្ថម្ភគាំទ្រកម្ពុជាក្នុងពេលកម្ពុជាជួបការលំបាក ហើយមកដល់បច្ចុប្បន្ននេះ គុយបានៅតែបន្តជួយដល់កម្ពុជាទាំងផ្នែកសុខាភិបាល និងជួយបណ្តុះបណ្តាលធនធានមនុស្សដល់កម្ពុជា និងវិស័យផ្សេងៗទៀតផងដែរ។
អត្ថបទ និងរូបភាព ដោយនាយកដ្ឋានព័ត៌មាន