នៅក្នុងឱកាសអញ្ជើញដឹកនាំគណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាល- វិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) ចុះបំពេញបេសកកម្មនៅខេត្តកែប នារសៀលថ្ងៃទី១៥ ខែមីនា ឆ្នាំ២០២២ ឯកឧត្តម ប៉ាល់ សំឣឿន ដែលជាឣនុប្រធាននៃគណៈកម្មការនេះ បានថ្លែងកោតសរសើរ និងវាយតម្លៃខ្ពស់ចំពោះការខិតខំប្រឹងប្រែង របស់អាជ្ញាធរខេត្ត ក្នុងការជួយសម្រួលរាល់ការលំបាករបស់ប្រជាពលរដ្ឋនៅក្នុងមូលដ្ឋាន និងបានជំរុញឲ្យរដ្ឋបាលខេត្ត ខិតខំធ្វើការ ផ្សព្វផ្សាយ អប់រំប្រជាពលរដ្ឋ ពីការថែរក្សាសុខភាព ការការពារខ្លួនពីជំងឺផ្សេងៗ ពិសេសជំងឺកូវីដ-១៩ និងជំងឺមិនឆ្លងនានា ជាដើម។

ឯកឧត្តម ប៉ាល់ សំឣឿន បានមានប្រសាសន៍ដូចខាងលើនេះ គឺបន្ទាប់ពីឯកឧត្តម និងគណៈប្រតិភូ បានជួបប្រជុំ និងស្ដាប់នូវការ- រាយការណ៍របស់រដ្ឋបាលខេត្ត ដឹកនាំដោយ ឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែប ឯកឧត្តម សំ សារីន ប្រធាន ក្រុមប្រឹក្សាខេត្តកែប ព្រមទាំងលោក លោកស្រីប្រធានមន្ទីរជំនាញទាក់ទងនឹងវិស័យទទួលបន្ទុករបស់គណៈកម្មការ នៅសាលប្រជុំ នៃ សាលាខេត្តកែប។

ឯកឧត្តម ប៉ាល់ សំឣឿន ក៏បានបង្ហាញនូវការពេញចិត្តចំពោះរដ្ឋបាលខេត្ត ដែលបានធ្វើការផ្សព្វផ្សាយ និងផ្តល់វ៉ាក់សាំងការពារជំងឺ ១១មុខ ដល់កុមារ ព្រមទាំងខិតខំឣនុវត្តគោលនយោបាយជាតិគាំពារសង្គម ប្រពន្ធ័សន្តិសុខសង្គម និងគោលនយោបាយកាត់បន្ថយ ភាពក្រីក្រ ការឣភិវឌ្ឍសេដ្ឋកិច្ចសង្គម ពិសេសការឣនុវត្ត តាមគោលនយោបាយចតុកោណរបស់រាជរដ្ឋាភិបាល ព្រមទាំងទាក់ទាញ វិនិយោគិនអោយមកបណ្តាក់ទុននៅក្នុងខេត្ត មានចំនួនកាន់តែច្រើនឡើង ដើម្បីបង្កើតការងារធ្វើជូនប្រជាពលរដ្ឋ។

សូមជម្រាបថា នៅក្នុងឱកាសជួបប្រជុំជាមួយគណៈប្រតិភូរដ្ឋសភានោះ ឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែប និងមន្ទីជំនាញពាក់ព័ន្ធ បានមានប្រសាសន៍ជំរាបជូនគណៈប្រតិភូពីវឌ្ឍនភាពការងារ និងភាពរីកចម្រើនរបស់ខេត្ត ដែលអាជ្ញាធរខេត្ត បានខិតខំធ្វើឱ្យសេដ្ឋកិច្ច និងជីវភាពរស់នៅរបស់ប្រជាពលរដ្ឋ ត្រូវបានលើកកម្ពស់ពីមួយថ្ងៃទៅមួយថ្ងៃ។ រដ្ឋបាលខេត្តក៏បានលើកឡើង ពីសមិទ្ធផលទាក់ទងនឹងវិស័យទទួលបន្ទុករបស់គណៈកម្មការដែរ ដូចជាវិស័យសុខាភិបាល សង្គមកិច្ច ឣតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី ជាដើម។

ទន្ទឹមនឹងនេះ ឯកឧត្តម សោម ពិសិដ្ឋ និងប្រធានមន្ទីរពាក់ព័ន្ធ ក៏បានលើកឡើងពីបញ្ហាប្រឈមជាច្រើន និងបានស្នើសុំឲ្រគណៈកម្មការ ទី៨នៃរដ្ឋសភា ជួយធ្វើឣន្តរាគមន៍រកដំណោះស្រាយផង។

ឯកឧត្តមឣនុប្រធានគណៈកម្មការទី៨នៃរដ្ឋសភា ក៏បានសន្យាទទួលយកបញ្ហាប្រឈម ដែលខេត្តបានលើកឡើង រាយការណ៍ជូនទៅ សម្តេចឣគ្គមហាពញាចក្រី ហេង សំរិន ប្រធានរដ្ឋសភា ដើម្បីធ្វើឣន្តរាគមន៍ទៅរាជរដ្ឋាភិបាល ជំរុញឲ្យជួយរកដំណោះស្រាយជូន រដ្ឋបាលខេត្តឲ្យបានទាន់ពេលវេលា៕

អត្ថបទ និងរូបភាព ដោយនាយកដ្ឋានព័ត៌មាន