ឯកឧត្តម កែវ ពិសិដ្ឋ តំណាងរាស្រ្តមណ្ឌលខេត្តត្បូងឃ្មុំ បានជួបសំណេះសំណាលជាមួយប្រជាពលរដ្ឋ អាជ្ញាធរមូលដ្ឋាន រួមទាំង ប្រជាការពារដើម្បីសែ្វងយល់សុខទុក្ខ និងតម្រូវការសេវាសាធារណៈរបស់ពលរដ្ឋពាក់ព័ន្ធការរស់ប្រចាំថ្ងៃនៅឃុំពពេល ស្រុកពញាក្រែក ខេត្តត្បូងឃ្មុំ កាលពីថ្ងៃទី២០ ខែកុម្ភៈ ឆ្នាំ២០២២។
នៅក្នុងឱកាសនោះ ឯកឧត្តមតំណាងរាស្រ្ត បានពាំនាំការផ្តាំផ្ញើការសាកសួរសុខទុក្ខរបស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និង សម្តេចតេជោ ហ៊ុន សែន នាយករដ្ឋមន្រ្តី ជូនប្រជាពលរដ្ឋ ផងដែរ ដោយបាន គូសបញ្ជាក់ថា ថ្នាក់ដឹកនាំស្ថាប័ននីតិប្បញ្ញត្តិ និងនីតិប្រតិបត្តិ តែងតែគិតគូរពីសុខទុក្ខ ជីវភាពពលរដ្ឋនៅគ្រប់ កាលៈទេសៈ។
ឯកឧត្តមបានវាយតម្លៃខ្ពស់ និងកោតសរសើរចំពោះអាជ្ញាធរទាំងអស់ ដែលបានខិតខំបំពេញតួនាទីយ៉ាងសកម្មភាពនៅមូលដ្ឋាន បម្រើ សេវាសាធារណៈជូនពលរដ្ឋ ប្រកបដោយស្មារតីទទួលខុសត្រូវ នាពេលកន្លងមក ជាការផ្តល់ភាពកក់ក្តៅជូនពលរដ្ឋ នៅគ្រប់ពេល វេលា។ ឯកឧត្តម បានជំរុញនិងលើកទឹកចិត្តដល់អាជ្ញាធរអោយបន្តសាមគ្គីភាពនឹងគ្នា ចែករំលែកបទពិសោធន៍ សហការគ្នាឲ្យបានល្អ ដោយកម្ដល់ផលប្រយោជន៍ពលរដ្ឋ និងមូលដ្ឋានជាធំ។
ឯកឧត្តម កែវ ពិសិដ្ឋ បាននាំយកអំណោយ សម្ភារៈប្រើប្រាស់ប្រចាំថ្ងៃ និងគ្រឿងឧបភោគ បរិភោគមួយចំនួន ចែកជូនពលរដ្ឋក្រីក្រ ចំនួន៥០គ្រួសារនៅក្នុងភូមិស្រះ ក្នុងឃុំពពេល ស្រុកពញាក្រែក ដោយក្នុងមួយគ្រួសារទទួលបានអង្ករ ២០គីឡូក្រាម ទឹកត្រី ១យួរ ទឹកស៊ីអ៊ីវ ១យួរ មី ១កេះ ប្រេងឆា ១ដបធំ សារុង១ ថវិកា ២ម៉ឺនរៀល និង ប្រគេនវត្តស្រះ ទឹកក្រូច ៥កេះទឹកសុទ្ធ ៥កេះ អង្ករ ១០០គីឡូក្រាមបច្ច័យ ២លានរៀល និងបានប្រគល់ឯកសណ្ឋាន និងវិទ្យុទាក់ទងជូនប្រជាការពារឃុំ សម្រាប់ប្រើប្រាស់ពង្រឹងការអនុវត្ត គោលនយោបាយភូមិឃុំមានសុវត្ថិភាព បម្រើផ្តល់សេវាសន្តិសុខជូនពលរដ្ឋ ឲ្យកាន់តែមានប្រសិទ្ធភាពខ្ពស់ថែមទៀត។
ឯកឧត្តមបានផ្តាំផ្ញើដល់ប្រជាពលរដ្ឋ ឲ្យបន្តអនុវត្តវិធានការសុខាភិបាល ការពារការឆ្លងរាលដាលជំងឺកូវីដ-១៩ ឲ្យបានខ្ជាប់ខ្ជួន មិនត្រូវ ធ្វេសប្រហែសឡើយ ពីព្រោះថាទំាងសកលលោក និងកម្ពុជា នៅតែប្រឈមនឹងជំងឺដ៏កាចសាហាវនេះនៅឡើយ៕
អត្ថបទ និងរូបភាព ដោយនាយកដ្ឋានព័ត៌មាន