ឯកឧត្ដម ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា បានដឹកនាំ ប្រតិភូគណៈកម្មាធិការនយោបាយកម្ពុជា អញ្ជើញចូលរួមកិច្ចប្រជុំគណៈកម្មាធិការនយោបាយអន្តរសភាអាស៊ាន អាយប៉ា តាមរយៈប្រព័ន្ធ វីដេអូ ក្នុងឱកាសនៃមហាសន្និបាតអន្តរសភាអាស៊ាន (អាយប៉ា) លើកទី៤១ ដែលសភាប្រទេសវៀតណាមធ្វើជាម្ចាស់ផ្ទះ នៅព្រឹកថ្ងៃទី៩ ខែកញ្ញា ឆ្នាំ២០២០។

សមាសភាពគណៈប្រតិភូគណៈកម្មាធិការនយោបាយអាយប៉ាកម្ពុជា ចូលរួមក្នុងកិច្ចប្រជុំនេះមាន លោកជំទាវ បាន ស្រីមុំ អនុប្រធាន គណៈកម្មការទី៧នៃរដ្ឋសភា ឯកឧត្ដម គិន ណែត សមាជិកព្រឹទ្ធសភា ឯកឧត្ដម សន សារ៉ាណា សមាជិកគណៈកម្មការទី៣ នៃរដ្ឋសភា ឯកឧត្ដម ងួន សុជាតិ សមាជិកគណៈកម្មការទី៥ នៃរដ្ឋសភា ឯកឧត្ដម យឹម លាត សមាជិកគណៈកម្មការទី២ នៃរដ្ឋសភា និង ឯកឧត្ដម ឡេង ប៉េងឡុង អគ្គលេខាធិការរដ្ឋសភា ព្រមទាំងមន្រ្តីជំនាញ។

ឯកឧត្ដម ឈាង វុន បានផ្ដល់បទអន្តរាគមន៍ទៅកាន់កិច្ចប្រជុំនាពេលនេះ ដោយបានមានប្រសាសន៍លើកឡើងពីការគំរាមកំហែងនៃជម្ងឺ រាតត្បាតសកលកូវីដ១៩ និងការកើនឡើងនៃនិន្នាការឯកតោភាគីនិយម ការគាំពារនិយម សង្គ្រាមពាណិជ្ជកម្ម ការប្រកួតប្រជែង ភូមិសាស្ត្រនយោបាយ ដែលកំពុងគំរាមកំហែងដល់សណ្ដាប់ធ្នាប់អន្តរជាតិ ទន្ទឹមគ្នានឹងបញ្ហាប្រឈមដែលមានស្រាប់ ក៏នៅមិនទាន់ត្រូវ បានដោះស្រាយ ដូចជា ការប្រែប្រួលអាកាសធាតុ បញ្ហាសន្តិសុខទឹក ស្បៀង ជម្លោះហិង្សា ឧក្រិដ្ឋកម្មតាមប្រព័ន្ធអ៊ីនធើណែត អន្តោប្រវេសន៍ខុសច្បាប់ និងភាពក្រីក្រជាដើម។

ឯកឧត្ដមប្រធានគណៈប្រតិភូ បានមានប្រសាសន៍ទៀតថា បញ្ហាស្មុគ្រស្មាញទាំងអស់នេះ គឺជាឧបសគ្គដល់ការរក្សាសន្តិភាព សន្តិសុខ ប្រកបដោយចីរភាព ដែលត្រូវការ ការយកចិត្តទុកដាក់និងចូលរួមដោះស្រាយពីគ្រប់ប្រទេស និងភាគីពាក់ព័ន្ធទាំងអស់។ នៅក្នុងបរិបទ នេះ អង្គការនីតិប្បញ្ញត្តិ និងក្របខណ្ឌកិច្ចសហប្រតិបត្តិការអន្តរសភាអាស៊ាន គឺជាតួអង្គសំខាន់តាមរយៈការទូតសភា ដើម្បីលើកកម្ពស់ សន្តិភាព សន្តិសុខរបស់តំបន់ក៏ដូចជាពិភពលោក។

ឯកឧត្ដម ឈាង វុន បានបញ្ជាក់ថា សភាកម្ពុជាសូមគាំទ្រ និងជំរុញការបន្តកិច្ចសន្ទនា កសាងទំនុកចិត្ត ស្វែងយល់គ្នាទៅវិញទៅមក ដើម្បី ពង្រឹងទំនាក់ទំនង និងកិច្ចសហប្រតិបត្តិការ ក្នុងការផ្លាស់ប្ដូរទស្សនៈ បទពិសោធន៍ និងការអនុវត្តល្អៗ។ បន្ថែមលើនេះ យើងត្រូវតែជំរុញ តួនាទីរបស់ការទូតសភាឲ្យកាន់តែពាក់ព័ន្ធ និងសកម្ម ដើម្បីគាំទ្រប្រព័ន្ធអន្តរជាតិផ្អែកលើគោលការណ៍ច្បាប់ជាតិ និងអន្តរជាតិ ស្របតាម គោលការណ៍ធម្មនុញ្ញអង្គការសហប្រជាជាតិ តាមរយៈការប្រើមធ្យោបាយសន្តិវិធីក្នុងការដោះស្រាយជម្លោះ ឬការមិនចុះសម្រុងគ្នានៅក្នុង តំបន់។

ឯកឧត្ដមបានមានប្រសាសន៍បន្ថែមថា កម្ពុជាបានធ្វើការកែសម្រួលខ្លឹមសារមួយចំនួន លើសេចក្ដីព្រាងសេចក្ដីសម្រេចរបស់គណៈកម្មាធិ- ការនយោបាយអាយប៉ា ដោយបានផ្ដោតសារៈសំខាន់យ៉ាងខ្លាំងលើការរក្សានិងលើកកម្ពស់សន្តិភាព សន្តិសុខ ស្ថិរភាព និងវិបុលភាពនៅ ក្នុងតំបន់អាស៊ាន។

ចំណែកនៅក្នុងបទអន្តរាគមន៍របស់គណៈប្រតិភូសភាប្រទេសអាស៊ានផ្សេងៗទៀត ក៏បានលើកឡើងពីសារៈសំខាន់ នៃការទូតសភា និង ការប្រើមធ្យោបាយសន្តិវិធីក្នុងការដោះស្រាយជម្លោះ ឬការមិនចុះសម្រុងគ្នានៅក្នុងតំបន់ សម្រាប់សន្តិភាព និងសន្តិសុខ ប្រកបដោយ ចីរភាពក្នុងតំបន់អាស៊ាននេះ៕

អត្ថបទ និងរូបភាព ដោយនាយកដ្ឋានព័ត៌មាន