តំណាងរាស្រ្តមណ្ឌលខេត្តព្រៃវែង និងជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ឯកឧត្តមកិត្តិសេដ្ឋា បណ្ឌិត ជាម យៀប បានកោតសរសើរ និងថ្លែងអំណរគុណចំពោះអាជ្ញាធរខេត្ត ស្រុក ឃុំ ភូមិទាំងអស់ នៃស្រុកពាមរក៍ និងពាមជរ ខេត្តព្រៃវែង ដែលបានយកចិត្តទុកដាក់បំពេញការងារ បម្រើប្រជាពលរដ្ឋ និងអភិវឌ្ឍន៍មូលដ្ឋាន ឱ្យមានសុខសុវត្ថិភាព និងមានភាព រីកចម្រើន ដែលធ្វើឲ្យប្រជាពលរដ្ឋមានការពេញចិត្ត និងគាំទ្រយ៉ាងច្រើនលើសលប់។

ឆ្លើយតបការទុកចិត្ត និងជឿជាក់ពីប្រជាពលរដ្ឋបែបនេះ ឯកឧត្តមកិត្តិសេដ្ឋាបណ្ឌិត ជាម យៀប បានជំរុញអាជ្ញាធរ បង្កើនការចុះ តាមដាន  និងដោះស្រាយបញ្ហាជូនពលរដ្ឋ អោយសកម្ម និងមានប្រសិទ្ធភាព។

ការលើកឡើងបែបនេះ បានធ្វើឡើងក្នុងឱកាសដែល ឯកឧត្តមកិត្តិសេដ្ឋាបណ្ឌិត បានជួបសំណេះសំណាលជាមួយប្រជាពលរដ្ឋ និង អាជ្ញាធរ ឃុំ ស្រុកពាមរក៍ និងស្រុកពាមជរកាលពីព្រឹកថ្ងៃពុធ ទី១២ ខែកុម្ភៈ ឆ្នាំ២០២០។

ក្នុងឱកាសនោះ ឯកឧត្តមកិត្តិសេដ្ឋាបណ្ឌិត ជាម យៀប បានពាំនាំការសាកសួរសុខទុក្ខពីសំណាក់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្ដេចអគ្គមហាពញាចក្រី ហេង សំរិន ប្រធានរដ្ឋសភា ជូនចំពោះបងប្អូន ប្រជាពលរដ្ឋរស់នៅក្នុងស្រុកពាមរក៍ និងស្រុកពាមជរ  ក៏ដូចជាប្រជាពលរដ្ឋនៅទូទាំងប្រទេស។

ឯកឧត្តមតំណាងរាស្រ្ត បានថ្លែងអំណរគុណដល់ប្រជាពលរដ្ឋទូទាំងស្រុកពាមរក៍ និងពាមជរដែលបានបន្តជឿជាក់លើការដឹកនាំរបស់ រាជរដ្ឋាភិបាលកម្ពុជាបច្ចុប្បន្ន និងរួមគ្នាថែរក្សាសុខសន្តិភាពរហូតមក៕

អត្ថបទ និងរូបភាព ដោយនាយកដ្ឋានព័ត៌មាន