ឯកឧត្តម ប្រាជ្ញ ចន្ទ ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា និង សមាជិកសមាជិកាគណៈកម្មការ ជួបពិភាក្សាការងារជាមួយ ឯកឧត្តម  ម៉ុម សារឿន អភិបាលនៃគណៈអភិបាលខេត្តស្ទឹងត្រែង និង មន្រ្តីស្ថាប័នពាក់ព័ន្ធ ដើម្បីសិក្សាស្វែងយល់ពីវិស័យការងារ ដែលគណៈកម្មការទទួលបន្ទុក។

ក្នុងជំនួបពិភាក្សាការងារ ដែលធ្វើនៅសាលាខេត្តស្ទឹងត្រែង ថ្ងៃទី១២ ខែកុម្ភៈ ឆ្នាំ២០២០ ឯកឧត្តម ម៉ុម សារឿន បានជម្រាបពីវឌ្ឍនភាព របស់ខេត្តស្ទឹងត្រែង។ ក្រោមការអនុវត្តតាមកម្មវិធីនយោបាយនិងយុទ្ធសាស្ត្រចតុកោណដំណាក់កាលទី៤  របស់រាជរដ្ឋាភិបាលកម្ពុជា ខេត្តស្ទឹងត្រែងបានអភិវឌ្ឍហេដ្ឋារចនាសម្ព័ន្ធសង្គមជាច្រើន និងបានបម្រើសេវាកម្មសាធារណជនជូនពលរដ្ឋបានយ៉ាងល្អប្រសើរ។

ឯកឧត្តមអភិបាលខេត្តបានលើកឡើងពីការគ្រប់គ្រងដីធ្លីនៅក្នុងខេត្ត គឺបានអនុវត្តទៅតាមច្បាប់បទដ្ឋានគតិយុត្ត ដែលមានជាធរមាន។ ខេត្តបានកំណត់យកគោលការណ៍សុវត្ថិភាពដីធ្លីប្រជាជនដោយធានាថា  គ្រួសារប្រជាពលរដ្ឋដែលមានដីធ្លីរបស់ខ្លួន ត្រូវបានចុះបញ្ជី និងផ្ដល់ប័ណ្ណកម្មសិទ្ធិស្របច្បាប់។ គិតមកត្រឹមចុងឆ្នាំ២០១៩ ខេត្តបានចុះបញ្ជីដីធ្លីមានលក្ខណៈជាប្រព័ន្ធ ចុះបញ្ជីដាច់ដោយដុំជូន ប្រជាពលរដ្ឋក្នុងមូលដ្ឋានភូមិឃុំសង្កាត់សម្រេចបានចំនួនជាង ២ម៉ឺន ៥ពាន់ក្បាលដី។

ឯកឧត្តម ម៉ុម សារឿន បន្តថា ការវាស់វែងចុះបញ្ជីដីរដ្ឋចំពោះក្រុមហ៊ុនសម្បទានដីសេដ្ឋកិច្ច បានសម្រេចរួចរាល់មួយទីតាំងទំហំ ៣២.០៣៥ ហិកតា ស្មើនឹង ១៨ប័ណ្ណ និងបានបញ្ចប់ការវាស់វែងចំនួន៧ទីតាំងផ្សេងទៀត ស្មើនឹង៧ក្រុមហ៊ុនសម្បទានដីសេដ្ឋកិច្ច ចេញ វិញ្ញាបនបត្រសម្គាល់កម្មសិទ្ធិសមូហភាពដល់សហគមន៍ជនជាតិដើមភាគតិចគ្រឹង បានចំនួន២៦ប័ណ្ណ ស្មើនឹងទំហំដី ១.៣០៦.៤៧ ហិកតា។

ចំពោះការដោះស្រាយបញ្ហាទំនាស់ដីធ្លី វិវាទដីធ្លី អាជ្ញាធរខេត្តបានដោះស្រាយចំនួន១០ករណី មានទំហំ ២៦៧០ហិកតា ស្មើនឹង ២៧គ្រួសារ  នៅសល់៤ករណី  កំពុងស្រាវជ្រាវដោះស្រាយបន្តនិងមានពាក្យបណ្ដឹងចំនួន ២៥ករណីតាមរយៈយន្តការគណៈកម្មការ រដ្ឋបាលដែលបានសម្រុះសម្រួលបញ្ចប់វិវាទ ០៨ករណី  និងកំពុងបន្តធ្វើការសម្រុះសម្រួលបន្តជំនួន ១៧ករណី។

ឯកឧត្តម ប្រាជ្ញ ចន្ទ បានកោតសរសើរ និងវាយតម្លៃខ្ពស់ចំពោះលទ្ធផលការងារ ដែលខេត្តស្ទឹងត្រែងសម្រេចបាន។ ឯកឧត្តមបាន ស្នើដល់អាជ្ញាធរខេត្តបន្តការខិតខំបំពេញការងារ ឲ្យកាន់តែមានប្រសិទ្ធភាពថែមទៀត ក្នុងនាមជាសេនាធិការរបស់រាជរដ្ឋាភិបាល និង ជាអ្នកដែលនៅជិតពលរដ្ឋនោះ៕

អត្ថបទ និងរូបភាព ដោយនាយកដ្ឋានព័ត៌មាន