លោកជំទាវ និន សាផុន ប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់នៃរដ្ឋសភា បានជួបប្រជុំ នានៅរសៀលថ្ងៃទី១៦ ខែកញ្ញា ឆ្នាំ២០១៩ នៅវិមាន រដ្ឋសភា ជាមួយ ឯកឧត្តម ថេង ច័ន្ទសង្វា រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ ដើម្បីធ្វើការពិនិត្យ និងរៀបចំ ឯកសារ សម្រាប់ត្រៀមរៀបចំសិក្ខាសាលាសិក្សាឈ្វេងយល់លើសេចក្តីព្រាងច្បាប់ស្តីពី សំណង់ ដែលគ្រោងប្រារព្ធធ្វើនៅថ្ងៃទី២០ ខែកញ្ញា ឆ្នាំ២០១៩ នាពេលខាងមុខ។

ក្នុងនាមជាតំណាងដ៏ខ្ពង់ខ្ពស់ ឯកឧត្តម ជា សុផារ៉ា ឧបនាយករដ្ឋមន្រ្តី និងជារដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ឯកឧត្តម ថេង ច័ន្ទសង្វា បានមានប្រសាសន៍ថា សេចក្ដីព្រាងច្បាប់ស្ដីពីសំណង់នេះ ត្រូវបានតាក់តែងឡើងដោយមន្ត្រីជំនាញនៃក្រសួង រៀបចំដែនដី នគរូបនីយកម្ម និងសំណង់ ដោយមានការចូលរួមពីក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច ក្រុមប្រឹក្សាវប្បធម៌ និងកិច្ចប្រជុំ អន្តរក្រសួង ដោយមានក្រសួងយុត្តិធម៌ បានជួយពិនិត្យកែសម្រួលលើបណ្ដាមាត្រាមួយចំនួន ក្នុងជំពូកដែលពាក់ព័ន្ធ និងនីតិវិធី និងទោសប្បញ្ញត្តិ ដើម្បីធានាឱ្យមានសង្គតិភាព។

ឯកឧត្តមរដ្ឋលេខាធិការបន្ថែមថា ការបង្កើតឱ្យមានសេចក្តីព្រាងច្បាប់ស្តីពីសំណង់នេះ គឺដើម្បីឆ្លើយតបទៅនឹងវិស័យសំណង់ ដែលមាន កំណើនយ៉ាងឆាប់រហ័សនៅកម្ពុជា។ ឯកឧត្តមបន្តថា សេចក្តីព្រាងច្បាប់ស្តីពីសំណង់ មាន២២ជំពូក និង១១៣មាត្រា។ ច្បាប់ស្តីពីសំណង់ នេះ មានគោលដៅកំណត់គោលការណ៍ បទបញ្ញត្តិបច្ចេកទេសសំណង់ វិធាន និងនីតិវិធី ក្នុងការគ្រប់គ្រងវិស័យសំណង់ក្នុងប្រទេស កម្ពុជា។

លោកជំទាវ និន សាផុន បានមានប្រសាសន៍លើកឡើងថា រយៈពេលជាងមួយទសវត្សរ៍ចុងក្រោយនេះ វិស័យសំណង់នៅកម្ពុជាមាន កំណើន និងនៅតែបន្តរីកចម្រើនជាលំដាប់ នៅទូទាំងប្រទេស ជាពិសេសការសាងសង់សំណង់ធំៗខ្ពស់ៗដូចជា ផ្សារទំនើប អគារខុនដូរ អគារលក់ទំនិញ មជ្ឈមណ្ឌលពាណិជ្ជកម្ម អគារការិយាល័យ សណ្ឋាគារ បុរីលំនៅដ្ឋាន ភូមិគ្រឹះ គ្រឹះស្ថានសិក្សា មន្ទីរពេទ្យ ធនាគារ និងសំណង់ទីក្រុងរណបជាដើម។ លោកជំទាវប្រធានបន្ថែមថា សំណង់កាន់តែធំ កាន់តែខ្ពស់ វាពិតជាចាំបាច់ណាស់ទាមទារឱ្យ ការអនុវត្តបានត្រឹមត្រូវតាមបទដ្ឋានគតិយុត្ត បច្ចេកវិទ្យា ស្ដង់ដារ និងបទប្បញ្ញត្តិបច្ចេកទេស ដើម្បីធានាភាពរឹងមាំ គុណភាព សោភ័ណ្ឌភាព និងចីរភាពនៃសំណង់។

លោកជំទាវ និន សាផុន ប្រធានគណៈកម្មការ បានមានប្រសាសន៍បញ្ជាក់ថា នៅថ្ងៃទី២០ ខែកញ្ញា ឆ្នាំ២០១៩ ខាងមុខនេះ រដ្ឋសភា ព្រឹទ្ធសភា និងរាជរដ្ឋាភិបាល នឹងរួមគ្នារៀបចំសិក្ខាសាលាមួយថ្ងៃពេញ ដើម្បីផ្សព្វផ្សាយសេចក្តីព្រាងច្បាប់ស្តីពីសំណង់ ដល់អ្នកពាក់ព័ន្ធ ទាំងអស់ បានឈ្វេងយល់និងចូលរួមមតិ ដើម្បីរួមចំណែកជួយកសាងសេចក្តីព្រាងច្បាប់នេះ ឲ្យបានកាន់តែមានប្រសិទ្ធភាព៕

អត្ថបទ និងរូបភាព ដោយនាយកដ្ឋានព័ត៌មាន