ឯកឧត្តមបណ្ឌិត ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភា និងជាប្រធានក្រុមការងារបច្ចេកទេស នៃសភានិយាយភាសា បារាំង (APF) នៅព្រឹកថ្ងៃទី១៨ ខែកុម្ភៈ ឆ្នាំ២០១៩ នៅវិមានរដ្ឋសភា បានដឹកនាំកិច្ចប្រជុំពិនិត្យទៅលើការបែងចែកភារកិច្ចក្រុមសមាជិករដ្ឋសភា នៃព្រះរាជាណាចក្រកម្ពុជា ទទួលបន្ទុកកិច្ចការសភានិយាយបារាំង (APF) ដើម្បីចូលរួមក្នុងកិច្ចប្រជុំគណៈកម្មការអប់រំ ទំនាក់ទំនង និងកិច្ចការវប្បធម៌ និងកិច្ចប្រជុំបណ្ដាញសមាជិកសភាស្ត្រី នៃសភានិយាយភាសាបារាំង (APF) ចាប់ពីថ្ងៃទី២៥ ដល់ថ្ងៃទី២៨ ខែកុម្ភៈ ឆ្នាំ២០១៩ នៅទីក្រុងហាណូយ ប្រទេសវៀតណាម។
ឯកឧត្តមបណ្ឌិត ប៉ែន បញ្ញា បានមានប្រសាសន៍ថា កិច្ចប្រជុំនេះ នឹងផ្តោតសំខាន់ទៅលើការស្វែងរកដំណោះស្រាយចំពោះបញ្ហាប្រឈម និងវឌ្ឍនភាពសង្គម។ ឯកឧត្តមបណ្ឌិត ក៏បានមានប្រសាសន៍លើកឡើងពីការចុះបញ្ជីអត្រានុកូលដ្ឋាន និងបញ្ហាប្រឈមរបស់កុមារ និងស្ត្រី ដែលជា ប្រធានបទសំខាន់សម្រាប់យកទៅពិភាក្សាក្នុងកិច្ចប្រជុំនាពេលខាងមុខ ដោយហេតុថា ការចុះសំបុត្រអត្រានុកូលដ្ឋាន ត្រូវបានផ្តល់ជូនមិនមែនសម្រាប់តែគោលបំណងនៃការបង្កើតចំណងនៃបុគ្គលនីមួយៗទៅនឹងប្រទេសមួយ ឬគ្រួសារមួយតែប៉ុណ្ណោះទេ ប៉ុន្តែវាក៏មានសារៈសំខាន់ដើម្បីទទួល ស្គាល់ពីសិទ្ធិសេដ្ឋកិច្ច សង្គម និងនយោបាយ ក៏ដូចជាករណីយកិច្ចរបស់ពួកគេផងដែរ។
ឯកឧត្តមបណ្ឌិត ប៉ែន បញ្ញា មានប្រសាសន៍ទៀតថា ក្នុងរយៈពេលជាង៤ទសវត្សរ៍ចុងក្រោយនេះ សមាជិក APF បានធ្វើសមាហរណកម្មយ៉ាងជិតស្និទ្ធ ហើយបានក្លាយជាស្ថាប័ននយោបាយ និងសេដ្ឋកិច្ចប្រកបដោយថាមភាពនៅក្នុងតំបន់អាស៊ី ព្រមទាំងជាដៃគូយុទ្ធសាស្រ្តមិនអាចខ្វះបានរបស់បណ្តាប្រទេសធំៗ និងអង្គការសំខាន់ៗក្នុងសកលលោក។ ប៉ុន្តែទន្ទឹមនឹងភាពជោគជ័យនេះ ក៏នៅមានបញ្ហាប្រឈម និងឧបសគ្គជាច្រើនដែលប្រទេសសមាជិកទាំងអស់ត្រូវចូលរួមដោះស្រាយផងដែរ។
ឯកឧត្តមបណ្ឌិតរំពឹងថា កិច្ចប្រជុំគណៈកម្មការ នៃសភានិយាយភាសាបារាំងហ្វ្រង់កូហ្វូនី នៅវៀតណាម នាពេលខាងមុខនេះ នឹងអាចនាំមកនូវការឯកភាពគ្នាក្នុងតំបន់ និងរកបានដំណោះស្រាយមួយដ៏មានប្រសិទ្ធភាពផងដែរ។
សូមបញ្ជាក់ថា កម្ពុជាបានចូលជាសមាជិកសភានិយាយភាសាបារាំង APF ចាប់តាំងពីឆ្នាំ១៩៦៧មក។ កាលនោះ ព្រះបរមរតនៈកោដ្ឋ ព្រះករុណាព្រះបាទសម្តេចព្រះ នរោត្តម សីហនុ បានក្លាយជាតួអង្គស្ថាបនិកមួយដ៏សំខាន់ ក្នុងការបង្កើតសមាគមអន្តរជាតិនៃសមាជិកសភានិយាយភាសាបារាំងនេះឡើង។ ប៉ុន្តែក្រោយមក អង្គការមួយនេះបានប្តូរឈ្មោះជាសភានិយាយភាសាបារាំងវិញ នៅក្នុងឆ្នាំ១៩៩៨។ រហូតមកទល់នឹងពេលនេះAPF មានសមាជិកជាង៤០ប្រទេសក្នុងពិភពលោក៕
អត្ថបទ និងរូបភាព ដោយនាយកដ្ឋានព័ត៌មាន
