លោកជំទាវ គ្រួច សំអាន ប្រធានស្តីទីគណៈកម្មការនីតិកម្ម និងយុត្តិធម៌នៃរដ្ឋសភា បានស្នើដល់គណៈប្រតិភូគណៈកម្មាធិការនីតិកម្ម និងយុត្តិធម៌ នៃសភាសាធារណរដ្ឋកូរ៉េ​ ដឹកនាំដោយ ឯកឧត្តម​​ ជូ វ៉ាងឌឿក​ (Joo Kwang-deok) សមាជិករដ្ឋសភាលើកទី២០ ជួយកៀរគរអ្នកវិនិយោគទុន សាធារណរដ្ឋកូរ៉េ មកបណ្តាក់ទុនរកស៊ីនៅកម្ពុជាឲ្យបានច្រើន។

សំណើនេះបានលើកឡើងនៅក្នុងឱកាសដែលលោកជំទាវ បានជួបពិភាក្សាជាមួយគណៈប្រតិភូសភាសាធារណរដ្ឋកូរ៉េ នៅរសៀលថ្ងៃទី២៥ ខែធ្នូ ឆ្នាំ២០១៨ នៅវិមានរដ្ឋសភា ដើម្បីផ្លាស់ប្តូរបទពិសោធន៍គ្នាទៅវិញទៅមកលើការងារនីតិកម្ម។

ឯកឧត្តម JOO Kwang deok បានដឹកនាំគណៈប្រតិភូ​មកបំពេញទស្សនកិច្ចនៅព្រះរាជាណាចក្រកម្ពុជា ពីថ្ងៃទី២៣​ ដល់ថ្ងៃទី២៥​ ខែធ្នូ​ ឆ្នាំ២០១៨។ នៅក្នុងជំនួបជាមួយ លោកជំទាវ គ្រួច សំអាន ឯកឧត្តមប្រធានគណៈប្រតិភូ បានកោតសរសើរពីការអភិវឌ្ឍនៅព្រះរាជាណាចក្រកម្ពុជា ក្រោមការ ដឹកនាំរបស់ សម្តេចតេជោ ហ៊ុន សែន នាយករដ្ឋមន្រ្តី។ ឯកឧត្តម​​ ជូ វ៉ាងឌឿក​ បានជម្រាបតំណាងរដ្ឋសភាកម្ពុជាថា នៅពេលសភាកម្ពុជាធ្វើជា ម្ចាស់ផ្ទះនៃកិច្ចប្រជុំប្រចំាឆ្នាំលើកទី២៧ វេទិកាសភាអាស៊ី-ប៉ាស៊ីហ្វិក (APPF) នាពាក់កណ្តាលខែមករា ឆ្នាំ២០១៩នោះ ថ្នាក់ដឹកនាំរដ្ឋសភា សាធារណរដ្ឋកូរ៉េនឹងអញ្ជើញមកចូលរួមកិច្ចប្រជុំនោះដែរ។

លោកជំទាវ គ្រួច សំអាន បានវាយតម្លៃខ្ពស់ចំពោះចំណងមិត្តភាព និងកិច្ចសហប្រតិបត្តិការរវាងប្រទេសកម្ពុជា និងសាធារណរដ្ឋកូរ៉េ ទំាងស្ថាប័ន នីតិប្បញ្ញត្តិ និងនីតិប្រតិបត្តិ។ លោកជំទាវបានថ្លែងអំណរគុណចំពោះរដ្ឋាភិបាល សភា និងប្រជាជនសាធារណរដ្ឋកូរ៉េ ដែលបានគាំទ្រដល់ ការអភិវឌ្ឍនៅកម្ពុជា និងបានផ្តល់ជំនួយមនុស្សធម៌ និងការវិនិយោគជាបន្តបន្ទាប់មកដល់កម្ពុជា៕

អត្ថបទ និងរូបភាព ដោយនាយកដ្ឋានព័ត៌មាន