ឯកឧត្តម Sylvain WASERMAN អនុប្រធានសភា និងជាសមាជិកគណៈកម្មការកិច្ចការបរទេសនៃសភាប្រទេសបារំាង គ្រោងបំពេញទស្សនកិច្ចនៅ ព្រះរាជាណាចក្រកម្ពុជា​ ពីថ្ងៃទី១៥​ ដ​ល់ថ្ងៃទី២១​ ខែធ្នូ ឆ្នាំ២០១៨។ នៅរសៀលថ្ងៃទី២៨​ ខែវិច្ឆិកា​ ឆ្នាំ២០១៨​ នៅវិមានរដ្ឋសភា ឯកឧត្តម ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័តមាន នៃរដ្ឋសភា បានជួបពិភាក្សាការងារពីគម្រោងដំណើរ ទស្សនកិច្ចរបស់ថ្នាក់ដឹកនាំសភាប្រទេសបារំាងជាមួយ លោកជំទាវ អេវ៉ា ង្វៀន ប៊ិញ ឯកអគ្គរដ្ឋទូតប្រទេសបារាំងប្រចាំនៅកម្ពុជា។

ដំណើរទស្សនកិច្ចថ្នាក់ដឹកនាំសភាប្រទេសបារំាងនៅកម្ពុជា ត្រូវបានវាយតម្លៃថា មានសារៈសំខាន់ណាស់ ក្នុងការពង្រឹងពង្រីកកិច្ចសហប្រតិបត្តិការ ប្រទេសទំាងពីរឲ្យកាន់តែរឹងមាំឡើង ពិសេសស្ថាប័ននីតិប្បញ្ញត្តិកម្ពុជា-បារំាង។ ឯកឧត្តម ឈាង វុន បានគូសបញ្ជាក់ថា នៅក្នុងដំណើរទស្សនកិច្ចនោះ ឯកឧត្តម Sylvain WASERMAN គ្រោងជួបពិភាក្សាទ្វេភាគីជាមួយថ្នាក់ដឹកនាំសំខាន់ៗរបស់រដ្ឋសភា ព្រឹទ្ធសភា និងរាជរដ្ឋាភិបាល ព្រមទាំងអញ្ជើញ ទៅបំពេញទស្សនកិច្ចនៅខេត្តសៀមរាប និងកន្លែងសំខាន់ៗមួយចំនួនទៀត៕

អត្ថបទ និងរូបភាព ដោយនាយកដ្ឋានព័ត៌មាន