កំពង់ចាម៖ តំណាងរាស្រ្តមណ្ឌលខេត្តកំពង់ចាម រួមមាន ឯកឧត្តម ម៉ៅ ភិរុណ ឯកឧត្តម ណៅ ធួក ឯកឧត្តម ប៉ាន សូរស័ក្តិ ឯកឧត្តម ងួន សុជាតិ លោកជំទាវ កុល ធារិន រួមជាមួយ លោកជំទាវ ស្រី គឹមឆយ ទីប្រឹក្សាជាន់ខ្ពស់រដ្ឋសភា នៅរសៀលថ្ងៃទី២៦ ខែតុលា ឆ្នាំ២០២៦ បានអញ្ជើញចូលរួមពិធីប្រណាំងទូក បណ្តែតប្រទីប អុជកាំជ្រួច និងតាំងពិព័រណ៍សមិទ្ធផលនានានៅក្រុងកំពង់ចាម នាឱកាសនៃពិធីបុណ្យចេញព្រះវស្សា ព.ស.២៥៧០។
កម្មវិធីដ៏អធិកអធមនេះ រៀបចំឡើងដោយរដ្ឋបាលខេត្តកំពង់ចាម ក្រោមអធិបតីភាព ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាតំណាងដ៏ខ្ពង់ខ្ពស់ ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម។
ពិធីប្រណាំងទូកបានប្រព្រឹត្តទៅនៅវេទិកាអុំទូក ស្ថិតក្នុងភូមិជ្រោយថ្ម សង្កាត់បឹងកុក ក្រុងកំពង់ចាម ខណៈដែលពិធីបណ្តែតប្រទីប និងអុជកាំជ្រួច ត្រូវបានរៀបចំឡើងនាវេលាម៉ោង ១៨:៣០នាទីល្ងាច នៅកំពង់ផែទេសចរណ៍ សង្កាត់វាលវង់ ក្រុងកំពង់ចាម។
នៅក្នុងឱកាសនោះផងដែរ លោកជំទាវ កុល ធារិន បានឧបត្ថម្ភថវិកាចំនួន ៥,០០០,០០០ រៀល ជូនដល់រដ្ឋបាលខេត្តកំពង់ចាម ដើម្បីចូលរួមចំណែកក្នុងដំណើរការរៀបចំកម្មវិធីបុណ្យនេះឱ្យប្រព្រឹត្តទៅដោយរលូន និងផ្ដល់នូវភាពសប្បាយរីករាយសម្រាប់ប្រជាពលរដ្ឋដែលបានមកចូលរួមកំសាន្តក្នុងព្រឹត្តិត្តិការណ៍នេះ។
ពិធីនេះមិនត្រឹមតែជាការអបអរសាទរបុណ្យចេញព្រះវស្សាប៉ុណ្ណោះទេ ប៉ុន្តែថែមទាំងជាឱកាសបង្ហាញពីប្រពៃណី វប្បធម៌ និងទំនៀមទម្លាប់ដ៏ល្អផូរផង់របស់ជាតិ ព្រមទាំងរួមចំណែកលើកកម្ពស់សាមគ្គីភាព និងទាក់ទាញភ្ញៀវទេសចរមកកាន់ខេត្តកំពង់ចាមផងដែរ៕