វិមានរដ្ឋសភា៖ ឯកឧត្តម ឃុត ចាន់ដារ៉ា សមាជិកគណៈកម្មការទី៩ នៃរដ្ឋសភា និងជាអនុប្រធានក្រុមសមាជិកសភាវ័យក្មេងនៃរដ្ឋសភាកម្ពុជា ព្រមទាំង ឯកឧត្តម សន សារ៉ាណា សមាជិកគណៈកម្មការទី៥ នៃរដ្ឋសភា និងជាសមាជិកក្រុមសមាជិកសភាវ័យក្មេង នាព្រឹកថ្ងៃទី២៦ ខែតុលា ឆ្នាំ២០២៦ បានអញ្ជើញដឹកនាំកិច្ចប្រជុំពិនិត្យ និងពិភាក្សាលើ «សេចក្ដីព្រាងសេចក្ដីសម្រេចរបស់គណៈកម្មាធិការសមាជិកសភាវ័យក្មេងអាយប៉ា» ដើម្បីត្រៀមលក្ខណៈចូលរួមមហាសន្និបាតអន្តរសភាអាយប៉ា (AIPA) លើកទី៤៧ ដែលនឹងប្រព្រឹត្តទៅនៅទីក្រុងម៉ានីល ប្រទេសហ្វីលីពីន ចាប់ពីថ្ងៃទី១៦ ដល់ថ្ងៃទី២២ ខែវិច្ឆិកា ខាងមុខនេះ។
កិច្ចប្រជុំបានផ្តោតលើការពិភាក្សាសេចក្ដីព្រាងសេចក្ដីសម្រេចចំនួន ២ រួមមាន៖
១-សេចក្ដីព្រាងសេចក្ដីសម្រេច ស្ដីពីការអនុម័តលើវិធាននៃនីតិវិធី នៃកិច្ចប្រជុំសមាជិកសភាវ័យក្មេងអាយប៉ា (Draft Resolution on the Approval of the Rules of Procedure of the Meeting of Young Parliamentarians of AIPA - YPA)។
២-សេចក្ដីព្រាងសេចក្ដីសម្រេច ស្ដីពីការលើកកម្ពស់វិធានការបុរេសកម្ម ដើម្បីបង្កើតបរិយាកាសបណ្ដាញសង្គមប្រកបដោយសុវត្ថិភាពសម្រាប់យុវជនក្នុងតំបន់អាស៊ាន (Draft Resolution on Encouraging Proactive Measures for a Safer Social Media Environment for the Youth in ASEAN)។
សូមជម្រាបជូនថា មហាសន្និបាតអាយប៉ា (AIPA) ជាស្ថាប័ននីតិប្បញ្ញត្តិកំពូលរបស់អន្តរសភាអាស៊ាន ដែលប្រមូលផ្តុំសមាជិកសភាមកពីប្រទេសជាសមាជិកអាស៊ានទាំង ១០ ដើម្បីពិភាក្សា និងអនុម័តសេចក្តីសម្រេចចិត្តរួម ក្នុងការជួយជ្រោមជ្រែងកិច្ចសហប្រតិបត្តិការអាស៊ាន។ ដោយឡែក គណៈកម្មាធិការសមាជិកសភាវ័យក្មេងអាយប៉ា (YPA) ត្រូវបានបង្កើតឡើងក្នុងគោលបំណងបង្កើនការចូលរួមរបស់សមាជិកសភាវ័យក្មេងក្នុងតំបន់អាស៊ាន ក្នុងការតាក់តែងគោលនយោបាយ និងឆ្លើយតបទៅនឹងបញ្ហាប្រឈមនានារបស់យុវជនជំនាន់ក្រោយ៕
