វិមានរដ្ឋសភា៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា នៃព្រះរាជាណាចក្រកម្ពុជា និងជាប្រធានក្រុមសភាជាតិអាយប៉ា (AIPA)កម្ពុជា បានដឹកនាំកិច្ចប្រជុំត្រួតពិនិត្យវឌ្ឍនភាពការងារ ដើម្បីត្រៀម លក្ខណសម្បត្តិឱ្យបានគ្រប់ជ្រុងជ្រោយ សម្រាប់ចូលរួមកិច្ចប្រជុំទល់មុខ (Interface Meeting) រវាងថ្នាក់ដឹកនាំ AIPA និងប្រមុខដឹកនាំអាស៊ាន លើកទី១៥ នៅរដ្ឋធានីម៉ានីលឡា ប្រទេសហ្វីលីពីននាពាក់កណ្តាល ខែវិច្ឆិកា ឆ្នាំ២០២៦ខាងមុខ។

កិច្ចប្រជុំដែលធ្វើឡើងនៅវិមានរដ្ឋសភា នាព្រឹកថ្ងៃទី២២ ខែតុលានេះ ផ្តោតសំខាន់លើការរៀបចំឯកសារបច្ចេកទេស និងគោលនយោបាយជាយុទ្ធសាស្ត្រសំដៅធានាឱ្យបេសកកម្មការទូតសភានេះទទួលបានជោគជ័យនិងលើកកម្ពស់កិត្យានុភាពរបស់កម្ពុជាលើឆាកអន្តរជាតិ។

កិច្ចប្រជុំនេះ ក៏មានការចូលរួមពីឯកឧត្តម ទី សុគន្ធ លេខាធិការគណៈកម្មការកិច្ចការបរទេស សហប្រតិបត្តិការអន្តរជាតិនិងព័ត៌មាននៃរដ្ឋសភា, ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរងរដ្ឋសភានិងជាប្រធានក្រុមទីប្រឹក្សារដ្ឋសភាព្រមទាំងមន្ត្រីជំនាញពាក់ព័ន្ធជាច្រើនរូប។

សូមបញ្ជាក់ថាកិច្ចប្រជុំទល់មុខ រវាងថ្នាក់ដឹកនាំ AIPA និងប្រមុខដឹកនាំអាស៊ាន លើកទី១៥ នឹងប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៦ ខែវិច្ឆិកា ឆ្នាំ២០២៦ ជាវេទិកាដ៏មានសារៈសំខាន់សំខាន់ក្នុងការផ្សារភ្ជាប់ទំនាក់ទំនងរវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិអាស៊ាន ដើម្បីពង្រឹងកិច្ចសហប្រតិបត្តិការ និងដោះស្រាយបញ្ហាប្រឈមរួមក្នុងតំបន់ សំដៅជំរុញសន្តិភាព ស្ថិរភាព និងការអភិវឌ្ឍប្រកបដោយចីរភាព៕