ព្រះករុណាជាអម្ចាស់ជីវិតតម្កល់លើត្បូង ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ស្តេចយាងជាព្រះរាជាធិបតីដ៏ខ្ពង់ខ្ពស់បំផុត ទតព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នាព្រះពន្លាជ័យ មុខព្រះបរមរាជវំាង ក្នុងថ្ងៃទី២៨ ខែវិច្ឆិកា ឆ្នាំ២០២៣ ដែលជាថ្ងៃបិទបញ្ចប់នូវព្រះរាជពិធីបុណ្យគម្រប់រយៈពេលបីថ្ងៃ។
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា រួមនឹងឥស្សរជនជាន់ខ្ពស់សំខាន់ៗជាច្រើនទៀត មាន សម្តេច ឯកឧត្តម លោកជំទាវ ជាថ្នាក់ដឹកនាំឧត្តមក្រុមប្រឹក្សាព្រះមហាក្សត្រ ថ្នាក់ដឹកនាំស្ថាប័ននីតិប្បញ្ញត្តិ នីតិប្រតិបត្តិ សមាជិកសមាជិកា ព្រឹទ្ធសភា រដ្ឋសភា និងរាជរដ្ឋាភិបាល បានយាង និងអញ្ជើញដង្ហែព្រះករុណាជាអម្ចាស់ជីវិតតម្កល់លើត្បូងជាទីគោរពសក្ការៈដ៏ខ្ពង់បំផុត។
នៅក្នុងថ្ងៃបញ្ចប់ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកនេះ គេសង្កេតឃើញវត្តមានកាន់តែយ៉ាងច្រើនកុះករ របស់បងប្អូនប្រជាពលរដ្ឋ មកពីគ្រប់ទិសទី រួមនឹងភ្ញៀវជាតិ ភ្ញៀវអន្តរជាតិ បានចូលរួមទស្សនា និងដើរកម្សាន្ត ក្នុងព្រះពិធីបុណ្យយ៉ាងសប្បាយរីករាយជាទីបំផុត។
ក្រោយពីការប្រណំាងទូកង បានចប់សព្វគ្រប់ជាស្ថាពរ មាន ប្រារព្ធពិធីកាត់ព្រ័ត្រ ដែលជាការបិទបញ្ចប់នូវព្រះរាពិធីបុណ្យដោយបរិបូរណ៍។ ព្រះករុណជាអម្ចាស់ជីវិតតម្កល់លើត្បូង សម្តេចយាងប្រទាននូវព្រះរាជរង្វាន់ជានិមិត្តរូប ជូនដល់ក្រុមកីឡាករ និងកីឡាការនីទូកង ដែលទទួលបានជ័យលាភី ផងដែរ។
ក្រោមម្លប់សុខសន្តិភាព និងការអភិវឌ្ឍលើគ្រប់វិស័យ នៅឆ្នាំនេះ រាជរដ្ឋាភិបាលបានរៀបចំព្រះរាជពិធីបុណ្យជាតិដ៏ល្អផូរផងបានយ៉ាងអធិកអធម ដំណើរទៅដោយរលូន ក្រោមបរិយាកាសសប្បាយរីករាយយ៉ាងក្រៃលែងជាទីបំផុត និងបានបង្ហាញពីវប្បធម៌ អរិយធម៌ដ៏ចំណាស់ និងរុងរឿងរបស់ខ្មែរ ជូនដល់ពិភពលោកបានដឹង និងបានស្គាល់កាន់តែច្បាស់។
សន្តិភាពមិនត្រឹមផ្តល់ឱកាសឱ្យយើងរួមគ្នាកសាងអភិវឌ្ឍន៍ប្រទេសជាតិ ឱ្យមានការរីកចម្រើនជាលំដាប់ប៉ុណ្ណោះទេ។ សន្តិភាពបានផ្តល់នូវលទ្ធភាព គ្រប់យ៉ាងដល់យើងក្នុងការរៀបចំពិធីបុណ្យជាតិធំៗ ក៏ដូចជាការអភិរក្ស និងអភិវឌ្ឍន៍នូវវប្បធម៌ ប្រពៃណីជាតិ ឱ្យបានស្ថិតស្ថេរគង់វង្សជាជាអមតៈតរៀងទៅ។ បើគ្មានសន្តិភាពទេ ក៏គ្មានពិធីបុណ្យអុំទូកថ្ងៃនេះដែរ។
សូមជូនពរបងប្អូនប្រជាពលរដ្ឋ ក្រុមកីឡាករ កីឡាការិនី ទាំងអស់ ធ្វើដំណើរត្រឡប់ទៅកាន់ភូមិស្រុកវិញក្របដោយសុខ សុវត្ថិភាព គ្រប់ៗគ្នានិងជួបប្រទះតែពុទ្ធពរទាំងបួនប្រការ អាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ ៕
អត្ថបទ និងរូបភាព ដោយនាយកដ្ឋានព័ត៌មាន