សភានៃព្រះរាជាណាចក្រកម្ពុជា សហការជាមួយអង្គការសុខភាពពិភពលោក (WHO) នឹងធ្វើជាម្ចាស់ផ្ទះរៀបចំ «វេទិកាសមាជិកសភាអាស៊ី-ប៉ាស៊ីហ្វិក ស្តីពីសុខភាពសកល លើកទី៩» ចាប់ពីថ្ងៃទី១១ ដល់ថ្ងៃទី១៣ ខែសីហា ឆ្នាំ២០២៦ នៅវិមានរដ្ឋសភា ក្រោមប្រធានបទ «ការគ្របដណ្តប់សុខភាពជាសកលក្នុងយុគសម័យនៃការប្រែប្រួលអាកាសធាតុ និងបញ្ញាសិប្បនិម្មិត (AI)»។
ព្រឹត្តិការណ៍ថ្នាក់តំបន់ដ៏មានសារៈសំខាន់នេះ ប្រមូលផ្តុំគណៈប្រតិភូសមាជិកសភា និងភ្ញៀវកិត្តិយសមកពី ១៦ ប្រទេស ព្រមទាំងដៃគូអភិវឌ្ឍន៍ និងអ្នកជំនាញជាច្រើនរូប ដើម្បីផ្លាស់ប្តូរយោបល់ ចែករំលែកបទពិសោធន៍ និងលើកកម្ពស់សេវាសុខភាពសាធារណៈជូនប្រជាពលរដ្ឋក្នុងតំបន់អាស៊ី-ប៉ាស៊ីហ្វិក។
បន្ថែមពីលើកិច្ចប្រជុំពិភាក្សាលើប្រធានបទសំខាន់ៗទាំង៤ គណៈប្រតិភូក៏នឹងចុះទស្សនកិច្ចសិក្សាឈ្វេងយល់ពីការផ្តល់សេវាសុខភាពនៅមណ្ឌលសុខភាព អង្គភ្នំ និងមន្ទីរពេទ្យ Sonja Kill ក្នុងខេត្តកំពតផងដែរ។
