ខេត្តរតនគិរី៖ ឯកឧត្តម គិត ទ្រី សមាជិកគណៈកម្មការទី១ នៃរដ្ឋសភា និងជាតំណាងរាស្រ្តមណ្ឌលខេត្តរតនគិរី អមដំណើរដោយ លោក ម៉ួង ប៉ាង អភិបាលរងខេត្តរតនគិរី ព្រមទាំងលោកនាយករងរដ្ឋបាលខេត្ត លោកប្រធានមន្ទីរពាក់ព័ន្ធ ថ្នាក់ដឹកនាំនៃគណៈអភិបាលស្រុក និងសហការី នាព្រឹកថ្ងៃទី២ ខែមិថុនា ឆ្នាំ២០២៦ បានអញ្ជើញចុះជួបសំណេះសំណាលជាមួយក្រុមប្រឹក្សាឃុំ មេភូមិ អនុភូមិ និងជំនួយការភូមិទាំង ០៣ នៃឃុំសិរីមង្គល ស្រុកកូនមុំ ខេត្តរតនគិរី ដើម្បីស្វែងយល់ពីវឌ្ឍនភាពការងារនៅតាមមូលដ្ឋាន ព្រមទាំងពិភាក្សាលើការធានារក្សាបាននូវសន្តិភាព សណ្តាប់ធ្នាប់ និងសន្តិសុខសង្គម ជូនដល់ប្រជាពលរដ្ឋក្នុងមូលដ្ឋាន។

បន្ទាប់ពីបានបញ្ចប់កិច្ចសំណេះសំណាលជាមួយមន្ត្រីមូលដ្ឋានរួចមក ឯកឧត្តម គិត ទ្រី និងក្រុមការងារ បានបន្តអញ្ជើញទៅកាន់វត្តគង្គាសោភិត (ហៅវត្តស្រែពកធំ) ដែលស្ថិតនៅភូមិស្រែពកធំ ឃុំសិរីមង្គល ស្រុកកូនមុំ។

ក្នុងឱកាសនោះ ឯកឧត្តម បាននាំយកនូវទេយ្យទាន គ្រឿងឧបភោគបរិភោគ ព្រមទាំងបច្ច័យសាមគ្គីចំនួន ២.០១០.០០០រៀល ប្រគេនដល់ព្រះចៅអធិការវត្ត ដើម្បីជាការរួមចំណែកក្នុងការទ្រទ្រង់ និងលើកកម្ពស់វិស័យព្រះពុទ្ធសាសនា ដែលជាសាសនារបស់រដ្ឋឱ្យកាន់តែរីកចម្រើនថែមទៀត៕