Home » ព័ត៌មាន » ព័ត៌មានប្រចាំថ្ងៃ » យុវជនខ្មែររួមគ្នាច្នៃប្រឌិតផលិតផល “បាយផាត់ ញ៉ាំៗ” ក្នុងទុនជាង ១០ម៉ឺនដុល្លារ ទទួលបានការសរសើរពីតំណាងរាស្ត្រមណ្ឌលព្រៃវែង

យុវជនខ្មែររួមគ្នាច្នៃប្រឌិតផលិតផល “បាយផាត់ ញ៉ាំៗ” ក្នុងទុនជាង ១០ម៉ឺនដុល្លារ ទទួលបានការសរសើរពីតំណាងរាស្ត្រមណ្ឌលព្រៃវែង Prepaired By: NARA1472 ​ Date: (6/1/2026 7:05:26 PM ) ព្រៃវែង៖ ឯកឧត្តម ជាម ប៉េអា តំណាងរាស្ត្រមណ្ឌលខេត្តព្រៃវែង និងជាសមាជិកគណៈកម្មការទី២ នៃរដ្ឋសភា នៅព្រឹកថ្ងៃទី១ ខែមិថុនា ឆ្នាំ២០២៦ បានអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវផលិតផល “បាយផាត់ ញ៉ាំៗ” របស់សហគ្រាសវ័យក្មេង សុភមង្គល ស្ថិតនៅឃុំល្វេ ស្រុកស៊ីធរកណ្ដាល ខេត្តព្រៃវែង។ ពិធីសម្ពោធនេះ បានប្រព្រឹត្តទៅយ៉ាងអធិកអធម ដោយមានការចូលរួមពីថ្នាក់ដឹកនាំមូលដ្ឋាន មន្ត្រីរាជការ សិស្សានុសិស្ស អាជីវករ ប្រជាពលរដ្ឋ និងភ្ញៀវកិត្តិយសយ៉ាងច្រើនកុះករ។ ព្រឹត្តិការណ៍នេះបានឆ្លុះបញ្ចាំងពីការរីកចម្រើនរបស់សហគ្រាសក្នុងស្រុក ដែលបានខិតខំអភិវឌ្ឍផលិតផលកែច្នៃអាហារប្រកបដោយគុណភាព សុវត្ថិភាព និងឆ្លើយតបទៅតាមតម្រូវការទីផ្សារ។ ក្នុងឱកាសនោះ ឯកឧត្តម ជាម ប៉េអា បានមានប្រសាសន៍ថា សហគ្រាសវ័យក្មេង សុភមង្គល មានទុនវិនិយោគសរុបជាង ១០ម៉ឺនដុល្លារអាមេរិក ក្រោមការប្រមូលផ្តុំគ្នាដោយក្រុមយុវជនមានវ័យចន្លោះពី ១៨ ដល់ ២៧ ឆ្នាំ ដែលមានបទពិសោធន៍ក្នុងវិស័យផលិតមាតិកាឌីជីថល និងការផ្សព្វផ្សាយតាមបណ្តាញសង្គម ដូចជា Facebook, YouTube និង TikTok ជាដើម។ ក្រុមសហគ្រិនវ័យក្មេងទាំងនេះ បានរួមគ្នាបង្កើត សហគ្រាសមួយដែលផ្ដោតលើការកែច្នៃផលិតផលកសិកម្មក្នុងស្រុក ដើម្បីបង្កើតតម្លៃបន្ថែម។ ឯកឧត្តម បានសម្តែងនូវការកោត សរសើរចំពោះស្មារតីច្នៃប្រឌិត ការហ៊ានប្រថុយប្រថាននិងវិនិយោគ ព្រមទាំងការខិតខំប្រឹងប្រែងរបស់ក្រុមយុវជន ដែលបានប្រែក្លាយបញ្ហាប្រឈមទៅជាឱកាសអភិវឌ្ឍផលិតកម្មក្នុងស្រុក។ ឯកឧត្តមបានបញ្ជាក់ថា ផលិតផល “បាយផាត់ ញ៉ាំៗ”បានកើតឡើងពីឆន្ទៈរបស់យុវជនខ្មែរក្នុងការលើកកម្ពស់ផលិតផលជាតិ តាមរយៈការប្រើប្រាស់វត្ថុធាតុដើមក្នុងស្រុក ដែលសុទ្ធសឹងតែជាទិន្នផលរបស់ប្រជាកសិករខ្មែរ រួមមាន អង្ករផ្ការំដួល ស្ករត្នោត ស្លឹកខ្ទឹម និងប្រេងឆាផលិតពីគ្រាប់ធញ្ញជាតិ។ ជាមួយគ្នានេះ ឯកឧត្តមក៏បានលើកទឹកចិត្តឱ្យសហគ្រាសបន្តពង្រឹងគុណភាពផលិតផល ពង្រីកទីផ្សារ និងបង្កើនសមត្ថភាពប្រកួតប្រជែង ដើម្បីឱ្យផលិតផលខ្មែរកាន់តែទទួលបានការគាំទ្រយ៉ាងទូលំទូលាយ ទាំងក្នុង និងក្រៅប្រទេស។ ទន្ទឹមនឹងនេះ សហគ្រាសក៏បានរួមចំណែកយ៉ាងសំខាន់ ក្នុងការបង្កើតការងារជូនយុវជនក្នុងមូលដ្ឋាន ជួយបង្កើនប្រាក់ចំណូល និងលើកកម្ពស់ជីវភាពរស់នៅរបស់ប្រជាពលរដ្ឋផងដែរ។ ការសម្ពោធផលិតផល “បាយផាត់ ញ៉ាំៗ” នាពេលនេះ មិនត្រឹមតែជាសមិទ្ធផលថ្មីរបស់សហគ្រាសវ័យក្មេង សុភមង្គល ប៉ុណ្ណោះទេ ប៉ុន្តែថែមទាំងជាការបង្ហាញពីសក្តានុពល និងសមត្ថភាពរបស់យុវជនខ្មែរ ក្នុងការបង្កើតអាជីវកម្មដោយផ្អែកលើធនធានក្នុងស្រុក រួមចំណែកអភិវឌ្ឍសេដ្ឋកិច្ចមូលដ្ឋាន និងជំរុញការរីកចម្រើនប្រកបដោយចីរភាពរបស់ប្រទេសជាតិ៕