ពោធិ៍សាត់៖ ក្នុងអំឡុងពេលចុះបេសកកម្មការងារនៅក្នុងមូលដ្ឋានខេត្តពោធិ៍សាត់ និងខេត្តកំពង់ឆ្នាំង ចាប់ពីថ្ងៃទី១ ដល់ ថ្ងៃទី៣ ខែមិថុនា ឆ្នាំ២០២៦ ឯកឧត្តម ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ (គណៈកម្មការទី៧) នៃរដ្ឋសភា នាថ្ងៃទី១ ខែមិថុនា ឆ្នាំ២០២៦ នេះ បានអញ្ជើញចុះទស្សនកិច្ចស្វែងយល់ពីសក្តានុពលទេសចរណ៍ នៅស្រុកវាលវែង ដោយមានការអមដំណើរពីប្រធានមន្ទីរទេសចណ៍ និងអាជ្ញាធរស្រុក។
ដំណើរទស្សនកិច្ចនេះ គឺដើម្បីសិក្សាស្វែងយល់ផ្ទាល់អំពីស្ថានភាពអភិវឌ្ឍន៍ វិសាលភាព និងឱកាសវិនិយោគលើវិស័យទេសចរណ៍នៅក្នុងស្រុកវាលវែង និងដើម្បីប្រមូលព័ត៌មាន និងស្តាប់នូវរាល់បញ្ហាប្រឈម ឬតម្រូវការចាំបាច់របស់អាជ្ញាធរមូលដ្ឋាន និងសហគមន៍ទេសចរណ៍ក្នុងការគ្រប់គ្រង និងអភិរក្សតំបន់រមណីយដ្ឋាន។
ស្រុកវាលវែងមានធនធានធម្មជាតិដ៏សម្បូរបែប ហើយជាតំបន់ប្រកបដោយសក្តានុពលខ្ពស់លើ ទេសចរណ៍ធម្មជាតិ និងទេសចរណ៍ផ្សងព្រេង មានភូមិសាស្ត្រអំណោយផល ហ៊ុមព័ទ្ធដោយជួរភ្នំក្រវាញ ព្រៃឈើខៀវស្រងាត់ ទឹកធ្លាក់ និងអាកាសធាតុត្រជាក់អំណោយផល ដូចជាតំបន់ភ្នំខ្នងផ្សារ តំបន់តំបន់ថ្មដា និងអូរសោម ជាដើមដោយសារតំបន់នេះកំពុងក្លាយជាគោលដៅទេសចរណ៍ដ៏ពេញនិយមសម្រាប់ភ្ញៀវជាតិ និងអន្តរជាតិ ដែលចូលចិត្តការសម្រាកលំហែកាយបែបធម្មជាតិ និងការបោះតង់។
គណៈកម្មការទី៧នៃរដ្ឋសភា បានផ្តល់អនុសាសន៍សំខាន់ៗមួយចំនួនដល់មន្ទីរទេសចរណ៍ អាជ្ញាធរមូលដ្ឋាន និងម្ចាស់អាជីវកម្ម ត្រូវពង្រឹងការគ្រប់គ្រងបរិស្ថាន ត្រូវយកចិត្តទុកដាក់ខ្ពស់លើការគ្រប់គ្រងកាកសំណល់ និងអនាម័យ ដើម្បីរក្សាសម្រស់ធម្មជាតិឱ្យនៅស្រស់ស្អាតជានិរន្តរ៍ ត្រូវរៀបចំការពារសន្តិសុខ សុវត្ថិភាព និងការផ្តល់សេវាបដិសណ្ឋារកិច្ចឱ្យបានល្អជូនដល់ភ្ញៀវទេសចរ និងការបង្កើតផលិតផលទេសចរណ៍កែច្នៃក្នុងស្រុក ដើម្បីលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋនៅក្នុងតំបន់នោះ៕