រាជធានីភ្នំពេញ៖ គណៈប្រតិភូសភាហុងគ្រី ដឹកនាំដោយ ឯកឧត្តមបណ្ឌិត György SUCH អគ្គលេខាធិការរដ្ឋសភានៃប្រទេសហុងគ្រី បានអញ្ជើញមកដល់ទឹកដីនៃព្រះរាជាណាចក្រកម្ពុជាហើយ នារសៀលថ្ងៃទី៩ ខែមីនា ឆ្នាំ២០២៦ នេះ ដើម្បីបំពេញទស្សនកិច្ចការងាររយៈពេល ១ សប្តាហ៍ ចាប់ពីថ្ងៃទី៩ ដល់ថ្ងៃទី១៥ ខែមីនា ឆ្នាំ២០២៦។
ក្នុងបដិសណ្ឋារកិច្ច នៅអាកាសយានដ្ឋានអន្តរជាតិតេជោ ឯកឧត្តមបណ្ឌិត កែវ ពិសិដ្ឋ អគ្គលេខាធិការរងប្រចាំការ និងជានាយកខុទ្ទកាល័យសម្តេចប្រធានរដ្ឋសភា ក្នុងនាមតំណាងអគ្គលេខាធិការដ្ឋានរដ្ឋសភាកម្ពុជា បានអញ្ជើញទទួលស្វាគមន៍យ៉ាងកក់ក្តៅបំផុតចំពោះ ឯកឧត្តមបណ្ឌិត György SUCH និងគណៈប្រតិភូ។ ក្នុងពិធីទទួលនោះ ក៏មានការចូលរួមពី ឯកឧត្តម ព្រហ្ម វិរៈ អគ្គនាយកទំនាក់ទំនងអន្តរជាតិ ពិធីការ និងព័ត៌មាន ផងដែរ។
ក្នុងអំឡុងពេលស្នាក់នៅ និងបំពេញការងារនៅកម្ពុជារយៈពេល៧ថ្ងៃនេះ គណៈប្រតិភូរដ្ឋសភាហុងគ្រី នឹងចូលជួបសម្ដែងការគួរសម និងពិភាក្សាការងារជាមួយថ្នាក់ដឹកនាំកំពូលៗនៃស្ថាប័ននីតិប្បញ្ញត្តិកម្ពុជា រួមមាន៖
• សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា
• ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា
• ឯកឧត្តម ឡេង ប៉េងឡុង អគ្គលេខាធិការរដ្ឋសភា
ក្រៅពីជំនួបផ្លូវការនៅរាជធានីភ្នំពេញ គណៈប្រតិភូរដ្ឋសភាហុងគ្រី ក៏នឹងបន្តដំណើរទៅកាន់ខេត្តសៀមរាប ដើម្បីស្វែងយល់ពីគម្រោងអភិវឌ្ឍន៍សំខាន់ៗ និងទស្សនាបេតិកភណ្ឌពិភពលោកដ៏ល្បីល្បាញ មានជាអាទិ៍ ប្រាសាទអង្គរវត្ត ប្រាសាទបាយ័ន ប្រាសាទតាព្រហ្ម និងតំបន់បឹងទន្លេសាបជាដើម។
ដំណើរទស្សនកិច្ចនេះ មិនត្រឹមតែជាការផ្លាស់ប្តូរបទពិសោធន៍រវាងអគ្គលេខាធិការដ្ឋាននៃសភាទាំងពីរប៉ុណ្ណោះទេ ប៉ុន្តែថែមទាំងជាឱកាសដ៏ល្អសម្រាប់កម្ពុជា ក្នុងការបង្ហាញទៅកាន់មិត្តអន្តរជាតិនូវរូបភាពពិតនៃ "សន្តិភាព ស្ថិរភាព និងការអភិវឌ្ឍ" ព្រមទាំងអរិយធម៌ដ៏ឧត្តុង្គឧត្តម ដែលកម្ពុជាកំពុងខិតខំអភិរក្ស។
បេសកកម្មរយៈពេល៧ថ្ងៃនេះ ត្រូវបានរំពឹងថានឹងពង្រីកវិសាលភាពនៃកិច្ចសហប្រតិបត្តិការនីតិប្បញ្ញត្តិរវាងប្រទេសទាំងពីរ ឱ្យកាន់តែរឹងមាំ និងមានផ្លែផ្កាសម្រាប់ផលប្រយោជន៍រួមនៃប្រជាជាតិទាំងពីរ កម្ពុជា-ហុងគ្រី៕