Home » ព័ត៌មាន » ព័ត៌មានប្រចាំថ្ងៃ » សម្តេចប្រធានរដ្ឋសភា ប្រារព្ធពិធីសូត្រមន្ត និងបួងសួងតាមបូជនីយដ្ឋានសំខាន់ៗក្នុងខេត្តសៀមរាប សូមឱ្យព្រះរាជាណាចក្រកម្ពុជា ថ្នាក់ដឹកនាំ និងប្រជាពលរដ្ឋទាំងអស់ ទទួលបានសេចក្តីសុខចម្រើន

សម្តេចប្រធានរដ្ឋសភា ប្រារព្ធពិធីសូត្រមន្ត និងបួងសួងតាមបូជនីយដ្ឋានសំខាន់ៗក្នុងខេត្តសៀមរាប សូមឱ្យព្រះរាជាណាចក្រកម្ពុជា ថ្នាក់ដឹកនាំ និងប្រជាពលរដ្ឋទាំងអស់ ទទួលបានសេចក្តីសុខចម្រើន Prepaired By: NARA1472 ​ Date: (3/8/2026 8:22:35 PM ) នៅក្នុងឱកាសចុះជួបសំណេះសំណាលសួរសុខទុក្ខវីរយុទ្ធជន និងចែកអំណោយជូនពលរដ្ឋភៀសសឹក នៅក្នុងខេត្តសៀមរាប សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានអញ្ជើញជាអធិបតីក្នុងពិធីបួងសួងនៅតាមបូជនីយដ្ឋានសំខាន់ៗក្នុងខេត្តសៀមរាប នៅរសៀលថ្ងៃទី៧ ខែមីនា ឆ្នាំ២០២៦ សូមសេចក្តីសុខ សេចក្តីចម្រើន ជូនដល់ព្រះរាជាណាចក្រកម្ពុជា ថ្នាក់ដឹកនាំ និងប្រជាពលរដ្ឋខ្មែរទាំងអស់។ កម្មវិធីបួងសួងនេះ បានប្រារព្ធធ្វើឡើងតាមទំនៀមទម្លាប់ ប្រពៃណី សាសនា និងជំនឿ នៅអាស្រមព្រះអង្គចេក ព្រះអង្គចម៖ វត្តព្រះឥន្ទកោសីយ៍  អភិរក្សដ្ឋានអង្គរ និងប្រាសាទអង្គរវត្ត។ សម្តេចប្រធានរដ្ឋសភា និងគណៈប្រតិភូ បានបូជាទៀនធូប និងគ្រឿងសក្ការៈ ចំពោះព្រះពុទ្ធរូប ព្រមទាំងការប្រារព្ធពិធីសូត្រមន្ត ដើម្បីសូមសេចក្តីសុខចម្រើន និងសូមបញ្ចៀសនូវជំងឺឧបទ្រពចង្រៃទាំងឡាយ ក៏ដូចជាគ្រោះធម្មជាតិនានា ឱ្យជៀសចេញឆ្ងាយពីទឹកដីនៃព្រះរាជាណា​ចក្រកម្ពុជា និងសូមប្រសិទ្ធពរជ័យដល់កងទ័ពជួរមុខ ឱ្យទទួលបានជ័យជម្នះលើខ្មាំងសត្រូវឈ្លានពាន នាំមកនូវជ័យជម្នះជូនប្រទេសជាតិគ្រប់ពេលវេលា។ សូមជម្រាបថា នៅថ្ងៃទី៨ ខែមីនា ស្អែកនេះ សម្ដេចមហារដ្ឋសភាធិការធិបតី ឃួន សុដារី នឹងអញ្ជើញចុះសួរសុខទុក្ខ និងប្រគល់អំណោយមនុស្សធម៌ ជូនជនភៀសសឹកប្រមាណជាង ៧០០ គ្រួសារ ដែលកំពុងស្នាក់នៅក្នុងជំរំភៀសសឹកក្នុងខេត្តសៀមរាប។ ការអញ្ជើញចុះជួបសំណេះសំណាល និងចែកអំណោយមនុស្សធម៌ដោយផ្ទាល់ដៃរបស់សម្ដេចប្រធានរដ្ឋសភា និងគណៈប្រតិភូចំពោះជនភៀសសឹក​នាពេលនេះ បានសបញ្ជាក់យ៉ាងច្បាស់ពីមនោសញ្ចេតនា និងការយកចិត្តទុកដាក់ខ្ពស់បំផុតរបស់សម្ដេចប្រធានរដ្ឋសភា ដែលតែងតែគិតគូរជាប់ជាប្រចាំចំពោះសុខទុក្ខ និងជីវភាពរស់នៅរបស់ប្រជាពលរដ្ឋដែលកំពុងជួបការលំបាកពីការឈ្លានពានរបស់ប្រទេសថៃ៕