ក្នុងបរិយាកាសដ៏ស្និទ្ធស្នាល និងពោរពេញដោយមិត្តភាព នាយប់ថ្ងៃទី២៧ ខែកុម្ភៈ ឆ្នាំ២០២៦ ឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា និងជាអនុប្រធានក្រុមមិត្តភាពសភាកម្ពុជា–បារាំង បានអញ្ជើញរៀបចំពិធីលៀងសាយភោជនសាមគ្គីជូន ឯកឧត្តម Thomas Lam ប្រធានគណៈប្រតិភូសភានៃសាធារណរដ្ឋបារាំង និងជាប្រធានក្រុមមិត្តភាពសភាបារាំង–កម្ពុជា ព្រមទាំងគណៈប្រតិភូ នៅភោជនីយដ្ឋានមាលាស្ថិតក្នុងខេត្តសៀមរាប។
ពិធីនេះធ្វើឡើងក្នុងគោលបំណង អបអរសាទរចំពោះវឌ្ឍនភាពនៃទំនាក់ទំនងការទូត និងកិច្ចសហប្រតិបត្តិការ យ៉ាងជិតស្និទ្ធរវាងស្ថាប័ននីតិប្បញ្ញត្តិនៃប្រទេសទាំងពីរ កម្ពុជា និងបារាំង ដែលមានតាំងពីយូរអង្វែងមកហើយ។
ភាគីទាំងពីរបានឆ្លៀតឱកាសនេះ ពិភាក្សា និងផ្លាស់ប្តូរមតិយោបល់លើការងារសភា ការពង្រឹងពហុភាគីនិយម និងការជំរុញការវិនិយោគ ព្រមទាំងវិស័យវប្បធម៌ និងអប់រំ ដែលជាសសរស្តម្ភនៃទំនាក់ទំនងទ្វេភាគី។
ឯកឧត្តម ឈាង វុន និងឯកឧត្តម Thomas Lam បានបង្ហាញនូវឆន្ទៈមោះមុតក្នុងការបន្តគាំទ្រគ្នាទៅវិញទៅមក និងបន្តជំរុញសកម្មភាពរបស់ក្រុមមិត្តភាពសភានៃប្រទេសទាំងពីរឱ្យកាន់តែសកម្ម និងមានផ្លែផ្កាបន្ថែមទៀត។
វត្តមានរបស់គណៈប្រតិភូសភាបារាំងនៅកម្ពុជានាពេលនេះ គឺជាសក្ខីភាពមួយបង្ហាញពីការយកចិត្តទុកដាក់ខ្ពស់របស់បារាំង ក្នុងការរឹតចំណងមិត្តភាពជាមួយកម្ពុជា ឱ្យកាន់តែរឹងមាំ និងឆ្លុះបញ្ចាំងពីជំនឿទុកចិត្តលើការដឹកនាំ និងការអភិវឌ្ឍរបស់រាជរដ្ឋាភិបាល និងរដ្ឋសភាកម្ពុជា៕