លោកជំទាវ ដួង វណ្ណា តំណាងរាស្រ្តមណ្ឌលខេត្តស្វាយរៀង តំណាងដ៏ខ្ពង់ខ្ពស់ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងសហការី បានអញ្ជើញចូលរួមគោរពវិញ្ញាណក្ខន្ធសព លោក សឿង ប៊ុនលី សាស្រ្តាចារ្យរងនៃសាកលវិទ្យាល័យស្វាយរៀង ដែលបានទទួលមរណភាព កាលពីថ្ងៃទី៥ ខែមករា ឆ្នាំ២០២៦ ដោយគ្រោះថ្នាក់ចរាចរណ៍ ។ 

ក្នុងឱកាសដ៏សោកសង្រេងនោះ លោកជំទាវ ដួង វណ្ណា បាននាំយកថវិកា សម្តេចកិត្តិសង្គហបណ្ឌិត ចំនួន ៥០០ដុល្លារអាមេរិក និង ១,១២០,០០០រៀល ចូលរួមរំលែកទុក្ខមរណទុក្ខជាមួយលោកស្រី ជុំ សុភាព ត្រូវជាភរិយានៃសព និងក្រុមគ្រួសារ ស្ថិតនៅភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ។ 

តាងនាម សម្តេចកិត្តិសង្គហបណ្ឌិត លោកជំទាវ បានសម្តែងនូវវិបយោគទុក្ខដ៏ក្រៀមក្រំជាមួយក្រុមគ្រួសារសព និងសូមឧទ្ទិសដល់វិញ្ញាណក្ខន្ធ លោកសាស្ត្រាចារ្យបានទៅកាន់ទីសុគតិភព និងសូមជូនពរដល់ភរិយា និងក្រុមគ្រួសារនៃសព សូមជួបប្រទះនូវពុទ្ធពរទាំងបួនប្រការ កុំបីឃ្លៀងឃ្លាតឡើយ។ 

ជាមួយនេះដែរ លោកជំទាវ ដួង វណ្ណា បានមានប្រសាសន៍សម្តែងនូវការសោកស្តាយចំពោះមរណភាពរបស់លោក សឿង ប៊ុនលី គឺជាការបាត់បង់ស្វាមី ឪពុក និងកូនប្រុសប្រកបដោយព្រហ្មវិហារធម៌ និងជាការបាត់បង់ធនធានសាស្រ្តាចារ្យដ៏សំខាន់មួយរូបរបស់សាកលវិទ្យាល័យស្វាយរៀង ដែលគណៈគ្រប់គ្រង សាស្ត្រាចារ្យ និងនិស្សិតផ្តល់ទំនុកចិត្ត គោរពស្រឡាញ់ និងកោតសរសើរ ជាលោកគ្រូមានសមត្ថភាពជ្រៅជ្រះ បញ្ចប់ការសិក្សាពីបរទេស បានស្រាវជ្រាវបោះពុម្ភស្នាដៃយ៉ាងសកម្ម ដែលបានទទួលស្គាល់ទាំងក្នុង និងក្រៅប្រទេស ។ 
 
លោកសាស្ត្រាចារ្យធ្លាប់បានចែករំលែកចំណេះដឹងដល់និស្សិតប្រកបដោយសីលធម៌ និងគុណធម៌ ដោយទទួលបានក្តីគោរពស្រឡាញ់ពីនិស្សិត សាស្រ្តាចារ្យ និងមន្ត្រីទូទាំងខេត្ត។ តែអកុសល លោកបានរងគ្រោះថ្នាក់ចរាចរណ៍ នៅចំថ្ងៃដែលនិស្សិតរបស់លោកជាច្រើនកំពុងចូលរួមពិធីទទួលសញ្ញាបត្របញ្ចប់ការសិក្សាថ្នាក់បរិញ្ញាបត្រជាន់ខ្ពស់ បរិញ្ញាបត្រ និងបរិញ្ញាបត្ររង នៅសាកលវិទ្យាល័យស្វាយរៀង៕