ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា នៅព្រឹកថ្ងៃទី៣១ ខែធ្នូ ឆ្នាំ២០២៤ បានអញ្ជើញទៅគោរពវិញ្ញាណក្ខន្ធឯកឧត្តមបណ្ឌិត Manmohan Singh អតីតនាយករដ្ឋមន្រ្តីឥណ្ឌា នៅស្ថានទូតឥណ្ឌាស្ថិតនៅផ្ទះលេខ៥០ ផ្លូវសម្តេចប៉ាន សង្កាត់បឹងរាំង ខណ្ឌដូនពេញ រាជធានីភ្នំពេញ។

ឯកឧត្តមអតីតនាយករដ្ឋមន្រ្តីឥណ្ឌា បានទទួលមរណភាពក្នុងជន្មាយុ៩២ឆ្នាំកាលពីយប់ថ្ងៃព្រហស្បតិ៍ ទី២៦ ខែធ្នូ ឆ្នាំ២០២៤នៅឯមន្ទីរពេទ្យមួយ ក្នុងរដ្ឋធានី New Delhi។

រដ្ឋសភាកម្ពុជាចូលរួមមរណទុក្ខជាមួយប្រជាជនឥណ្ឌាចំពោះការបាត់បង់ឯកឧត្តមបណ្ឌិត Manmohan Singh ដែលជា មេដឹកនាំដ៏ល្អមួយរូប។

ឯកឧត្តមបណ្ឌិត Manmohan Singh ត្រូវគេទទួលស្គាល់ ជាអ្នកដែលជួយកាច់ចង្កូតប្រទេសអាស៊ីខាងត្បូងមួយនេះ ទៅរកកំណើនសេដ្ឋកិច្ចមិនធ្លាប់មាន និងរំដោះប្រជាជនឥណ្ឌារាប់រយលាននាក់ឱ្យចេញផុតពីភាពទីទ័លក្រ៕