ភ្នំពេញ៖ នាព្រឹកថ្ងៃទី២២ ខែតុលា ឆ្នាំ២០២៦ នៅវិមានរដ្ឋសភា ឯកឧត្តម ឃួន ដាវិត អគ្គលេខាធិការរង ទទួលបន្ទុកកិច្ចការរដ្ឋបាល និងហិរញ្ញវត្ថុ នៃរដ្ឋសភា បានអញ្ជើញដឹកនាំកិច្ចប្រជុំដ៏មានសារៈសំខាន់មួយ ដើម្បីពិនិត្យ និងពិភាក្សាស៊ីជម្រៅស្តីពីបេសកកម្ម តួនាទី ភារកិច្ច និងការកែសម្រួលរចនាសម្ព័ន្ធរបស់ការិយាល័យលេខាធិការ នៃអគ្គលេខាធិការដ្ឋានរដ្ឋសភា។
កិច្ចប្រជុំនេះត្រូវបានរៀបចំឡើងក្នុងគោលបំណងពង្រឹងសមត្ថភាពស្ថាប័ន កែលម្អរបៀបរបបធ្វើការងារ និងលើកកម្ពស់ប្រសិទ្ធភាពនៃការផ្តល់សេវាគាំទ្រដល់ស្ថាប័ននីតិប្បញ្ញត្តិឱ្យកាន់តែមានភាពរលូន និងឆ្លើយតបទៅនឹងបរិបទនៃការរីកចម្រើនលើ
គ្រប់វិស័យ។
ឯកឧត្តម ឃួន ដាវិត បានគូសបញ្ជាក់ពីសារៈសំខាន់នៃការកែទម្រង់រដ្ឋបាលស្ថាប័នរដ្ឋសភា ដែលជាកាតាលីករដ៏សំខាន់ក្នុងការជួយសម្រាលបន្ទុក និងលើកកម្ពស់គុណភាពនៃការសម្រេចចិត្តរបស់ថ្នាក់ដឹកនាំរដ្ឋសភា។
ឯកឧត្តមបានជំរុញឱ្យអង្គប្រជុំទាំងមូលធ្វើការសិក្សាវាយតម្លៃឱ្យបានហ្មត់ចត់ មុននឹងសម្រេចដាក់ចេញនូវប្លង់រចនាសម្ព័ន្ធថ្មីដែលត្រូវអនុវត្ត។
កិច្ចប្រជុំមានការអញ្ជើញចូលរួមផងដែរពី ឯកឧត្តម លោក លោកស្រី ជាអគ្គនាយក អគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ អនុប្រធានការិយាល័យ និងមន្ត្រីជំនាញពាក់ព័ន្ធផងដែរ ៕
