ភ្នំពេញ៖ ឯកឧត្តម វង សូត អនុប្រធានទី២ រដ្ឋសភា តំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជានៅព្រឹកថ្ងៃទី១៥ ខែតុលា ឆ្នាំ២០២៦ នេះ បានដឹកនាំគណៈប្រតិភូជាន់ខ្ពស់រដ្ឋសភា អញ្ជើញថ្វាយកម្រងផ្កាគោរពព្រះវិញ្ញាណក្ខន្ធ ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» គម្រប់ខួប ១៤ឆ្នាំ នៅមណ្ឌបព្រះបរមរូប ក្នុងសួនច្បារខាងកើតវិមានឯករាជ្យ។

ក្នុងពិធីដ៏មហោឡារិកនេះ ថ្នាក់ដឹកនាំ និងសមាជិក សមាជិការដ្ឋសភា ដែលជាតំណាងឱ្យប្រជារាស្ត្រខ្មែរទូទាំងប្រទេស បានលំឱនកាយវាចាចិត្តស្មឹងស្មាធិ៍ ឧទ្ទិសបួងសួងថ្វាយព្រះរាជកុសល និងសម្តែងនូវកតញ្ញូតាធម៌ដ៏ជ្រាលជ្រៅបំផុត ចំពោះព្រះមហាករុណាទិគុណដ៏ធំធេងមិនអាចកាត់ថ្លៃបានរបស់ព្រះអង្គ ក្នុងការទាមទារឯករាជ្យជាតិ ការពារបូរណភាពទឹកដី និងការបង្រួបបង្រួមជាតិខ្មែរ។

សូមរំឭកថា ព្រះករុណា ព្រះបរមរតនកោដ្ឋ បានយាងសោយព្រះពិរាល័យ កាលពីថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ ៩០ព្រះវស្សា នៅរាជធានីប៉េកាំង សាធារណរដ្ឋប្រជាមានិតចិន។ ជារៀងរាល់ឆ្នាំ រាជរដ្ឋាភិបាលបានកំណត់យកថ្ងៃទី១៥ ខែតុលា ជាទិវាជាតិសម្រាប់ថ្នាក់ដឹកនាំស្ថាប័នកំពូលៗ មន្ត្រីរាជការ និងប្រជាពលរដ្ឋគ្រប់មជ្ឈដ្ឋាន ជួបជុំគ្នាគោរពព្រះវិញ្ញាណក្ខន្ធ ដើម្បីចារឹកទុកនូវព្រះរាជគុណូបការៈដ៏ថ្លៃថ្លារបស់ព្រះអង្គ ចំពោះជាតិ និងមាតុភូមិ៕