រាជធានីភ្នំពេញ៖ លោកជំទាវ កុល ធារិន សមាជិកាគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា (គណៈកម្មការទី២) និងជាតំណាងរាស្ត្រមណ្ឌលខេត្តកំពង់ចាម នៅថ្ងៃទី១៣ ខែតុលា ឆ្នាំ២០២៦ បានអញ្ជើញចុះសួរសុខទុក្ខ និងនាំយកអំណោយទៅប្រគល់ជូន លោក ទឹម ប៊ុនឈឿន អតីតប្រធានសាខាពន្ធដារខេត្តកំពង់ចាម ដែលកំពុងសម្រាកព្យាបាលជំងឺនៅមន្ទីរពេទ្យកាល់ម៉ែត រាជធានីភ្នំពេញ។
នៅក្នុងឱកាសនោះ លោកជំទាវ កុល ធារិន បានសម្តែងនូវការព្រួយបារម្ភយ៉ាងខ្លាំង និងបានសាកសួរដោយយកចិត្តទុកដាក់បំផុតអំពីស្ថានភាពសុខភាព ក៏ដូចជាដំណើរការនៃការព្យាបាលជំងឺរបស់ លោក ទឹម ប៊ុនឈឿន។ ជាមួយគ្នានេះ លោកជំទាវ ក៏បាននាំនូវការផ្តាំផ្ញើសួរសុខទុក្ខ និងជូនពរសព្ទសាធុការពីថ្នាក់ដឹកនាំស្ថាប័នជាតិ ជូនចំពោះលោកអតីតប្រធានសាខាពន្ធដារ សូមឱ្យឆាប់បានជាសះស្បើយពីជំងឺ មានកម្លាំងពលំមាំមួន និងមានសុខភាពល្អបរិបូរណ៍ឡើងវិញ ដើម្បីបានត្រឡប់ទៅរស់នៅជួបជុំក្រុមគ្រួសារវិញក្នុងពេលឆាប់ៗខាងមុខនេះ។
សកម្មភាពអញ្ជើញចុះសួរសុខទុក្ខនាពេលនេះ បានស្តែងឱ្យឃើញយ៉ាងច្បាស់ពីស្មារតីសាមគ្គីភាព មនោសញ្ចេតនាស្រឡាញ់រាប់អានយ៉ាងជ្រាលជ្រៅ និងការយកចិត្តទុកដាក់ខ្ពស់ចំពោះអតីតថ្នាក់ដឹកនាំ ក៏ដូចជាមន្ត្រីរាជការ ដែលបានខិតខំលះបង់កម្លាំងកាយចិត្ត បម្រើជាតិ មាតុភូមិ និងប្រជាពលរដ្ឋនាពេលកន្លងមក៕
