ទីក្រុងអារ៉ូហ្សា-ប្រទេសតង់ហ្សានី៖ លោកជំទាវ ខេង សំវ៉ាដា អនុប្រធានគណៈកម្មការទី៧ នៃរដ្ឋសភា និងឯកឧត្តម ទី សុគន្ធ លេខាធិការគណៈកម្មការទី៥ នៃរដ្ឋសភា នាថ្ងៃទី៧ ខែតុលា ឆ្នាំ២០២៦ បានបន្តអញ្ជើញចូលរួមអម ឯកឧត្តម អ៊ុច បូររិទ្ធ អនុប្រធានទី១ នៃព្រឹទ្ធសភា និងជាប្រធានគណៈប្រតិភូជាន់ខ្ពស់សភាកម្ពុជា ក្នុងកិច្ចពិភាក្សាទូទៅ នៃមហាសន្និបាតសហភាពអន្តរសភា លើកទី១៥៣ (153rd IPU Assembly) ដែលប្រព្រឹត្តទៅចាប់ពីថ្ងៃទី៥ ដល់ថ្ងៃទី៩ ខែតុលា ឆ្នាំ២០២៦ នាទីក្រុងអារ៉ូហ្សា ប្រទេសតង់ហ្សានី។

កិច្ចពិភាក្សាទូទៅ នៅថ្ងៃទី៧ ខែតុលា ឆ្នាំ២០២៦ បានបន្តដោយការចូលរួមថ្លែងសុន្ទរកថារបស់សភាប្រទេសជាសមាជិក និងមានរបៀបវារៈសំខាន់មួយ ស្តីពីការបោះឆ្នោតទៅលើរបៀបវារៈបន្ទាន់ (Emergency item) ដើម្បីដាក់ជូនមហាសន្និបាតធ្វើការពិភាក្សា។

សូមបញ្ជាក់ជូនថា របៀបវារៈបន្ទាន់ដែលបានស្នើដោយប្រទេសជាសមាជិក នៅក្នុងមហាសន្និបាត IPU លើកទី១៥៣ មានចំនួន ៤ គឺ៖

១. «ការអំពាវនាវឱ្យមានសកម្មភាពជាបន្ទាន់របស់សភា ដើម្បីធានាដល់សន្តិសុខ និងសិទ្ធិសេរីភាពនៃការប្រើប្រាស់ដែនសមុទ្រ និងនាវាចរណ៍ និងការធ្វើពាណិជ្ជកម្មអន្តរជាតិ ស្របតាមច្បាប់អន្តរជាតិ» ស្នើដោយប្រទេសបារ៉ែន និងគាំទ្រដោយក្រុមប្រទេសអារ៉ាប់។

២. «ការថ្កោលទោសសហរដ្ឋអាមេរិក និងអ៊ីស្រាអែល ចំពោះការប្រើប្រាស់កម្លាំងទ័ពអាកាស និងការបិទខ្ទប់ផ្លូវទឹកទៅលើសាធារណរដ្ឋអ៊ីស្លាមអ៊ីរ៉ង់ ដែលនេះគឺជាការរំលោភបំពានទៅនឹងច្បាប់អន្តរជាតិ និងគោលការណ៍នៃការមិនជ្រៀតជ្រែកផ្ទៃក្នុង» ស្នើដោយសភាអ៊ីរ៉ង់។

៣. «សកម្មភាពបន្ទាន់របស់សភា ចំពោះគ្រោះធម្មជាតិបណ្តាលមកពីការប្រែប្រួលអាកាសធាតុ និងពង្រឹងភាពធន់នៅក្នុងតំបន់ Himalaya និងក្រុមដែលងាយរងគ្រោះផ្សេងៗ» ស្នើដោយសភានេប៉ាល់។

៤. ស្នើដោយសភាអ៊ុយក្រែន ស្តីពី «សកម្មភាពជាបន្ទាន់របស់សភា ក្នុងការប្រកាន់ខ្ជាប់ច្បាប់អន្តរជាតិ ដើម្បីការពារប្រជាជន និងហេដ្ឋារចនាសម្ព័ន្ធសំខាន់ៗដែលបម្រើផលប្រយោជន៍ប្រជាជន ក្នុងអំឡុងពេលដែលមានជម្លោះដោយប្រដាប់អាវុធ»។

ក្រោយមក សភាអ៊ុយក្រែនបានទម្លាក់ចោលការស្នើរបៀបវារៈបន្ទាន់របស់ខ្លួន។ ហេតុនេះ របៀបវារៈបន្ទាន់មានចំនួនតែ ៣ ប៉ុណ្ណោះ ដែលត្រូវបានដាក់សម្រាប់ការបោះឆ្នោត។

ជាលទ្ធផល មហាសន្និបាតបានបោះឆ្នោតគាំទ្រទៅលើរបៀបវារៈបន្ទាន់ ដែលស្នើដោយសភាប្រទេសនេប៉ាល់ ដើម្បីដាក់បញ្ចូលទៅក្នុងរបៀបវារៈនៃកិច្ចពិភាក្សាទូទៅនៅថ្ងៃបន្ទាប់៕