ខេត្តបាត់ដំបង៖ នាព្រឹកថ្ងៃអាទិត្យ ទី២៧ ខែកញ្ញា ឆ្នាំ២០២៦ តំណាងរាស្ត្រមណ្ឌលខេត្តបាត់ដំបងរួមមាន៖ ឯកឧត្តម ឈាង វុន ឯកឧត្តម ច័ន្ទ សុផល ឯកឧត្តម ឡោក ហួរ បានអញ្ជើញចូលរួមកម្មក្នុងពិធីសំណេះសំណាល និងចែកម៉ូតូជូនដល់សិស្សានុសិស្សដែលបានប្រឡងជាប់សញ្ញាបត្រមធ្យមសិក្សាទុតិយភូមិ ទទួលបាននិទ្ទេស A ចំនួន ៩០នាក់ សម្រាប់ឆ្នាំសិក្សា ២០២៥-២០២៦ ក្នុងខេត្តបាត់ដំបង។

ពិធីដ៏មានអត្ថន័យនេះ ប្រារព្ធធ្វើឡើងក្រោមអធិបតីភាពដ៏ខ្ពង់ខ្ពស់របស់ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលបាត់ដំបង នៅឯសាលមហោស្រពស្ទឹងសង្កែ ក្រុងបាត់ដំបង ខេត្តបាត់ដំបង។

ការផ្ដល់ជូននូវរង្វាន់លើកទឹកចិត្តជាម៉ូតូដល់សិស្សានុសិស្សនិទ្ទេស A នាពេលនេះ គឺជាការបង្ហាញពីការយកចិត្តទុកដាក់ខ្ពស់ និងការផ្ដល់តម្លៃយ៉ាងធំធេងពីសំណាក់ថ្នាក់ដឹកនាំ ក៏ដូចជារដ្ឋាភិបាល ចំពោះការខិតខំប្រឹងប្រែងរៀនសូត្ររបស់យុវជនជំនាន់ក្រោយ ដែលជាទំពាំងស្នងឫស្សីដ៏មានសក្ដានុពលក្នុងការអភិវឌ្ឍប្រទេសជាតិ។