ខេត្តរតនគិរី៖ រដ្ឋបាលស្រុកកូនមុំ នៅថ្ងៃអាទិត្យ ទី២៧ ខែកញ្ញា ឆ្នាំ២០២៦ នេះបានរៀបចំពិធីបុណ្យកាន់បិណ្ឌ វេនទី១ នៅវត្តគិរីសោភ័ណ្ឌ (ហៅ វត្តអូរផ្លង) ស្ថិតក្នុងឃុំត្រពាំងច្រេស ស្រុកកូនមុំ ខេត្តរតនគិរី។
ពិធីនេះប្រព្រឹត្តទៅដោយមានការចូលរួមពី ឯកឧត្តម គិត ទ្រី តំណាងរាស្ត្រមណ្ឌលខេត្តរតនគិរី ព្រមទាំងថ្នាក់ដឹកនាំ និងមន្ត្រីរាជការនៃរដ្ឋបាលស្រុកកូនមុំ កងកម្លាំងប្រដាប់អាវុធ និងប្រជាពុទ្ធបរិស័ទយ៉ាងច្រើនកុះករ ដោយបានរួមគ្នាធ្វើពិធីរាប់បាត វេរភត្តាហារប្រគេនព្រះសង្ឃ ដើម្បីឧទ្ទិសកុសលជូនដល់បុព្វការីជន និងញាតិកាទាំងប្រាំពីរសន្តានដែលបានចែកឋានទៅ។
ក្នុងឱកាសនោះ ឯកឧត្តម គិត ទ្រី និងពុទ្ធបរិស័ទ បានសម្តែងនូវការដឹងគុណយ៉ាងជ្រាលជ្រៅចំពោះកងកម្លាំងប្រដាប់អាវុធគ្រប់ប្រភេទ ដែលបានលះបង់កម្លាំងកាយចិត្តការពារជាតិមាតុភូមិ ព្រមទាំងបានបួងសួងប្រសិទ្ធពរជ័យជូនដល់បងប្អូនប្រជាពលរដ្ឋខ្មែរទាំងអស់ ឱ្យជួបតែសេចក្តីសុខ សុវត្ថិភាពក្នុងការធ្វើដំណើរ និងប្រកបដោយពុទ្ធពរទាំងបួនប្រការកុំបីឃ្លៀងឃ្លាតឡើយ៕
