ស្វាយរៀង៖ លោកជំទាវ ឯក សុវណ្ណភារៈ សមាជិកាគណៈកម្មការផែនការ វិនិយោគ កសិកម្ម រុក្ខា ប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា និងជាតំណាងរាស្ត្រមណ្ឌលស្វាយរៀង និងលោកជំទាវ ឈុន សារឹម ទីប្រឹក្សាជាន់ ខ្ពស់រដ្ឋសភា នាព្រឹកថ្ងៃទី២៦ ខែ កញ្ញា ឆ្នាំ២០២៦បានអញ្ជើញចុះសួរសុខទុក្ខ និងនាំយកអំណោយមនុស្សធម៌ទៅប្រគល់ជូនគ្រួសារងាយរងគ្រោះចំនួន ២ គ្រួសារ នៅភូមិអង្គតាមោគ ឃុំប្រសូត្រ ស្រុកស្វាយទាប ខេត្តស្វាយរៀង។
គ្រួសារទាំងពីរ ជាគ្រួសារដែល មានកុមារកំព្រា និងមានជីវភាពខ្វះខាត និងមានបន្ទុកចិញ្ចឹមកូនច្រើន។
អំណោយដែលបាននាំយកមកផ្តល់ជូន រួមមាន អង្ករចំនួន ១៥០ គីឡូក្រាម មី សាច់ជ្រូកចំនួន ៤ កេស ព្រមទាំងសម្លៀកបំពាក់ ក្រមា និងសម្ភារ-គ្រឿងឧបភោគ បរិភោគមួយចំនួនទៀត។
គ្រួសារនីមួយៗក៏ទទួលបានថវិកា ឧបត្ថម្ភចំនួន ១០០.០០០ រៀល ខណៈក្រុមប្រឹក្សាឃុំ និងប្រជាការពារ ទទួលបានថវិកាឧបត្ថម្ភចំនួន ១០០.០០០ រៀល។
ក្នុងឱកាសនោះ លោកជំទាវទាំងពីររូប បានសាកសួរសុខទុក្ខ និងលើកទឹកចិត្តដល់គ្រួសារទាំងពីរ ឱ្យបន្តខិតខំប្រឹងប្រែងប្រកបរបរចិញ្ចឹមជីវិត និងជំនះរាល់ការលំបាកក្នុងជីវភាពរស់នៅ។
តំណាងអាជ្ញាធរមូលដ្ឋានក៏បាន ពាំនាំការសាកសួរសុខទុក្ខ និងលើកទឹកចិត្តដល់គ្រួសារទាំងពីរ ព្រមទាំងបញ្ជាក់ថា អាជ្ញាធរមូលដ្ឋាននឹងបន្តយកចិត្តទុកដាក់ តាមដាន និងជួយដោះស្រាយបញ្ហាប្រឈមនានារបស់ប្រជាពលរដ្ឋ តាមលទ្ធភាពជាក់ស្តែង៕
