វិមានរដ្ឋសភា៖ លោកជំទាវ ឡោក ខេង ប្រធានគណៈកម្មការ សុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) នាព្រឹកថ្ងៃទី២៣ ខែកញ្ញា ឆ្នាំ២០២៦បានអញ្ជើញដឹកនាំកិច្ចប្រជុំជាមួយឯកឧត្តម លោកជំទាវ ជាសមាជិក សមាជិកាគណៈកម្មការ ដើម្បីពិនិត្យវឌ្ឍនភាពការងារ និងរៀបចំចងក្រងសៀវភៅលទ្ធផលការងារដែលគណៈកម្មការសម្រេចបានក្នុងឆ្នាំទី៣ នីតិកាលទី៧ នៃរដ្ឋសភា។

កិច្ចប្រជុំបានផ្តោតលើការពិនិត្យ ពិភាក្សា និងកែសម្រួលខ្លឹមសារ លទ្ធផលការងាររបស់គណៈកម្មការ ព្រមទាំងផ្ទៀងផ្ទាត់ទិន្នន័យ និងឯកសារពាក់ព័ន្ធ ដើម្បីធានាឱ្យសៀវភៅលទ្ធផលការងារមានខ្លឹមសារត្រឹមត្រូវគ្រប់ជ្រុងជ្រោយនិងឆ្លុះបញ្ចាំងបានច្បាស់ពីសកម្មភាព និងសមិទ្ធផលសំខាន់ៗរបស់គណៈកម្មការ។

ក្នុងឱកាសនោះ លោកជំទាវ ឡោក ខេង បានថ្លែងអំណរគុណដល់ឯកឧត្តម លោកជំទាវ ជាសមាជិក សមាជិកាគណៈកម្មការ ព្រមទាំងលោក លោកស្រី ជាមន្ត្រីជំនួយការ ដែលបានខិតខំបំពេញការងារ និងចូលរួមយ៉ាងសកម្មក្នុងការអនុវត្តភារកិច្ចរបស់គណៈកម្មការ។

លោកជំទាវប្រធានគណៈកម្មការ បានណែនាំឱ្យបន្តពិនិត្យ និងបំពេញបន្ថែមខ្លឹមសារចាំបាច់ ដើម្បីឱ្យសៀវភៅលទ្ធផលការងារឆ្នាំទី៣ មានភាពពេញលេញ ត្រឹមត្រូវនិងអាច ប្រើប្រាស់ជាឯកសារសម្រាប់បង្ហាញអំពីសកម្មភាព និងសមិទ្ធផលការងាររបស់គណៈកម្មការបានប្រកបដោយប្រសិទ្ធភាព ៕