ទំព័រមុខ » ព័ត៌មាន » ព័ត៌មានប្រចាំថ្ងៃ » លោកជំទាវ កិត្តិសង្គហបណ្ឌិត ឃួន សុដារី អញ្ជើញជាអធិបតីក្នុងមីទ្ទិញអបអរសាទរខួបអនុស្សាវរីយ៍លើកទី៤៤ នៃទិវាជ័យជម្នះ ៧មករា នៅស្រុកលើកដែក
លោកជំទាវ កិត្តិសង្គហបណ្ឌិត ឃួន សុដារី អញ្ជើញជាអធិបតីក្នុងមីទ្ទិញអបអរសាទរខួបអនុស្សាវរីយ៍លើកទី៤៤ នៃទិវាជ័យជម្នះ ៧មករា នៅស្រុកលើកដែក
រៀបរៀងដោយ ៖​ NARA1472 ​ នៅថ្ងៃទី (1/11/2023 12:45:05 AM )
នាព្រឹកថ្ងៃទី១១ ខែមករា ឆ្នាំ២០២៣ លោកជំទាវ កិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា ក្នុងនាមជាសមាជិក គណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា អនុប្រធានទី១ នៃគណៈអចិន្ត្រៃយ៏ក្រុមការងារថ្នាក់កណ្តាលចុះជួយ ខេត្តកណ្តាល និងជាប្រធានគណៈអចិន្ត្រៃយ៍ក្រុមការងារថ្នាក់កណ្តាលចុះជួយស្រុកលើកដែក អញ្ជើញជាអធិបតីក្នុងមីទ្ទិញអបអរសាទរ​ខួបអនុស្សាវរីយ៍លើកទី៤៤ នៃទិវាជ័យជម្នះ ៧មករា (០៧ មករា ១៩៧៩ - ០៧ មករា ២០២៣) នៅទីធ្លាកំពង់ចម្លងអ្នកលឿង ឃុំព្រែក- ទន្លាប់ ស្រុកលើកដែក ខេត្តកណ្តាល។

ពិធីនេះ មានការអញ្ជើញចូលរួមពី ឯកឧត្តម លោកជំទាវ សមាជិក សមាជិកា រាជរដ្ឋាភិបាល លោក លោកស្រី ក្រុមប្រឹក្សាស្រុក មន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ ប្រជាពលរដ្ឋក្នុងមូលដ្ឋានសរុបចំនួន ៥៨២ នាក់។

ក្នុងឱកាសនោះ លោកជំទាវ កិត្តិសង្គហបណ្ឌិត ឃួន សុដារី បានមានប្រសាសន៍ថា ទិវាជ័យជម្នះ៧ មករា គឺជាថ្ងៃកំណើតរបស់ប្រជា- ពលរដ្ឋកម្ពុជាទូទាំងប្រទេស ទាំងអ្នកនៅក្នុងប្រទេស និងអ្នកនៅក្រៅប្រទេស ដែលបានគាំទ្រជ័យជម្នះថ្ងៃ៧មករា។ ទោះបីមានអ្នកមិន គាំទ្រប្រឆាំងថ្ងៃ ៧មករា មានន័យថា ពួកគេជាអ្នកគាំទ្ររបបប្រល័យពូជសាសន៍ប៉ុលពតដែលបានបង្ករនូវសោកនាដកម្មយ៉ាងធំធេងមក ដល់ប្រជាជនកម្ពុជា។ លោកជំទាវបានបន្តទៀតថា នេះជាសច្ចធម៌ប្រវត្តិសាស្ត្រមួយរបស់ដំណើរជាតិកម្ពុជាដែលគ្មានអំណាច ឬក៏ជន អគតិណាអាចបំភ្លៃអំពីប្រវត្តិសាស្ត្រនេះបានឡើយ។

ក្នុងអង្គពិធីនេះដែរ លោកជំទាវ បានអាននូវសន្ទរកថាទាំងស្រុងរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា

លោកជំទាវបានបញ្ជាក់ថា ការអានសុន្ទរកថានាពេលនេះព្រោះទិវាបុណ្យជ័យជម្នះ៧មករាបានប្រារព្ធធ្វើឡើងថ្ងៃទី៧ ខែមករា ឆ្នាំ២០២៣ នៅថ្នាក់ជាតិ និងបណ្ដាថ្នាក់ក្រោមជាតិមួយចំនួនធំទូទាំងព្រះរាជាណាចក្រកម្ពុជាទាំង២៤ រាជធានីខេត្ត។ លោកជំទាវបានបន្ថែមថាថ្ងៃ៧ មករាជាថ្ងៃបុណ្យជាតិ ដែលបងប្អូនប្រជាពលរដ្ឋត្រូវបានសង្គ្រោះរស់រានមានជីវិត និងធ្វើឱ្យយើងមានអ្វីៗដូចសព្វថ្ងៃនេះ ទាំងការអភិវឌ្ឍ ទាំងសន្តិភាព និងមានអ្វីៗគ្រប់បែបយ៉ាង។​ ជាមួយនេះ លោកជំទាវ បានលើឡើងផងដែរថា ការអានសារនាពេលនេះ គឺជាសារ នយោបាយមួយ ដែលបងប្អូនប្រជាពលរដ្ឋត្រូវតែចងចាំ ព្រោះជាមូលដ្ឋានគ្រឹះក្នុងការអនុវត្តភារកិច្ចរបស់យើងជាបន្តទៀត ដើម្បីធ្វើឲ្យ មាតុភូមិទទួលបាននូវសុខសន្តិភាព និងបន្តការអភិវឌ្ឍន៍ទៅមុខទៀត។

លោកជំទាវ កិត្តិសង្គហបណ្ឌិត ឃួន សុដារី បានគូសបញ្ជាក់ថា គ្មានប្រទេសណាអាចធ្វើការអភិវឌ្ឍបាននៅក្នុងប្រទេសដែលមាន សង្គ្រាមបានឡើយ។ ជាមួយនេះ លោកជំទាវក៏បានអំពាវនាវ ១-សូមយុវជនដែលគ្រប់អាយុបោះឆ្នោត និងបងប្អូនប្រជាពលរដ្ឋទាំងអស់ ត្រូវចូលរួមរក្សាបរិយាកាសដើម្បីឲ្យការប្រព្រឹត្តទៅនាថ្ងៃបោះឆ្នោតប្រព្រឹត្តទៅដោយសេរីយុត្តិធម៌ និងគ្មានអំពើហិង្សា ២-យើងទាំងអស់គ្នា ត្រូវបោះឆ្នោតឲ្យសន្តិភាព បោះឆ្នោតឲ្យការអភិវឌ្ឍ គឺបោះឆ្នោតជូនគណបក្សប្រជាជនកម្ពុជា។

បន្ទាប់ពីបានស្តាប់សុន្ទរកថាទាំងស្រុងរបស់ សម្ដេចអគ្គមហាសេនាបតីតេជោ ហ៊ុន សែន ដ៏មានអត្ថន័យរួចមក លោក ចាប ច័ន្ទវិទ្យា បានឡើងមានមតិចំណាប់អារម្មណ៍ និងប្តេជ្ញាចិត្ត ១-ការពារស្មារតី៧មករា ការពាររាជរដ្ឋាភិបាលស្របច្បាប់ និងការពារបុព្វការីថ្ងៃ- ជ័យជម្នះ៧មករាជារៀងរហូត ២-ការពារសមិទ្ធផល៧មករា ការពារឯករាជ្យ អធិបតេយ្យភាពជាតិ ការពារសន្តិភាព ស្ថិរភាពឲ្យបានជា- ដាច់ខាត ៣-ចូលរួមយ៉ាងសកម្មស្មោះត្រង់ ដោយស្មារតីមុតស្រួច ក្នុងការកែទម្រង់ស៊ីជម្រៅ ក្រោមអភិក្រមទាំង៥ ងូតទឹក ដុះក្អែល ឆ្លុកកញ្ចក់ ព្យាបាល និងវះកាត់ ៤-គាំទ្រយ៉ាងពេញទំហឹង សម្ដេចអគ្គមហាសេនាបតីតេជោ ហ៊ុន សែន ជាបេក្ខជននាយករដ្ឋមន្ត្រី និង ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់ពេលអនាគត ៥-ប្ដេជ្ញាទៅបោះឆ្នោតជូនគណបក្សប្រជាជនកម្ពុជា។ឲ្យបន្តដឹកនាំប្រទេសយូរអង្វែងតទៅ។

ក្នុងឱកាសដ៏វិសេសវិសាលនេះ ឯកឧត្តម លោកជំទាវ លោក លោកស្រី បាននាំយកកន្ត្រក់ផ្កាជូន លោកជំទាវ កិត្តិសង្គហបណ្ឌិត ឃួន សុដារី និងធ្វើពិធីព្រលែងសត្វព្រាប និងបង្ហោះប៉ោងៗ ផងដែរ ៕
អត្ថបទ និងរូបភាព ដោយនាយកដ្ឋានព័ត៌មាន