នៅក្នុងឱកាសទទួលស្វាគមន៍ និងជួបប្រជុំពិភាក្សាការងារជាមួយគណៈប្រតិភូគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និង ទំនាក់ទំនងរដ្ឋសភា ព្រឹទ្ធសភា នៃរដ្ឋសភា ដឹកនាំដោយ ឯកឧត្តម សរ ចំរុង ប្រធានគណៈកម្មការ ដែលអញ្ជើញចុះសិក្សាស្វែងយល់ពី ការងារពាក់ព័ន្ធនឹងវិស័យទទួលបន្ទុករបស់គណៈកម្មការនៅក្នុងខេត្តត្បូងឃ្មុំ នារសៀលថ្ងៃទី២១ ខែមីនា ឆ្នាំ២០២២ នៅឯសាលប្រជុំ សាលាខេត្ត ឯកឧត្តម ពាង ណារិទ្ធ អភិបាលស្តីទីនៃខេត្តត្បូងឃ្មុំ បានមានប្រសាសន៍ជម្រាបជូនគណៈកម្មការរដ្ឋសភា ពីយន្តការ នៃ ការដោះស្រាយទំនាស់ដីធ្លីរបស់ខេត្ត និងភាពរីកចម្រើនជាច្រើនដែលខេត្តត្បូងឃ្មុំសម្រេចបាន។

ឯកឧត្តម ពាង ណារិទ្ធ បានជម្រាបជូនគណៈប្រតិភូរដ្ឋសភាទៀតថា ដោយអនុវត្តតាមយុទ្ធសាស្ត្រចតុកោណ ដំណាក់កាលទី៤របស់ រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជា- ណាចក្រកម្ពុជា រដ្ឋបាលខេត្តត្បូងឃ្មុំ បានខិតខំអភិវឌ្ឍន៍បានសមិទ្ធផលធំៗជាច្រើន ដែលបានធ្វើឲ្យជីវភាពរស់នៅរបស់ប្រជាពលរដ្ឋ ក្នុងខេត្ត មានការប្រែប្រួលរីកចម្រើនជាលំដាប់ មានភាពស៊ីវិល័យ ហើយអត្រានៃភាពក្រីក្រត្រូវបានកាត់បន្ថយជាបន្តបន្ទាប់។

ឯកឧត្តមអភិបាលខេត្តស្តីទី បានបន្តទៀតថា ខេត្តបានធ្វើការកែលំអហេដ្ឋារចនាសម្ព័ន្ធផ្លូវថ្នល់ក្នុងខេត្ត តាំងពីទីប្រជុំជនរហូតដល់ជនបទ មានការកសាងរមណីយដ្ឋានទេសចរណ៍តាមសហគមន៍ និងមានការសាងសង់ហេដ្ឋារចនាសម្ព័ន្ធជាបន្តបន្ទាប់បន្ថែមទៀត។

ឯកឧត្តម ក៏បានជម្រាបជូនគណៈកម្មការរដ្ឋសភា អំពីយន្តការដោះស្រាយវិវាទដីធ្លីនៅក្នុងខេត្ត ដោយខេត្តបានធ្វើការសម្របសម្រួល ដោះស្រាយវិវាទដីធ្លីជូនប្រជាពលរដ្ឋទៅតាមយន្តការជាច្រើន មានដូចជា ទី១.អាជ្ញាធរជាតិដោះស្រាយវិវាទដីធ្លី ទី២.អនុគណៈកម្មការ សុរិយោដី និងទី៣. ប្រើនីតិវិធីទទួលពាក្យបណ្តឹង បំពេញឯកសារ និងចុះស្រាវជ្រាវដល់ទីតាំងជាក់ស្តែង។ ជាមួយគ្នានេះ រដ្ឋបាលខេត្ត ក៏បានលើកឡើងពីបញ្ហាប្រឈមជាច្រើន លើករណីទំនាស់ដីធ្លីដែលតែងតែកើតមានជាហូរហែ ដែលបង្កឡើងដោយក្រុមមនុស្សមួយ- ចំនួនតូច និងការលក់ដីជាន់គ្នារបស់អ្នកគួកជេរដីជាដើម និងបានស្នើសុំការជួយធ្វើអន្តរាគមន៍ ដើម្បីរកមធ្យោបាយជួយដោះស្រាយពី គណៈកម្មការរដ្ឋសភាផងដែរ។

ឯកឧត្តម សរ ចំរុង បានមានប្រសាសន៍ថ្លែងអំណរគុណ និងកោតសរសើរចំពោះរដ្ឋបាលខេត្តត្បូងឃ្មុំ ដែលបានខិតខំក្នុងការអភិវឌ្ឍ ខេត្តត្បូងឃ្មុំឲ្យមានការរីចម្រើនគួរឲ្យកត់សម្គាល់ ពិសេសបានយកចិត្តទុកដាក់បម្រើសេវាសាធារណៈ និងដោះស្រាយរាល់ការលំបាក ជូនប្រជាពលរដ្ឋដោយឈរលើគោលការណ៍ច្បាប់ ប្រកបដោយភាពសុខដុមរមនាក្នុងសង្គម។

ឯកឧត្តមប្រធាន ក៏បានមានប្រសាសន៍ជម្រាបជូនអាជ្ញាធរខេត្តថា នៅក្នុងឆ្នាំ២០២១កន្លងទៅ គណៈកម្មការបានទទួលពាក្យបណ្តឹងពី ប្រជាពលរដ្ឋនៅទូទាំងប្រទេសជាបន្តបន្ទាប់ ហើយរហូតមកដល់បច្ចុប្បន្ននេះ គណៈកម្មការបានទទួលពាក្យបណ្តឹងសរុបចំនួន ៥៣៩- ករណី អន្តរាគមន៍បានចំនួន ៣៣៩ករណី តម្កល់ទុកមិនចាត់ការចំនួន ១៩១ករណី ពាក្យបណ្តឹងកំពុងពិនិត្យចំនួន ៩ករណី និងលិខិត ឆ្លើយតបចំនួន ៧១ករណី។

ឯកឧត្តមប្រធានគណៈកម្មការ បានធ្វើការកត់សម្គាល់លើបញ្ហាប្រឈមទាំងអស់ដែលខេត្តបានលើកឡើង ដោយគណៈកម្មការសន្យាថា នឹងនាំយកបញ្ហាទាំងនោះ ទៅជម្រាបជូន សម្តេចអគ្គមហាពញាចក្រី ហេង សំរិន ប្រធានរដ្ឋសភា ដើម្បីជួយធ្វើអន្តរាគមន៍ដោះស្រាយ តាមនីតិវិធីរបស់រដ្ឋសភាផងដែរ៕

អត្ថបទ និងរូបភាព ដោយនាយកដ្ឋានព័ត៌មាន