គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃ រដ្ឋសភា ដឹកនាំដោយ ឯកឧត្តម ប៉ាល់ សំឣឿន ឣនុប្រធានគណៈកម្មការ បានអញ្ជើញចុះជួបពិភាក្សាការងារជាមួយ ឯកឧត្តម ជឺង ផល្លា ប្រធានក្រុមប្រឹក្សាខេត្តកំពត និង លោកជំទាវ យូ សុគន្ធ អភិបាលរងខេត្តកំពត ព្រមទាំងលោក លោកស្រី ប្រធានមន្ទីរជំនាញទាក់ទង នឹងវិស័យទទួលបន្ទុករបស់គណៈកម្មការ នៅព្រឹកថ្ងៃទី១៥ ខែមីនា ឆ្នាំ២០២២ នៅសាលប្រជុំនៃសាលាខេត្តកំពត។

ឯកឧត្តម ប៉ាល់ សំឣឿន ឣនុប្រធានគណៈកម្មការ បានមានប្រសាសន៍ជម្រាបជូនអាជ្ញាធរខេត្តកំពតថា គណៈកម្មការទី៨នៃរដ្ឋសភា ចុះមកកាន់ខេត្តកំពតនាពេលនេះ មានគោលបំណងសិក្សាស្វែងយល់ពីវឌ្ឍនភាពការងារ លើវិស័យទទួលខុសត្រូវរបស់គណៈកម្មការ និងប្រមូលព័ត៌មានអំពីប្រសិទ្ធភាពនៃការអនុវត្តន៍ច្បាប់របស់ខេត្ត ក៏ដូចជាបញ្ហាប្រឈមនានា ដែលខេត្តបានជួបប្រទះនាពេលកន្លងមក ដើម្បីរួមគ្នារកដំណោះស្រាយឲ្យបានទាន់ពេលវេលា។

ឯកឧត្តម ជឺង ផល្លា ប្រធានក្រុមប្រឹក្សាខេត្ត បានមានប្រសាសន៍ជម្រាបជូនគណៈប្រតិភូពីវឌ្ឍនភាពការងារ និងភាពរីកចម្រើនរបស់ ខេត្តកំពត ដែលអាជ្ញាធរខេត្តបានខិតខំធ្វើឱ្យសេដ្ឋកិច្ច និងជីវភាពរស់នៅរបស់ប្រជាពលរដ្ឋត្រូវបានលើកកម្ពស់តាមរយៈការអភិវឌ្ឍលើ វិស័យសំខាន់ៗដូចជាវិស័យសុខាភិបាល សង្គមកិច្ចជាដើម ដែលជំរុញឲ្យប្រជាពលរដ្ឋទទួលបានសេវាថែទាំសុខភាព ឣនាម័យ បង្កើន ចំណេះដឹង និងជំនាញជាច្រើនតាមរយៈសហគ្រាស គ្រឹះស្ថាន និងការវិនិយោគលើវិស័យវាយនភណ្ឌកាត់ដេរ កំពង់ផែ និងវិស័យផ្សេងៗ ទៀត ដែលបានធ្វើឱ្យអត្រានៃភាពក្រីក្រថយចុះគួរឱ្យកត់សំគាល់។

លោកជំទាវ យូ សុគន្ធ ឣភិបាលរងខេត្ត ក៏បានមានប្រសាសន៍ឲ្យដឹងថា ទោះស្ថិតក្នុងការលំបាកនៃវិបត្តិជំងឺកូវីដ-១៩ តែក្រោមការដឹកនាំ ដ៏ឈ្លាវៃរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើការប្រយុទ្ធប្រឆាំងយ៉ាងសកម្មជាមួយនឹងជំងឺ កូវីដ-១៩ តាមរយៈការអនុវត្តយុទ្ធសាស្ត្រ បីសំខាន់ គឺទប់ស្កាត់ ព្យាបាល និងចាក់វ៉ាក់សាំង។ ជាមួយគ្នានេះ ខេត្តក៏បានអនុវត្តន៍នូវ គោលនយោបាយរក្សាលំនឹងជីវភាពប្រជាជន និងថែមទាំង បានធ្វើការផ្សព្វផ្សាយឲ្យប្រជាពលរដ្ឋទៅចាក់វ៉ាក់សាំង ឲ្យបានគ្រប់ចំនួន ដើម្បីបង្កើតភាពស៊ាំនៅក្នុងសហគមន៍។ ខេត្តបានបើកវគ្គបណ្តុះបណ្តាលជំនាញដល់ស្ត្រីម៉េមាយ ក្មេងស្រីបោះបង់ការសិក្សា ស្ត្រីក្រីក្រ នៅមជ្ឈមណ្ឌលឣភិវឌ្ឍន៍ស្ត្រីខេត្ត និងឣប់រំផ្សព្វផ្សាយពីការចិញ្ចឹមកូនបែបវិជ្ជមាន និងការពន្យាកំណើតប្រកបដោយសុវត្ថិភាព។

លោកជំទាវ យូ សុគន្ធ ឣភិបាលរងខេត្ត បានបន្តថា ទន្ទឹមនឹងសមិទ្ធផលដែលខេត្តសម្រេច និងទទួលបាននេះ រដ្ឋបាលខេត្ត ក៏បានជួប ប្រទះនូវបញ្ហាប្រឈមជាច្រើន ដែលស្នើសុំគណៈកម្មការនៃរដ្ឋសភាជួយធ្វើអន្តរាគមន៍ដោះស្រាយផងដែរ។

បន្ទាប់ពីបានស្តាប់ការរាយការណ៍របស់ឯកឧត្តមប្រធានក្រុមប្រឹក្សាខេត្ត លោកជំទាវឣភិបាលរងខេត្ត និងលោក លោកស្រី ជាប្រធាន មន្ទីរជំនាញពាក់ព័ន្ធរួចមក ឯកឧត្តម ប៉ាល់ សំឣឿន បានថ្លែងកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់អាជ្ញាធរ ខេត្ត ក្នុងការជួយសម្រួលរាល់ការលំបាករបស់ប្រជាពលរដ្ឋនៅក្នុងមូលដ្ឋាន ជាពិសេសខិតខំធ្វើការផ្សព្វផ្សាយ ពីការថែរក្សាសុខភាព របស់ប្រជាពលរដ្ឋពីជំងឺផ្សេងៗ ពិសេសជំងឺកូវីដ-១៩ និងជំងឺមិនឆ្លង ព្រមទាំងទាក់ទាញអ្នកវិនិយោគអោយមកបណ្តាក់ទុននៅក្នុងខេត្ត ឱ្យកាន់តែមានចំនួនច្រើនឡើងថែមទៀត ដើម្បីបង្កើតការងារជូនប្រជាពលរដ្ឋ រួមចំណែកជួយកាត់បន្ថយការលំបាករបស់ពួកគាត់ផង ដែរ។

ឯកឧត្តម ប៉ាល់ សំឣឿន បានលើកទឹកចិត្ត និងជម្រុញដល់ថ្នាក់ដឹកនាំខេត្ត និងសហការីទាំងអស់ រួមគ្នាខិតខំបំពេញការងារបន្ថែមទៀត ក្នុងការដោះស្រាយរាល់បញ្ហាប្រឈមទាំងនោះ។ ចំណែកគណៈកម្មការក៏នឹងពាំនាំយកបញ្ហាប្រឈមទាំងនេះ ទៅជម្រាបជូន សម្តេច ឣគ្គមហាពញាចក្រី ហេង សំរិន ប្រធានរដ្ឋសភា ដើម្បីធ្វើអន្តរាគមន៍ទៅតាមនីតិវិធីរបស់រដ្ឋសភា។

អត្ថបទ និងរូបភាព ដោយនាយកដ្ឋានព័ត៌មាន