ពិធីចុះហត្ថលេខារវាងអគ្គលេខាធិការដ្ឋានរដ្ឋសភា និងក្រុមហ៊ុន TCV Engineering Co., Ltd លើកិច្ចសន្យាសាងសង់អគាររដ្ឋបាលថ្មី នៃ រដ្ឋសភាកម្ពុជា ដែលជាជំនួយឥតសំណងរបស់បក្ស រដ្ឋ និងប្រជាជនវៀតណាម ផ្តល់ជូនរដ្ឋ និងប្រជាជនកម្ពុជា បានប្រារព្ធធ្វើក្រោម អធិបតីភាពដ៏ខ្ពង់ខ្ពស់ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា និង ឯកឧត្តម ឈាង វុន ប្រធាន គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា និង ឯកឧត្តម ង្វៀន ប៊ុយតាំង ឯកអគ្គរដ្ឋទូតវិសាមញ្ញ និង ពេញសមត្ថភាព នៃសាធារណរដ្ឋសង្គមនិយមវៀតណាមប្រចាំនៅកម្ពុជា។
ពិធីចុះហត្ថលេខានេះបានរៀបចំធ្វើឡើងនៅវិមានរដ្ឋសភា នាព្រឹកថ្ងៃទី២៤ ខែកុម្ភៈ ឆ្នាំ២០២២ ដោយមានការអញ្ជើញចូលរួមពី ឯកឧត្តម ឡេង ប៉េងឡុង អគ្គលេខាធិការរដ្ឋសភា និងតំណាងក្រុមហ៊ុន ព្រមទាំង ប្រធាន និងសមាជិកគណៈកម្មការវិវេចនាលទ្ធកម្ម (PRC) ប្រធាន និងសមាជិកគណៈកម្មការវាយតម្លៃការដេញថ្លៃ (BEC) សម្រាប់អនុវត្តគម្រោងសាងសង់អគាររដ្ឋបាលថ្មីនៃរដ្ឋសភាកម្ពុជា។
ថ្លែងក្នុងពិធីចុះហត្ថលេខា ឯកឧត្តម ឡេង ប៉េងឡុង បានមានប្រសាសន៍ថា កិច្ចព្រមព្រៀងហិរញ្ញប្បទានលើគម្រោងសាងសង់អគារ រដ្ឋបាលថ្មីនៃរដ្ឋសភាកម្ពុជា ត្រូវបានរដ្ឋាភិបាល នៃសាធារណរដ្ឋសង្គមនិយមវៀតណាម និងរាជរដ្ឋាភិបាល នៃព្រះរាជាណាចក្រកម្ពុជា ចុះហត្ថលេខានៅទីក្រុងហាណូយនាថ្ងៃទី៤ ខែតុលា ឆ្នាំ២០១៩ រួមមាន៨មាត្រា។
ឯកឧត្តមអគ្គលេខាធិការ បានមានប្រសាសន៍បន្តថា ការសាងសង់អគាររដ្ឋបាលថ្មីនៃរដ្ឋសភាកម្ពុជានេះ មានកម្ពស់១២ជាន់ រួមទាំងការ បំពាក់សម្ភារផង គឺមានទំហំទឹកប្រាក់មិនលើសពី២៥លានដុល្លារអាមេរិក ដោយប្រើថេរវេលាអនុវត្តរយៈពេល៣ឆ្នាំ។ ដោយអនុលោម តាមកិច្ចព្រមព្រៀងការបើកផ្តល់ហិរញ្ញប្បទានមានបីដំណាក់កាល គឺដំណាក់កាលទីមួយ ៣០% ដំណាក់កាលទីពីរ ៤០% និងដំណាក់- កាលចុងក្រោយ ៣០% ដែលស្មើនឹងទឹកប្រាក់ចំនួន ៧ ៥០០ ០០០ $ (ប្រាំពីរលាន ប្រាំរយពាន់ដុល្លារអាមេរិក)។
ឯកឧត្តម ឡេង ប៉េងឡុង បានមានប្រសាសន៍បន្ថែមថា អគ្គលេខាធិការដ្ឋានរដ្ឋសភា នឹងប្រើប្រាស់ថវិកាប្រកបដោយតម្លាភាពស្រប- តាមនីតិវិធីស្តង់ដារ នៃអនុក្រិតលេខ១៨១អនក្រ.បក ចុះថ្ងៃទី២ ខែធ្នូ ឆ្នាំ២០១៩ របស់រាជរដ្ឋាភិបាលស្តីពីការដាក់ឱ្យប្រើប្រាស់នីតិវិធីរួម សម្រាប់គ្រប់គ្រងការរៀបចំ និងតាមដានការអនុវត្តគម្រោងហិរញ្ញប្បទានពីដៃគូអភិវឌ្ឍ៕
អត្ថបទ និងរូបភាព ដោយនាយកដ្ឋានព័ត៌មាន