ឯកឧត្តម ឡេង ប៉េងឡុង អគ្គលេខាធិការរដ្ឋសភា និងជាតំណាងដ៏ខ្ពង់ខ្ពស់របស់ សម្តេចអគ្គមហាពញាចក្រី ហេង សំរិន ប្រធាន រដ្ឋសភា នៃព្រះរាជាណាចក្រកម្ពុជា បានអនុញ្ញាតឱ្យក្រុមនិស្សិតចំនួន១៧រូប ជាប់អាហារូបករណ៍ទៅសិក្សានៅប្រទេសអូស្ត្រាលី ចូល ជួបសម្ដែងការគួរសម នៅវិមានរដ្ឋសភា នាព្រឹកថ្ងៃទី១០ ខែកុម្ភៈ ឆ្នាំ២០២២។
លោកស្រី នួន មករា តំណាងក្រុមនិស្សិត បានរាយការណ៍ជូន ឯកឧត្តម ឡេង ប៉េងឡុង ថា អាហារូបករណ៍ទទួលបាននេះ ជា អាហារូបករណ៍ដ៏មានសក្ដានុពលមួយ ដែលទទួលបានការគាំទ្រពីរដ្ឋាភិបាលអូស្រ្តាលី ក្នុងគោលបំណងដើម្បីរួមចំណែកដល់តម្រូវការ អភិវឌ្ឍន៍រយៈពេលវែង និងពង្រឹងកិច្ចសហប្រតិបត្តិការរវាងអូស្ត្រាលី និងកម្ពុជា។
លោកស្រី នួន មករា បានបន្តទៀតថា អាហារូបករណ៍នេះ នឹងផ្ដល់ឱកាសស្រាវជ្រាវ ព្រមទាំងអភិវឌ្ឍន៍សមត្ថភាពវិជ្ជាជីវៈដល់និស្សិត កម្ពុជា ដែលមានទេពកោសល្យ និងជាអ្នកដឹកនាំជំនាន់ក្រោយ ដែលមានបំណងនាំមកនូវភាពវិជ្ជមាន សម្រាប់ប្រទេសជាតិ ដើម្បីរួម ចំណែកដល់តម្រូវការនៃការអភិវឌ្ឍន៍កម្ពុជានាពេលអនាគត។
ក្នុងនាមជាតំណាងដ៏ខ្ពង់ខ្ពស់របស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ឯកឧត្តម ឡេង ប៉េងឡុង អគ្គលេខាធិការរដ្ឋសភា បានសម្ដែងការអបអរសាទរ និងកោតសរសើរ ចំពោះកិច្ចខិតខំប្រឹងប្រែងរបស់ក្រុមនិស្សិត ដែល ទោះបីជាជាប់បំពេញការងារក្នុងវិស័យសាធារណៈ ឬឯកជនយ៉ាងណាក្ដី ប៉ុន្តែនៅបានខិតខំរៀនសូត្ររហូតប្រឡងជាប់អាហារូបករណ៍ ដោយជោគជ័យ។
ឯកឧត្តម ឡេង ប៉េងឡុង សង្ឃឹមជឿជាក់ថា ក្រុមនិស្សិតនឹងបន្តប្រឹងប្រែងរៀនសូត្រឱ្យទទួលបានជោគជ័យថ្មីបន្ថែមទៀត ដោយបន្ត ការសិក្សាឱ្យបានចប់ចុងចប់ដើមតាមកម្មវិធីសិក្សា។ ឯកឧត្តម បានមានប្រសាសន៍បន្តថា អាហារូបករណ៍នេះ ជាឱកាសឱ្យក្រុមនិស្សិត បានពង្រឹងចំណេះដឹង និងបទពិសោធន៍ ដើម្បីអនាគតខ្លួនឯង ក្រុមគ្រួសារ និងប្រទេសជាតិ។
សូមបញ្ជាក់ថា ចាប់តាំងពីឆ្នាំ១៩៩៥មក កម្មវិធីអាហារូបករណ៍AustraliaAwardគាំទ្រដោយរដ្ឋាភិបាលអូស្ត្រាលី បានផ្ដល់អាហារូបករណ៍ ដល់និស្សិតកម្ពុជា បានជាង៨០០នាក់ ឱ្យទៅសិក្សាថ្នាក់ឧត្តមសិក្សានៅប្រទេសអូស្ត្រាលី៕
អត្ថបទ និងរូបភាព ដោយនាយកដ្ឋានព័ត៌មាន